વિશ્વ / 50 દેશો માટે Americaએ વિઝા બોન્ડ પ્રોગ્રામ કર્યો કાયમી, જાણો ભારત છે કે નહીં?

New US Visa Rules: અમેરિકાએ વિઝા બોન્ડ પ્રોગ્રામને કાયમી બનાવ્યો છે. 50 દેશોના નાગરિકોને હવે બિઝનેસ અને ટુરિસ્ટ વિઝા માટે 20000 ડોલર સુધીના બોન્ડ જમા કરાવવાની જરૂર પડી શકે છે. આ નિયમ ૩ ઓગસ્ટથી અમલમાં આવશે. આ યાદીમાં ભારતનો સમાવેશ નથી, જ્યારે આ નિયમ બાંગ્લાદેશ, નેપાળ અને ભૂટાન પર લાગુ થશે.

અમેરિકાએ હવે વિઝા બોન્ડ પ્રોગ્રામને કાયમી બનાવ્યો છે. નવા નિયમ હેઠળ ચોક્કસ દેશોના નાગરિકોને બિઝનેસ (B-1) અને ટુરિસ્ટ (B-2) વિઝા મેળવતા પહેલા 20,000 ડોલર સુધીના બોન્ડ અથવા સુરક્ષા નાણાં જમા કરાવવાની જરૂર પડી શકે છે. નવો નિયમ ૩ ઓગસ્ટથી અમલમાં આવશે. યુએસ સરકારે ફેડરલ રજિસ્ટરમાં જારી કરાયેલી સૂચના દ્વારા આ નિર્ણય લીધો છે. આ મુજબ જો જરૂરી હોય તો વિઝા અધિકારીઓ કોઈપણ લાયક અરજદારને વિઝા આપતા પહેલા બોન્ડ સબમિટ કરવાનું કહી શકે છે.

હાલ માટે આ નિયમ ૫૦ દેશોના નાગરિકોને લાગુ પડે છે, જેમાંથી મોટાભાગના આફ્રિકાના છે. ભારત માટે એક રાહત એ છે કે ભારતનો આ યાદીમાં સમાવેશ નથી. આનો અર્થ એ છે કે ભારતીય નાગરિકોએ B-1 (વ્યવસાય) અને B-2 (પ્રવાસી) વિઝા માટે અરજી કરતી વખતે બોન્ડ સબમિટ કરવાની જરૂર રહેશે નહીં. જોકે અમેરિકાએ સ્પષ્ટતા કરી છે કે ભવિષ્યમાં જરૂર પડ્યે અન્ય દેશોને પણ આ યોજનામાં સામેલ કરી શકાય છે. હાલમાં આ યાદીમાં બાંગ્લાદેશ, નેપાળ અને ભૂટાન જેવા પડોશી દેશોનો સમાવેશ થાય છે.

આ યોજના 2025 માં શરૂ કરવામાં આવી હતી

અમેરિકાએ આ યોજના 2025 માં પાયલોટ પ્રોજેક્ટ તરીકે શરૂ કરી હતી. તેનો હેતુ એ નક્કી કરવાનો હતો કે બોન્ડ મેળવવાથી લોકો તેમના વિઝાની મુદત કરતાં વધુ સમય રોકાઈ શકશે કે નહીં. યુએસ સરકાર કહે છે કે પાયલોટ યોજનાના સકારાત્મક પરિણામો આવ્યા છે, તેથી તેને હવે કાયમી બનાવવામાં આવ્યું છે.

આ નિર્ણયને રાષ્ટ્રપતિ ડોનાલ્ડ ટ્રમ્પની કડક ઇમિગ્રેશન નીતિનો ભાગ માનવામાં આવી રહ્યો છે. અગાઉ આ યોજના હેઠળ 5,000, 10,000 અને 15,000 ડોલરના બોન્ડ લેવાતા હતા. હવે $5,000 વિકલ્પ દૂર કરવામાં આવ્યો છે, અને મહત્તમ રકમ વધારી 20,000 ડોલર કરવામાં આવી છે.

આ પણ વાંચોઃ Video / અમેરિકામાં અંધાધૂંધ ગોળીબાર, અનેક લોકો માર્યા ગયાની આશંકા

આ નિયમનો શું ફાયદો થશે?

અમેરિકી અધિકારીઓનું કહેવું છે કે આ નિયમ લોકોને વિઝા આવશ્યકતાઓનું પાલન કરવા માટે પ્રોત્સાહિત કરશે અને યુએસમાં ગેરકાયદે ઓવરસ્ટે અટકાવશે. જોકે ઇમિગ્રેશન નિષ્ણાતો માને છે કે આનાથી વ્યવસાય અથવા પર્યટન માટે યુએસમાં આવતા ઘણા વાસ્તવિક મુસાફરો પર નાણાકીય બોજ વધી શકે છે. વધુમાં ટ્રમ્પ વહીવટીતંત્રે પહેલાથી જ ઘણી વિઝા શ્રેણીઓ માટે ફી વધારી દીધી છે અને વિઝા અરજદારોના સોશિયલ મીડિયા એકાઉન્ટ્સની ચકાસણી કડક બનાવી દીધી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ