Crime News / સુરતના ભટારમાં માસૂમ સાથે હેવાનિયત, 9 વર્ષની બાળકીની આપવીતીથી ખુલ્યું 45 વર્ષીય ઢગાનું કાળું કૃત્ય

Surat Crime News: સુરતના ભટાર વિસ્તારમાં માનવતાને શર્મસાર કરતી એક ઘટના સામે આવી છે, જેમાં 9 વર્ષની માસૂમ બાળકી સાથે 45 વર્ષીય નરાધમે દુષ્કર્મ આચર્યું હતું. ઘટના અંગે ખટોદરા પોલીસે ગુનો નોંધી આરોપીની ધરપકડ કરી લીધી છે.

સુરતના ભટાર વિસ્તારમાં નવ વર્ષની માસુમ બાળકી સાથે દુષ્કર્મની ઘટના સામે આવી છે. બાળકીના માતા-પિતા મજૂરીકામ અર્થે ગયા હતા. ઘરે 11 વર્ષનો બીમાર પુત્ર અને અન્ય નાના બાળકો હાજર હતા. સાંજના સમયે વિસ્તારમાં રહેતો નંદલાલ મુખિયા 9 વર્ષની બાળકીને લલચાવી-ફોસલાવીને પોતાના ઘરે લઈ ગયો હતો. અને બાળકી સાથે દુષ્કર્મ આચર્યુ હતું

બાળકી લાંબો સમય સુધી ઘરે પરત ન આવતા તેના ભાઈઓએ શોધખોળ શરૂ કરી હતી. તે દરમિયાન પાડોશમાં જ રહેતા યુવકે દરવાજો ખોલતા બાળકી ત્યાં હતી. જેથી ભાઈ બાળકીને ઘરે લઈ આવ્યો હતા. બાળકી ખૂબ જ ડરેલી અને ગુમસુમ હોવાથી તેણે શરૂઆતમાં પરિવારને કશું જણાવ્યું નહોતું.

આ પણ વાંચોઃ ગાંધીનગર / ગુજરાત પર દેવાનો ડુંગર, પાણીથી લઈ સિંહના મોત સુધી CAGએ ખોલી પોલ

9 સપ્ટેમ્બરે બાળકીને પેટમાં અસહ્ય દુખાવો ઉપડતાં માતા તેને સારવાર અર્થે નજીકના હેલ્થ સેન્ટર લઈ ગઈ હતી. ત્યાં પૂછપરછ દરમિયાન માસૂમ બાળકીએ રડતાં રડતાં પોતાની સાથે થયેલી આપવીતી અને નરાધમ નંદલાલની હેવાનીયતની વાત જણાવી હતી. જેથી માતાએ પોલીસને સમગ્ર વિગતની જાણ કરતા ખટોદરા પોલીસે તપાસ શરૂ કરી હતી.

બનાવ અંગે ભોગ બનનાર બાળકીની માતાની ફરિયાદના આધારે ખટોદરા પોલીસે તાત્કાલિક કાર્યવાહી કરીને આરોપી નંદલાલ રામબહાદુર મુખિયા(ઉ.વ.45) ની ધરપકડ કરી વધુ તપાસ હાથ ધરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ