તમારા કામનું / 8માં પગારપંચના લીધે શું ખરેખર બેઝિક સેલરી 4 ગણી વધી જશે? સમજો ફિટમેન્ટ ફેક્ટર

કેન્દ્રીય કર્મચારીઓ અને પેન્શનર્સમાં 8મા પગાર કમિશનને લઈને ઉત્સુકતા અને અપેક્ષાઓ વધી રહી છે. સૌથી વધુ ચર્ચા એ વાતની થઈ રહી છે કે શું તેમનો બેઝિક પગાર ખરેખર ચારગણો થઈ શકે છે?કર્મચારી સંગઠનો દ્વારા 3.83 ફિટમેન્ટ ફેક્ટરની માંગ કરવામાં આવી છે. જો આ માંગ મંજૂર થાય તો હાલનો ન્યૂનતમ બેઝિક પગાર 18,000 રૂપિયાથી વધીને આશરે 69,000 રૂપિયા થઈ શકે છે. આ આંકડો જોઈને ઘણાને લાગે છે કે પગારમાં લગભગ ચારગણો વધારો થશે. પરંતુ આ હજુ માત્ર માંગ છે, સરકારે તેને મંજૂરી આપી નથી.

ફિટમેન્ટ ફેક્ટરનો અર્થ શું છે?

ફિટમેન્ટ ફેક્ટર એવો ગુણાંક છે જેના આધારે જૂના બેઝિક પગારને નવા પગારધોરણમાં રૂપાંતરિત કરવામાં આવે છે. 7મા પગાર કમિશન મુજબ હાલનો ન્યૂનતમ બેઝિક 18,000 રૂપિયા છે. જો 3.83નો ફેક્ટર લાગુ પડે તો 18,000 × 3.83 =68,940 રૂપિયા થાય. એટલે કે નવો બેઝિક આશરે 69,000 રૂપિયા થઈ શકે છે. પરંતુ ફક્ત બેઝિક પગારનો 3.83 ગણો વધારો થવાનો અર્થ એ નથી કે કુલ પગાર પણ ચારગણો થઈ જશે. કુલ પગારમાં ડીએ, એચઆરએ, ટ્રાન્સપોર્ટ એલાઉન્સ અને અન્ય ભથ્થાં પણ સામેલ હોય છે, જેનો હિસાબ નવા સ્ટ્રક્ચરમાં અલગ રીતે થઈ શકે છે.

શું સરકાર 3.83 ફેક્ટર આપશે?

આ સૌથી મહત્વનો પ્રશ્ન છે. કર્મચારી સંગઠનોની માંગને સરકારનો નિર્ણય માની લેવો યોગ્ય નથી. 7મા પગાર કમિશન વખતે પણ એનસી-જેસીએમે 3.71 ફેક્ટરની માંગ કરી હતી, પરંતુ અંતે સરકારે 2.57 જ મંજૂર કર્યું હતું. તેથી 8મા પગાર કમિશનમાં અંતિમ ફિટમેન્ટ ફેક્ટર કેટલો રહેશે, તે કમિશનની ભલામણ અને સરકારની મંજૂરી પછી જ સ્પષ્ટ થશે.

2.10 ફેક્ટર પર પણ વધારો શક્ય છે

જો 3.83ની માંગ પૂરી ન થાય તો પણ પગારમાં નોંધપાત્ર વધારો થઈ શકે છે. કેટલાક અંદાજો મુજબ 2.06 થી 2.10 જેટલા ફેક્ટરની પણ વાત થઈ રહી છે. 2.10 ના ફેક્ટરથી કુલ પગારમાં આશરે 32 ટકા જેટલો વધારો થઈ શકે છે. આ પણ અધિકૃત આંકડા નથી, માત્ર અનુમાન છે.

વધુ વાંચો:દર વર્ષે માત્ર 1 લાખ વધારાના ભરીએ તો 30 વર્ષની હોમ લોન કેટલા વર્ષમાં થશે પૂરી? સમજો આખું ગણિત

શું ખરેખર ચારગણો પગાર મળશે?

ફક્ત બેઝિક 18,000 રૂપિયાને 3.83થી ગુણાકાર કરવાથી આશરે 69,000 રૂપિયા થાય છે, તેથી તેને ચારગણો વધારો કહેવામાં આવે છે. પરંતુ આ હજુ કર્મચારી સંગઠનોની માંગ છે, નક્કી થયેલું પગારધોરણ નથી. તેથી હાલમાં પગાર ચારગણો થવાની વાતને અંતિમ સત્ય માની લેવું યોગ્ય નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ