NRI / H-1B વિઝાધારકોને પરેશાન કરવાથી અમેરિકાને જ આર્થિક નુકસાન થશે, ઇન્ડિયાસ્પોરાએ આપી ચેતવણી

અમેરિકામાં ચૂંટણીના માહોલ વચ્ચે વિદેશી કર્મચારીઓ ખાસ કરીને ભારતીય પ્રોફેશનલ્સને લઈને રાજકીય ચર્ચા તેજ બની છે. H-1B વિઝાના નિયમો કડક કરવાની માંગ પણ ઉઠી રહી છે. આ દરમિયાન ઇન્ડિયાસ્પોરા નામના સંગઠને અમેરિકાને ચેતવણી આપી છે કે ભારતીય કર્મચારીઓને પરેશાન કરવાથી દેશને આર્થિક નુકસાન થઈ શકે છે. ટેક્નોલોજીથી લઈને હેલ્થકેર અને શિક્ષણ સુધીના ક્ષેત્રોમાં ભારતીયોનું મોટું યોગદાન છે. જો આ કર્મચારીઓ માટે કામ કરવું મુશ્કેલ બનાવવામાં આવશે તો તેની અસર માત્ર મોટી કંપનીઓ સુધી નહીં પરંતુ નાના શહેરો અને ગ્રામ્ય વિસ્તારો સુધી પણ પહોંચી શકે છે.

H-1B વિઝાને લઈને અમેરિકામાં કેમ વધી રહી છે ચર્ચા?

અમેરિકામાં ચૂંટણીનો માહોલ છે અને આ દરમિયાન વિદેશી કર્મચારીઓને લઈને રાજકીય નિવેદનો સામે આવી રહ્યા છે. ખાસ કરીને H-1B વિઝા પર કામ કરતા ભારતીય પ્રોફેશનલ્સને લઈને કડક નિયમો બનાવવાની વાત થઈ રહી છે. કેટલાક લોકો વિદેશી કર્મચારીઓની ભરતીનો વિરોધ કરી રહ્યા છે. આ સ્થિતિ વચ્ચે ભારતીય મૂળના કર્મચારીઓના યોગદાનને ધ્યાનમાં રાખીને ઇન્ડિયાસ્પોરાએ ચિંતા વ્યક્ત કરી છે. સંગઠનનું કહેવું છે કે ભારતીય કર્મચારીઓને નિશાન બનાવવાથી અમેરિકાની કંપનીઓ અને અર્થવ્યવસ્થાને નુકસાન થઈ શકે છે.

અમેરિકાની અર્થવ્યવસ્થામાં ભારતીયોનું મોટું યોગદાન

ભારતમાંથી અમેરિકા ગયેલા હજારો પ્રોફેશનલ્સ ટેક્નોલોજી, હેલ્થકેર અને શિક્ષણ જેવા ક્ષેત્રોમાં કામ કરી રહ્યા છે. તેમની કુશળતાથી અમેરિકાની કંપનીઓને ફાયદો થયો છે અને નવી ટેક્નોલોજી વિકસાવવામાં પણ મદદ મળી છે. ભારતીય કર્મચારીઓ અમેરિકાની અર્થવ્યવસ્થામાં અબજો ડોલરનું યોગદાન આપી રહ્યા છે. ઇન્ડિયાસ્પોરાનું કહેવું છે કે આ કર્મચારીઓને પાછા મોકલવાથી માત્ર કંપનીઓને જ નહીં પરંતુ અમેરિકાના મોટા શહેરોથી લઈને નાના વિસ્તારોમાં રહેતા લોકોને પણ અસર થશે.

H-1B વિઝાના નવા નિયમોથી કંપનીઓ પર વધશે ખર્ચ

H-1B વિઝાને લઈને જે નવા પ્રસ્તાવો ચર્ચામાં છે તેમાં હાઈટેક અને હેલ્થકેર કંપનીઓ પાસેથી 1 લાખ ડોલરથી વધુ ફી લેવાની વાત સામેલ છે. જો આવો નિયમ લાગુ થાય તો વિદેશી કર્મચારીઓને નોકરી પર રાખતી કંપનીઓનો ખર્ચ વધી શકે છે. ખાસ કરીને નાની કંપનીઓ અને હેલ્થકેર સંસ્થાઓ માટે આ મોટો પડકાર બની શકે છે. આ ઉપરાંત વિઝા આપવાની લોટરી સિસ્ટમના બદલે કર્મચારીઓના પગારના આધારે વિઝા આપવાની પદ્ધતિ લાવવાની પણ ચર્ચા છે. તેનાથી ઓછા પગાર પર કામ કરતા કુશળ વિદેશી કર્મચારીઓ માટે મુશ્કેલી ઊભી થઈ શકે છે.

નોકરી છૂટે તો 60 દિવસનો સમય અને H-4 વર્ક પરમિટ પર પણ ચિંતા

હાલના નિયમો પ્રમાણે H-1B વિઝા પર કામ કરતા કર્મચારીની નોકરી છૂટી જાય તો તેને નવી નોકરી શોધવા અથવા અન્ય યોગ્ય વિકલ્પ પસંદ કરવા માટે સામાન્ય રીતે 60 દિવસનો સમય મળે છે. નવા પ્રસ્તાવોમાં આ સમય મર્યાદા દૂર કરવાની વાતને લઈને પણ ચિંતા વ્યક્ત કરવામાં આવી છે. જો આવો ફેરફાર થાય તો નોકરી ગુમાવનારા વિદેશી કર્મચારીઓની મુશ્કેલી વધી શકે છે.આ ઉપરાંત H-1B વિઝાધારકોના જીવનસાથીને મળતા H-4 વર્ક પરમિટ (EAD) પર પણ નિયંત્રણો લાવવાની ચર્ચા છે. આ પરમિટના કારણે ઘણા જીવનસાથી અમેરિકામાં કાયદેસર રીતે નોકરી કરી શકે છે. તેને રોકવામાં આવે તો અનેક ભારતીય પરિવારોની આવક પર અસર થઈ શકે છે.

આ પણ વાંચોઃ Amazon-Flipkart પર એક જ ફોનની કિંમત અલગ કેમ? ખરીદી પહેલાં આ રીતે સરખાવો ભાવ અને મેળવો સૌથી સસ્તી ડીલ!

OPT અને STEM વિઝા નિયમોમાં ફેરફારથી વિદ્યાર્થીઓને પણ અસર

અમેરિકામાં અભ્યાસ કરતા વિદેશી વિદ્યાર્થીઓ માટે OPT એટલે કે Optional Practical Trainingની સુવિધા ઘણી ઉપયોગી છે. તેના દ્વારા વિદ્યાર્થીઓ અભ્યાસ પૂરો કર્યા પછી પોતાના ક્ષેત્રમાં કામ કરવાનો અનુભવ મેળવી શકે છે. STEM ક્ષેત્રના વિદ્યાર્થીઓને આ સુવિધા હેઠળ વધારાનો સમય પણ મળે છે.હવે OPT અને STEM એક્સટેન્શન પર 70,000 ડોલર સુધીની ફી લગાવવાની દરખાસ્ત અંગે પણ ચિંતા વ્યક્ત કરવામાં આવી છે. જો આવી ફી લાગુ કરવામાં આવે તો અમેરિકામાં અભ્યાસ કરવા અને ત્યારબાદ નોકરી મેળવવા ઇચ્છતા ભારતીય વિદ્યાર્થીઓ પર આર્થિક બોજ વધી શકે છે.

નાના શહેરો અને ગ્રામ્ય વિસ્તારોમાં ડોક્ટરોની અછત વધવાનો ડર

અમેરિકાના ઘણા નાના શહેરો અને ગ્રામ્ય વિસ્તારોમાં ડોક્ટરો અને શિક્ષકોની અછત છે. આ વિસ્તારોમાં સ્થાનિક સ્તરે પૂરતા કુશળ કર્મચારીઓ મળતા નથી. આવી સ્થિતિમાં ભારત સહિત અન્ય દેશોમાંથી આવેલા પ્રોફેશનલ્સ ત્યાં જઈને પોતાની સેવાઓ આપે છે. ખાસ કરીને હેલ્થકેર ક્ષેત્રમાં વિદેશી ડોક્ટરોનું યોગદાન ઘણું ઉપયોગી છે.જો H-1B વિઝાના નિયમો વધુ કડક કરવામાં આવે અને વિદેશી કર્મચારીઓની ભરતી મુશ્કેલ બને તો આ વિસ્તારોમાં ડોક્ટરો અને શિક્ષકોની અછત વધી શકે છે. તેની સીધી અસર સ્થાનિક લોકોને મળતી આરોગ્ય અને શિક્ષણની સુવિધાઓ પર પડી શકે છે.

અમેરિકાને જ પડી શકે છે મોટો ફટકો

ઇન્ડિયાસ્પોરાએ 30 ઓક્ટોબરે જાહેર કરેલા નિવેદનમાં જણાવ્યું છે કે ભારતીય H-1B કર્મચારીઓએ અમેરિકાને નવી ટેક્નોલોજી અને ઇનોવેશનના ક્ષેત્રમાં આગળ વધારવામાં મદદ કરી છે. તેમને દેશમાંથી પાછા મોકલવાથી અમેરિકાની કંપનીઓ, સ્થાનિક સમુદાયો અને અર્થવ્યવસ્થાને નુકસાન થઈ શકે છે. સંગઠનના મતે વિદેશી કર્મચારીઓને નિશાન બનાવવાને બદલે તેમની કુશળતાનો લાભ લેવો જોઈએ. કારણ કે ભારતીય પ્રોફેશનલ્સ અમેરિકાના વિકાસમાં લાંબા સમયથી યોગદાન આપી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ