National / કેન્દ્ર સરકારનો મોટો નિર્ણય, સરકારી કર્મચારીઓના મોંઘવારી ભથ્થામાં વધારાની જાહેરાત

મોંઘવારીના માર વચ્ચે કેન્દ્ર સરકારના લાખો કર્મચારીઓ અને પેન્શનરો માટે એક મોટી ખુશખબર સામે આવી છે. લાંબા સમયથી મોંઘવારી ભથ્થામાં વધારાની રાહ જોઈ રહેલા કર્મચારીઓ માટે સરકારે મહત્વનો નિર્ણય લીધો છે. કેન્દ્ર સરકારે મોંઘવારી ભથ્થા (DA)માં 3 ટકાનો વધારો મંજૂર કર્યો છે. આ નિર્ણય બાદ કર્મચારીઓનું મોંઘવારી ભથ્થું 60 ટકાથી વધીને 63 ટકા થયું છે. જોકે, સૌથી મોટો સવાલ એ છે કે આ વધારાથી કર્મચારીઓના પગારમાં દર મહિને કેટલા રૂપિયા વધશે અને નવા દરનો લાભ ક્યારથી મળશે?

કેન્દ્ર સરકારના આ નિર્ણયથી 55 લાખથી વધુ કેન્દ્રીય કર્મચારીઓ અને આશરે 69 લાખ પેન્શનરોને ફાયદો થશે. મોંઘવારી ભથ્થામાં વધારો થવાથી કર્મચારીઓના માસિક પગારમાં વધારો થશે, જ્યારે પેન્શનરોને મોંઘવારી રાહત (DR)નો લાભ મળશે. ખાસ કરીને વધતી મોંઘવારી વચ્ચે આ નિર્ણય કર્મચારીઓ અને પેન્શનરો માટે આર્થિક રાહત આપનારો સાબિત થઈ શકે છે.

DA વધ્યા બાદ કર્મચારીઓનો પગાર કેટલો વધશે?

કેન્દ્ર સરકારે મોંઘવારી ભથ્થામાં 3 ટકાનો વધારો કરતાં DAનો દર 60 ટકાથી વધીને 63 ટકા થયો છે. આ વધારાથી કર્મચારીઓના મૂળ પગારના આધારે દર મહિને ₹540થી ₹3,000 કે તેથી વધુનો ફાયદો થશે. જે કર્મચારીનો મૂળ પગાર જેટલો વધારે હશે, તેના મોંઘવારી ભથ્થામાં પણ એટલો વધારે વધારો થશે. ઉદાહરણ તરીકે, જે કર્મચારીનો મૂળ પગાર ₹18,000 છે, તેને દર મહિને વધારાના ₹540 મળશે. જ્યારે ₹25,000નો મૂળ પગાર ધરાવતા કર્મચારીને દર મહિને ₹750નો ફાયદો થશે. તેવી જ રીતે ₹50,000નો મૂળ પગાર ધરાવતા કર્મચારીને દર મહિને ₹1,500 અને ₹1 લાખનો મૂળ પગાર ધરાવતા કર્મચારીને દર મહિને વધારાના ₹3,000 મળશે. આ વધારો કર્મચારીઓના મૂળ પગાર પર ગણવામાં આવશે.

અગાઉ કેન્દ્રીય કર્મચારીઓને કેટલું DA મળતું હતું?

કેન્દ્ર સરકારના કર્મચારીઓને અત્યાર સુધી તેમના મૂળ પગારના 60 ટકા મોંઘવારી ભથ્થું આપવામાં આવતું હતું. 18 એપ્રિલ, 2026ના રોજ નાણા મંત્રાલયના પ્રકાશન મુજબ, કેન્દ્રીય મંત્રીમંડળે મોંઘવારી ભથ્થામાં 2 ટકાના વધારાને મંજૂરી આપી હતી. આ વધારો 1 જાન્યુઆરી, 2026થી અમલમાં આવ્યો હતો. જેના કારણે DAનો દર 58 ટકાથી વધીને 60 ટકા થયો હતો. હવે નવા 3 ટકાના વધારાને મંજૂરી મળતાં મોંઘવારી ભથ્થાનો દર 63 ટકા થયો છે.

વર્ષમાં બે વખત DAમાં કરવામાં આવે છે સુધારો

કેન્દ્ર સરકારના કર્મચારીઓ અને પેન્શનરોને વર્ષમાં બે વખત મોંઘવારી ભથ્થા અને મોંઘવારી રાહતમાં સુધારાનો લાભ આપવામાં આવે છે. સામાન્ય રીતે આ સુધારા જાન્યુઆરી અને જુલાઈ મહિનાથી અસરકારક હોય છે. મોંઘવારીના દરને ધ્યાનમાં રાખીને સરકાર DA અને DRમાં વધારો કરે છે. તેનો મુખ્ય હેતુ વધતી મોંઘવારીને કારણે કર્મચારીઓ અને પેન્શનરો પર પડતા આર્થિક બોજને ઘટાડવાનો છે. નવા 63 ટકા દરની ચોક્કસ અમલી તારીખ અંગે સત્તાવાર આદેશમાં સ્પષ્ટતા થવી જરૂરી છે.

મોંઘવારી ભથ્થું એટલે શું?

મોંઘવારી ભથ્થું એટલે કે DA એ કેન્દ્ર સરકારના કર્મચારીઓને તેમના મૂળ પગાર ઉપરાંત આપવામાં આવતું વધારાનું ભથ્થું છે. તેનો મુખ્ય હેતુ મોંઘવારીને કારણે વધતા ખર્ચ સામે કર્મચારીઓને આર્થિક મદદ કરવાનો છે. DAની ગણતરી કર્મચારીના મૂળ પગારની ટકાવારીના આધારે કરવામાં આવે છે. જ્યારે DAમાં વધારો થાય છે, ત્યારે કર્મચારીના કુલ માસિક પગારમાં પણ વધારો થાય છે.

આ પણ વાંચો : વારાસણીમાં જ ભાજપની હાર, જીતેલા ઉમેદવારનું નામ ચોંકાવનારુ, જાણો MLC ચૂંટણીનું રિઝલ્ટ

બીજી તરફ, નિવૃત્ત કર્મચારીઓને મોંઘવારી રાહત એટલે કે DR આપવામાં આવે છે. મોંઘવારી રાહતમાં વધારો થવાથી પેન્શનરોને મળતી માસિક પેન્શનની રકમમાં પણ વધારો થાય છે. આ ઉપરાંત નવા દર કઈ તારીખથી અમલમાં આવે છે તેના આધારે કર્મચારીઓ અને પેન્શનરોને અગાઉના મહિનાની બાકી રકમ એટલે કે એરિયર્સનો લાભ પણ મળી શકે છે. આમ, મોંઘવારી ભથ્થામાં 3 ટકાનો વધારો લાખો પરિવારો માટે રાહતના સમાચાર લઈને આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ