વિશ્વ / ઈરાનમાં 5ની તીવ્રતાનો ભૂકંપ, બુશેહર ન્યુક્લિયર સેન્ટર નજીક કેન્દ્રબિંદુ નોંધાતાં ચિંતા વધી!

એક તરફ ઈરાન અને અમેરિકા વચ્ચે તણાવની સ્થિતિ છે, તો બીજી તરફ દક્ષિણ ઈરાનમાં વહેલી સવારે ધરતી ધ્રૂજતાં અનેક સવાલો ઊભા થયા છે. ઈરાનના બુશેહર વિસ્તારમાં ભૂકંપના જોરદાર આંચકા અનુભવાયા હતા. આ ભૂકંપની તીવ્રતા રિક્ટર સ્કેલ પર 5.0 નોંધાઈ હતી. ખાસ વાત એ છે કે બુશેહર વિસ્તારમાં ઈરાનનું એકમાત્ર સક્રિય પરમાણુ કેન્દ્ર આવેલું છે. આથી અમેરિકાના નવા હુમલાની ધમકીઓ વચ્ચે ભૂકંપ આવતાં તેની પાછળ કોઈ અન્ય કારણ તો નથી ને તેવી અટકળો પણ શરૂ થઈ ગઈ છે. જોકે, પ્રાથમિક અહેવાલો મુજબ આ ભૂકંપ કુદરતી હોવાનું માનવામાં આવે છે.

US જિયોલોજિકલ સર્વે (USGS)ના અહેવાલ મુજબ, સ્થાનિક સમય અનુસાર વહેલી સવારે દક્ષિણ ઈરાનમાં ભૂકંપ આવ્યો હતો. ભૂકંપનું કેન્દ્ર બુશેહર શહેરથી આશરે 115 કિલોમીટર દક્ષિણપૂર્વમાં નોંધાયું હતું. જ્યારે તેની ઊંડાઈ જમીનથી આશરે 10 કિલોમીટર નીચે હતી. ભૂકંપની ઊંડાઈ ઓછી હોવાથી આસપાસના વિસ્તારોમાં પણ તેના આંચકા અનુભવાયા હોવાની શક્યતા છે. ભૂકંપના કારણે વિસ્તારમાં અફડાતફડીનો માહોલ સર્જાયો હતો.

કુદરતી આફત વચ્ચે રાહતના સમાચાર પણ સામે આવ્યા

જોકે, આ કુદરતી આફત વચ્ચે રાહતના સમાચાર પણ સામે આવ્યા છે. અત્યાર સુધી મળેલી માહિતી પ્રમાણે ભૂકંપને કારણે કોઈ જાનહાનિ કે ઈજાના અહેવાલ નથી. આ ઉપરાંત કોઈ મોટા નુકસાનની પણ જાણકારી મળી નથી. ખાસ કરીને પરમાણુ કેન્દ્રની નજીક ભૂકંપ આવતાં તેની સુરક્ષા અને સંભવિત અસર અંગે પણ લોકોમાં ચર્ચા શરૂ થઈ છે. જોકે, હાલના અહેવાલોમાં પરમાણુ કેન્દ્રને કોઈ નુકસાન થયું હોવાની પુષ્ટિ કરવામાં આવી નથી.

બુશેહર વિસ્તાર કેમ છે આટલો મહત્વપૂર્ણ?

ઈરાનનો દક્ષિણ વિસ્તાર ભૂકંપની દૃષ્ટિએ ખૂબ જ સંવેદનશીલ માનવામાં આવે છે. અહીં પૃથ્વીની અંદર થતી ટેક્ટોનિક પ્લેટોની હિલચાલને કારણે અવારનવાર નાના-મોટા ભૂકંપ આવતા રહે છે. અહેવાલો અનુસાર, આ વિસ્તારમાં દરરોજ ડઝનબંધ નાના ભૂકંપ નોંધાય છે. જોકે, આમાંથી મોટાભાગના ભૂકંપ એટલા હળવા હોય છે કે સામાન્ય લોકોને તેમના આંચકા અનુભવાતા નથી. પરંતુ આધુનિક ભૂકંપ માપવાના સાધનો દ્વારા આવા આંચકાઓ પણ નોંધવામાં આવે છે.

ઈરાનનું એકમાત્ર સક્રિય પરમાણુ કેન્દ્ર આવેલું

બુશેહર વિસ્તાર માત્ર ભૂકંપની સંવેદનશીલતાને કારણે જ નહીં, પરંતુ ઈરાનના પરમાણુ કાર્યક્રમને કારણે પણ મહત્વપૂર્ણ છે. અહીં ઈરાનનું એકમાત્ર સક્રિય પરમાણુ કેન્દ્ર આવેલું છે. આથી આ વિસ્તારમાં થતી કોઈપણ કુદરતી કે અન્ય અસામાન્ય ઘટનાને આંતરરાષ્ટ્રીય સ્તરે પણ મહત્વ આપવામાં આવે છે. ભૂકંપ બાદ અમેરિકાની હુમલાની ધમકીઓ સાથે તેને જોડીને અટકળો શરૂ થઈ હતી, પરંતુ ભૂકંપ અને કોઈ સંભવિત હુમલા વચ્ચે સંબંધ હોવાના કોઈ પુરાવા સામે આવ્યા નથી.

ટેક્ટોનિક પ્લેટોની હિલચાલથી આવે છે ભૂકંપ

ભૂસ્તરશાસ્ત્રીઓના મતે, પૃથ્વીની સપાટી અનેક મોટી અને નાની ટેક્ટોનિક પ્લેટોથી બનેલી છે. આ પ્લેટો સતત ગતિ કરતી રહે છે. જ્યારે બે પ્લેટો એકબીજા સાથે અથડાય છે અથવા એકબીજાથી દૂર ખસે છે ત્યારે પૃથ્વીની અંદર ઊર્જા ઉત્પન્ન થાય છે. આ ઊર્જા અચાનક બહાર નીકળે ત્યારે જમીનમાં કંપન થાય છે, જેને આપણે ભૂકંપ તરીકે ઓળખીએ છીએ.

આ પણ વાંચો : ભારતના પાડોશી દેશમાં મળી 50 મોટી ખાણો જેટલી સોનાની સંપત્તિ, સર્વેમાં સોના, નિકલ-રેનિયમના ભંડારમાં મોટો વધારો!

દક્ષિણ ઈરાનમાં ભૂકંપ આવવાનું મુખ્ય કારણ પણ આ પ્રકારની ભૂગર્ભીય હિલચાલ હોવાનું માનવામાં આવે છે. અગાઉ પણ આ વિસ્તારમાં અનેક ભૂકંપ નોંધાઈ ચૂક્યા છે. હાલમાં 5.0ની તીવ્રતાના ભૂકંપ બાદ કોઈ મોટા ખતરા કે જાનમાલના નુકસાનની પુષ્ટિ થઈ નથી. જોકે, પરમાણુ કેન્દ્ર નજીક ભૂકંપ આવ્યો હોવાથી ભવિષ્યમાં કોઈ સંભવિત અસર કે ખલેલ ઊભી ન થાય તે માટે પરિસ્થિતિ પર સતત નજર રાખવી જરૂરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ