વિશ્વ / ભારતના પાડોશી દેશમાં મળી 50 મોટી ખાણો જેટલી સોનાની સંપત્તિ, સર્વેમાં સોના, નિકલ-રેનિયમના ભંડારમાં મોટો વધારો!

ચીનને સોનું, નિકલ અને રેનિયમ સહિત અનેક દુર્લભ તેમજ કિંમતી ધાતુઓનો વિશાળ ભંડાર પ્રાપ્ત થયો છે. દેશભરમાં આવેલા ખનિજ ભંડારોની નવેસરથી હાથ ધરાયેલી ચકાસણી અને મૂલ્યાંકન બાદ ચીનની વ્યૂહાત્મક સંસાધન ક્ષમતામાં ભારે ઉછાળો નોંધાયો છે. ચીનના કુદરતી સંસાધન મંત્રાલય દ્વારા જાહેર કરવામાં આવેલા આંકડા દર્શાવે છે કે આ નવી શોધખોળે દેશની ખનિજ સમૃદ્ધિમાં અનેક ગણો વધારો કર્યો છે.

સોનાથી લઈને રેનિયમના ભંડારમાં રેકોર્ડબ્રેક વધારો

મંત્રાલયના આંકડા અનુસાર, ચીન પાસે ઉપલબ્ધ રેનિયમના ભંડારમાં 200% થી વધુનો વધારો નોંધાયો છે. રેનિયમ એ કોઈ સામાન્ય ધાતુ નથી, પરંતુ તેનો ઉપયોગ અત્યંત ઊંચું તાપમાન સહન કરી શકે તેવા સુપર-એલોય બનાવવામાં થાય છે, જે જેટ એન્જિનના મહત્વના સ્પેરપાર્ટ્સ તૈયાર કરવામાં કામ આવે છે. તેમજ સોનાના ભંડારમાં થયેલો વધારો 50 વિશાળ ખાણોના કુલ ઉત્પાદન સમકક્ષ છે. નિકલના કિસ્સામાં પણ ચીનને મોટી સફળતા સાંપડી છે અને તેના ભંડારમાં 30 મોટી ખાણો જેટલો ઉમેરો થયો છે. આ ઉપરાંત ગેલિયમ, ઈન્ડિયમ, ટેન્ટલમ અને વેનેડિયમના ભંડારોમાં પણ 10-10 મોટી ખાણો જેટલો વધારો થયો છે. અગાઉ જે ખાણોને ઓછી ગુણવત્તાવાળી અથવા ઉપયોગમાં લેવા માટે જટિલ માનવામાં આવતી હતી, તેની પુનઃ ચકાસણી કરવાથી આ અદ્ભુત સફળતા પ્રાપ્ત થઈ છે.

એક વર્ષ લાંબુ અભિયાન: 1800 થી વધુ ખાણોની ગહન તપાસ

આ સઘન પ્રોજેક્ટ સમગ્ર એક વર્ષ સુધી ચાલ્યો હતો, જેમાં ચીનના 17 વ્યૂહાત્મક ખનિજો પર સંપૂર્ણ ધ્યાન કેન્દ્રિત કરવામાં આવ્યું હતું. આ સમયગાળા દરમિયાન દેશભરમાં કાર્યરત 1,800 થી વધુ ખાણો તેમજ નાના-મોટા ખનન વિસ્તારોની બારીકાઈથી તપાસ કરવામાં આવી હતી. આ વિશાળ અભિયાનને પૂર્ણ કરવા માટે 100 થી વધુ સંસ્થાઓએ સંયુક્ત રીતે કાર્ય કર્યું હતું. ચીનના 27 પ્રાંતો, સ્વાયત્ત વિસ્તારો અને મહાનગરપાલિકાઓમાં અંદાજે 2,000 જેટલા સરવેક્ષણ કર્મચારીઓએ દિવસ-રાત મહેનત કરીને આ આંકડા એકત્રિત કર્યા છે. જૂની ખાણોમાં દબાયેલી ઉપપેદાશોના નવા મૂલ્યાંકનને પરિણામે જ આટલો મોટો ખજાનો સામે આવી શક્યો છે.

આ પણ વાંચોઃ National / ''SIR પ્રક્રિયા પૂર્ણ થવાનો અર્થ એ નથી કે...'', સુપ્રીમ કોર્ટનું સ્પષ્ટીકરણ

શિનજિયાંગમાં નવી શોધથી વિદેશો પર નિર્ભરતા ઘટશે

આ રાષ્ટ્રવ્યાપી તપાસ ઉપરાંત ચીનને વધુ એક સંપૂર્ણપણે નવી સફળતા પણ સાંપડી છે. શિનજિયાંગ પ્રાંતના બાયચેંગ વિસ્તારમાં દેશનો પ્રથમ 'પેલીયોફ્લુવિયલ-લેકુસ્ટ્રિન જિર્કોન પ્લેસર' (પ્રાચીન નદી કે સરોવરના તળિયે જમા થયેલું જિર્કોન) ભંડાર શોધી કાઢવામાં આવ્યો છે. આ નવી શોધથી ચીનમાં જિર્કોનનો ઘરેલું પુરવઠો નોંધપાત્ર રીતે વધી શકે તેમ છે. ચીન લાંબા સમયથી જિર્કોનની આયાત માટે અન્ય દેશો પર વધુ પડતું નિર્ભર રહ્યું છે. જિર્કોન એ એવું ખનિજ છે જેમાંથી જિર્કોનિયમ મેળવવામાં આવે છે. આ જિર્કોનિયમનો ઉપયોગ અણુ રિએક્ટરની ફ્યુઅલ-રોડ કવરિંગ બનાવવામાં થાય છે અને ઊંચું તાપમાન સહન કરતા એરોસ્પેસ એલોયના ઉત્પાદનમાં પણ તે અત્યંત ઉપયોગી સાબિત થાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ