ગુજરાત / દિવાળીની ખરીદી કરવા અમદાવાદના બજારોમાં જાઓ છો તો સાવધાન! ટાબરિયા, મહિલા અને બ્લેડ ગેંગનો ખતરો

દિવાળીને હવે ગણતરીના દિવસો બાકી રહ્યા છે ત્યારે અમદાવાદનાં બજારોમાં ખરીદીની રોનક જામવા લાગી છે. ખાસ કરીને દિવાળી પહેલાં આવતા શનિવાર અને રવિવારે બજારોમાં સૌથી વધુ ભીડ ઊમટવાની છે. નોકરી કરતા લોકો પગાર અને બોનસ મળ્યા બાદ પરિવાર સાથે ખરીદી કરવા નીકળશે. લાલ દરવાજા, રતનપોળ, ઢાલગરવાડ અને માણેકચોક સહિતનાં બજારોમાં પગ મૂકવાની જગ્યા નહીં રહે તેવી સ્થિતિ સર્જાશે, જોકે ખરીદીના આ ધમધમાટ વચ્ચે તસ્કર ટોળકીઓ પણ સક્રિય થઈ ગઈ છે. લોકોના હરખ પર પાણી ફેરવવા માટે ટાબરિયા ગેંગ, મહિલા ગેંગ, બ્લેડ ગેંગ અને ખિસ્સાકાતરુઓએ બજારમાં એન્ટ્રી મારી દીધી છે.

બજારમાં ભીડ વધવાની સાથે જ ચોર ટોળકીઓ માટે ચોરી કરવાની તક ઊભી થાય છે. ગ્રાહક બનીને બજારમાં પ્રવેશતી આ ટોળકીઓ લોકોની નજર ચૂકવીને પર્સ, મોબાઈલ, રોકડ રકમ અને કીમતી વસ્તુઓની ચોરી કરી જાય છે.

ટાબરિયા ગેંગઃ બાળકોને ચોરીની ખાસ તાલીમ અપાય છે

બજારમાં સક્રિય થતી ટાબરિયા ગેંગ ચોરી કરવા માટે બાળકોનો ઉપયોગ કરે છે. ભીડમાં નાનાં બાળકો સરળતાથી લોકો વચ્ચે ઘૂસી જાય છે અને કોઈને શંકા પણ જતી નથી. આ બાળકોને મોબાઈલ, પર્સ અને રોકડ રકમની ચોરી કરવાની ખાસ તાલીમ આપવામાં આવતી હોવાની વિગતો સામે આવે છે.

• - ભીડમાં ખરીદી કરતા ગ્રાહકોને ટાર્ગેટ કરવામાં આવે છે
• - મહિલાઓના પર્સ અને ખરીદીની થેલીઓમાંથી રોકડ કે મોબાઈલ કાઢી લેવામાં આવે છે
• - ચોરી કર્યા બાદ બાળક તરત જ ગેંગના અન્ય સભ્યને સામાન સોંપી દે છે
• - બાળકોનો ઉપયોગ થતો હોવાથી પોલીસ માટે સમગ્ર ટોળકી સુધી પહોંચવું પડકારરૂપ બને છે
• મહિલા ગેંગઃ ગ્રાહક બનીને આવે અને પર્સ સાફ કરી જાય
• - દુકાનમાં ખરીદી કરતી મહિલાઓને ટાર્ગેટ બનાવે છે
• - પર્સ ખુલ્લું હોય અથવા કાઉન્ટર પર મૂકેલું હોય ત્યારે ચોરી કરે છે
• - એક મહિલા ધ્યાન ભટકાવે છે, બીજી મહિલા પર્સમાંથી રોકડ રકમ કાઢી લે છે.
• - ચોરી કર્યા બાદ ભીડનો લાભ લઈને અલગ અલગ દિશામાં નીકળી જાય છે
• બ્લેડ ગેંગઃ થેલી કાપીને કીમતી સામાનની ચોરી કરે છે

ખરીદી માટે નીકળેલા લોકોની થેલી અને પર્સ પણ તસ્કરોના નિશાના પર હોય છે. બ્લેડ ગેંગના સભ્યો ભીડમાં ગ્રાહકોની પાછળ રહીને તેમની થેલી કે પર્સને બ્લેડથી કાપી નાખે છે. થેલીમાં રહેલી રોકડ કે કીમતી વસ્તુઓ કાઢી લઈને ગેંગના અન્ય સભ્યો ફરાર થઈ જાય છે. ઘણી વખત ગ્રાહકને ખરીદી પૂરી થયા પછી જ ચોરીની જાણ થાય છે.

ખિસ્સાકાતરુ અને મોબાઈલ ચોર પણ સક્રિય બને છે

બજારમાં ખરીદીમાં વ્યસ્ત લોકોના ખિસ્સામાંથી મોબાઈલ અને પાકીટ સેરવી લેતી ગેંગ પણ સક્રિય થાય છે. ખાસ કરીને ભીડમાં ધક્કામુક્કી થાય ત્યારે તસ્કરો તકનો લાભ લે છે. આ ઉપરાંત રસ્તા પર મોબાઈલમાં વાત કરતા લોકોના હાથમાંથી મોબાઈલ આંચકીને બાઈક પર ફરાર થતી ટોળકીઓ પણ લોકો માટે જોખમરૂપ બને છે.

અમદાવાદમાં આવેલાં ખરીદી માટેનાં મુખ્ય બજારો

દિવાળીના તહેવારમાં શહેરનાં કેટલાંક પરંપરાગત બજારોમાં ભારે ભીડ જોવા મળે છે. આ બજારોમાં ખરીદી કરવા માટે દૂર-દૂરથી લોકો આવે છે.

• - લાલ દરવાજા અને ભદ્ર બજાર: કપડાં, ચંપલ, બેગ અને ઘરવખરીની વસ્તુઓ માટે જાણીતું
• - રતનપોળ: સાડી, ચણિયાચોળી અને પરંપરાગત વસ્ત્રોની ખરીદીનું મુખ્ય કેન્દ્ર
• - ઢાલગરવાડ: કાપડ, ડ્રેસ મટીરિયલ અને બાંધણીની ખરીદી માટે પ્રખ્યાત
• - માણેકચોક અને રાણીનો હજીરો: સોના-ચાંદી અને ઇમિટેશન જ્વેલરીની ખરીદી માટે જાણીતાં
• - લો ગાર્ડન: ચણિયાચોળી, હે‌િન્ડક્રાફ્ટ અને ઓક્સિડાઇઝ્ડ જ્વેલરી માટે લોકપ્રિય
• - રિલીફ રોડ અને ત્રણ દરવાજા: ઇલેક્ટ્રોનિક્સ, ઘડિયાળ અને દિવાળીની પૂજા સામગ્રી માટે જાણીતાં
• - બાપુનગર અને રાયપુર: કપડાં અને ફટાકડાની ખરીદી માટે લોકોની ભીડ ઊમટે છે

પોલીસે ‘મોક ચોરી’થી લોકોને જાગૃત કર્યા

દિવાળીના તહેવાર દરમિયાન બજારોમાં ચોરીની ઘટનાઓ અટકાવવા પોલીસ દ્વારા લોકોને જાગૃત કરવાની કવાયત પણ કરવામાં આવે છે. કારંજ પોલીસ દ્વારા અગાઉ બજારમાં મોક ચોરી એટલે કે નકલી ચોરીનું આયોજન કરીને લોકોને બતાવવામાં આવ્યું હતું કે ભીડમાં કેવી રીતે તસ્કરો નજર ચૂકવીને સામાન ચોરી જાય છે. આ પ્રયોગનો હેતુ લોકોને પોતાની વસ્તુઓની સુરક્ષા અંગે સાવચેત કરવાનો છે.

• ખરીદી કરવા જાઓ ત્યારે આટલી તકેદારી રાખજો
• - મોટી રોકડ રકમ એક જ પર્સમાં રાખવાનું ટાળવું
• - પર્સ અને મોબાઈલ હંમેશાં પોતાની નજર સામે રાખવાં
• - ખરીદી દરમિયાન પર્સ દુકાનના કાઉન્ટર પર મૂકીને ભૂલી ન જાઓ
• - ઝીપરવાળી મજબૂત બેગનો ઉપયોગ કરવો
• - ભીડમાં અજાણ્યા લોકો સાથે ધક્કામુક્કી થાય તો સાવચેત રહેવું
• - બાળકોને પોતાની નજરથી દૂર ન જવા દેવાં
• - વાહનમાં ખરીદીનો સામાન ખુલ્લો મૂકીને જવું નહીં

આ પણ વાંચો : HSRP નંબર પ્લેટ લગાવવાના નિયમો તોડનારા વાહન ડીલર્સની ખેર નહીં! રાજ્યભરમાં RTOની ઓચિંતી તપાસ

દિવાળીમાં તસ્કરો ચોરી કરે નહીં તે માટે બજારમાં વોચ ટાવર ઊભા કરાયા છે, જેમાં પોલીસ કર્મચારી તમામ ગતિવિધિ પર નજર રાખશે. બજારમાં પ્રવેશવાના દ્વાર અને નીકળવાના રસ્તા પર પોલીસ તહેનાત રહેશે. આ ઉપરાંત ચોરી ન થાય તે માટે પોલીસ દ્વારા માઈક પર સતત એનાઉન્સમેન્ટ કરવામાં આવશે, બીજી તરફ પોલીસ દ્વારા ગ્રાહક બનીને ચોર ટોળકીઓ પર નજર રખાશે. ભરતકુમાર રાઠોડ, ઝોન-ર, ડીસીપી

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ