ગુજરાત / વલસાડમાં રૂપિયા ડબલ કરવાની અને રૂપિયાનો વરસાદ કરવાની લાલચ આપી વૃદ્ધ સાથે ₹19 લાખથી વધુની છેતરપિંડી

ચમત્કારથી રૂપિયાનો વરસાદ થશે, માતાજીની કૃપા વરસશે અને તમે રોકેલા પૈસા ડબલ થઈ જશે... આવી લોભામણી વાતો સાંભળીને જો કોઈ વ્યક્તિ પોતાની જીવનભરની કમાણી ગુમાવી બેસે તો? આજના આધુનિક યુગમાં પણ અંધશ્રદ્ધા અને લાલચનો ફાયદો ઉઠાવીને લોકોને છેતરતી ટોળકીઓ સક્રિય છે. વલસાડ જિલ્લામાં આવી જ એક ચોંકાવનારી ઘટના સામે આવી છે, જેમાં 76 વર્ષના એક વૃદ્ધને નકલી અઘોરી બાબાઓની ગેંગે પોતાની જાળમાં ફસાવીને 19 લાખ રૂપિયાથી વધુની છેતરપિંડી કરી હતી. જોકે, આ મામલે વલસાડ સાયબર ક્રાઇમ પોલીસને મોટી સફળતા મળી છે અને ગેંગના માસ્ટરમાઇન્ડ સહિત ત્રણ આરોપીઓની ધરપકડ કરવામાં આવી છે.

પ્રાપ્ત માહિતી અનુસાર, વલસાડના એક વૃદ્ધને કેટલાક અજાણ્યા ઇસમોએ ઇન્ટરનેટના માધ્યમથી સંપર્ક કર્યો હતો. આ લોકોએ પોતે અઘોરી બાબા અને ગુરુજી હોવાની ઓળખ આપી હતી. તેમણે વૃદ્ધને એવી લાલચ આપી હતી કે તેમના પર માતાજીની કૃપા થશે અને તેઓ જે પણ રૂપિયા રોકશે તે ડબલ થઈ જશે. એટલું જ નહીં, રૂપિયાનો વરસાદ થવાની અને તાંત્રિક વિધિથી લાખો રૂપિયાનો ફાયદો થવાની વાતો કરીને વૃદ્ધને વિશ્વાસમાં લીધા હતા.

બેંક એકાઉન્ટ નંબર મોકલીને તેમાં રૂપિયા ટ્રાન્સફર કરાવ્યા

આરોપીઓએ વૃદ્ધને અલગ-અલગ બેંક એકાઉન્ટ નંબર મોકલીને તેમાં રૂપિયા ટ્રાન્સફર કરાવ્યા હતા. ધીમે ધીમે વૃદ્ધ પાસેથી ઓનલાઈન માધ્યમથી 19 લાખ રૂપિયાથી વધુની રકમ પડાવી લેવામાં આવી હતી. જોકે, ન તો રૂપિયાનો વરસાદ થયો કે ન તો રોકેલા પૈસા ડબલ થયા. આખરે પોતાની સાથે છેતરપિંડી થઈ હોવાનું સમજાતાં વૃદ્ધે વલસાડ સાયબર ક્રાઇમ પોલીસ સ્ટેશનમાં ફરિયાદ નોંધાવી હતી. આ ઘટનામાં વૃદ્ધ એટલા બધા આરોપીઓની વાતોમાં આવી ગયા હતા કે તેમણે પોતાના દીકરાને પણ આ અંગે જાણ કરી નહોતી.

મહીસાગરમાંથી ગેંગનો માસ્ટરમાઇન્ડ મહેબૂબ ઝડપાયો

વૃદ્ધની ફરિયાદ બાદ વલસાડ સાયબર ક્રાઇમ પોલીસ અને ઉમરગામ પોલીસ દ્વારા સંયુક્ત તપાસ હાથ ધરવામાં આવી હતી. તપાસ દરમિયાન પોલીસ મહીસાગર જિલ્લા સુધી પહોંચી હતી. અહીંથી મહેબૂબ નામના શખસની ધરપકડ કરવામાં આવી હતી. મહેબૂબ આ સમગ્ર ગેંગનો માસ્ટરમાઇન્ડ હોવાનું સામે આવ્યું છે. તેની ધરપકડ બાદ પોલીસે તેના અન્ય બે સાગરીતો સરફરાજ નાસીર ખાન અને નાસીર મિયાની પણ ધરપકડ કરી છે. આમ, પોલીસે નકલી અઘોરી બાબા બનીને લોકો સાથે છેતરપિંડી કરતી ગેંગના કુલ ત્રણ આરોપીઓને ઝડપી પાડ્યા છે.

ઓનલાઇન સંપર્ક કરી અઘોરી બાબા બનીને કરતા હતા ઠગાઈ

આરોપીઓની મોડસ ઓપરેન્ડી વિશે વાત કરીએ તો, તેઓ ઇન્ટરનેટના માધ્યમથી લોકોનો સંપર્ક કરતા હતા અને પોતે અઘોરી બાબા કે ગુરુજી હોવાની ઓળખ આપતા હતા. ત્યારબાદ લોકોને માતાજીની કૃપા થશે, તાંત્રિક વિધિથી ચમત્કાર થશે અને તમે રોકેલા રૂપિયા ડબલ થઈ જશે તેવી લાલચ આપતા હતા. ખાસ કરીને આર્થિક મુશ્કેલીમાં હોય તેવા અને વધુ નફાની આશા રાખતા લોકોને ટાર્ગેટ કરવામાં આવતા હતા.

અલગ-અલગ બેંક ખાતાઓમાં રૂપિયા ટ્રાન્સફર કરાવતા

આરોપીઓ લોકોનો વિશ્વાસ જીતીને અલગ-અલગ બેંક ખાતાઓમાં રૂપિયા ટ્રાન્સફર કરાવતા હતા. આ રીતે વૃદ્ધ પાસેથી પણ 19 લાખ રૂપિયાથી વધુની રકમ પડાવી લેવામાં આવી હતી. એપ્રિલ 2026માં બનેલી આ ઘટનામાં અગાઉ કેટલાક ઇસમો પકડાયા હતા, પરંતુ ગેંગનો મુખ્ય સૂત્રધાર મહેબૂબ હવે પોલીસના હાથે ઝડપાયો છે. હાલમાં મહેબૂબ અને તેના બંને સાગરીતો પોલીસ રિમાન્ડ પર છે. પોલીસની પૂછપરછમાં આ નકલી અઘોરીઓએ અન્ય કેટલા લોકો સાથે છેતરપિંડી કરી છે અને તેમની ગેંગમાં બીજા કેટલા લોકો સામેલ છે તે અંગે વધુ ખુલાસા થવાની શક્યતા છે.

29 એપ્રિલે નોંધાઈ હતી ફરિયાદ: પોલીસ અધિક્ષક એ.કે. વર્મા

આ સમગ્ર મામલે વલસાડ વિભાગના પોલીસ અધિક્ષક એ.કે. વર્માએ જણાવ્યું હતું કે, વલસાડ સાયબર ક્રાઇમ પોલીસ સ્ટેશનમાં 29 એપ્રિલ, 2026ના રોજ આ અંગે ગુનો નોંધવામાં આવ્યો હતો. ફરિયાદીના 76 વર્ષીય પિતાને અજાણ્યા ઇસમોએ ઇન્ટરનેટના માધ્યમથી અઘોરી બાબા અને ગુરુજીનું સ્વરૂપ ધારણ કરીને સંપર્ક કર્યો હતો. આરોપીઓએ તેમના પર માતાજીની કૃપા થશે અને તેઓ જે નાણાં રોકશે તે ડબલ થઈ જશે તેવી લાલચ આપી હતી. ત્યારબાદ બેંક એકાઉન્ટ નંબર મોકલીને તેમાં રૂપિયા ટ્રાન્સફર કરાવી છેતરપિંડી કરવામાં આવી હતી.

આરોપીઓ ખાસ કરીને વૃદ્ધ લોકોને ટાર્ગેટ કરતા

પોલીસ અધિક્ષક એ.કે. વર્માએ વધુમાં જણાવ્યું હતું કે, આરોપીઓ ખાસ કરીને વૃદ્ધ લોકોને ટાર્ગેટ કરતા હતા. તેમને વિશ્વાસમાં લઈને રોકાણ કરવા માટે લલચાવતા હતા અને ત્યારબાદ તેમના બેંક ખાતામાંથી રૂપિયા પડાવી લેતા હતા. આ કેસમાં ત્રણ આરોપીઓની ધરપકડ કરવામાં આવી છે અને તેમની પૂછપરછના આધારે વધુ તપાસ ચાલી રહી છે.

પોલીસની લોકોને અપીલ: ચમત્કારથી પૈસા ડબલ થતા નથી

પોલીસ અધિક્ષક એ.કે. વર્માએ લોકોને ખાસ અપીલ કરતાં જણાવ્યું હતું કે, કોઈપણ પ્રકારની તાંત્રિક વિધિથી રૂપિયા, ઘરેણાં કે અન્ય કોઈ વસ્તુ ડબલ થતી નથી. આવી તમામ વાતો ખોટી અને લોકોને છેતરવાની રીત છે. જ્યાં સુધી કોઈ બાબતની ખાતરી ન થાય ત્યાં સુધી આવા લોકોની વાતોમાં આવવું નહીં. કોઈના પર આંધળો વિશ્વાસ કરવો નહીં અને ચમત્કારના નામે કરવામાં આવતી લાલચથી દૂર રહેવું જોઈએ.

આ પણ વાંચો : રાજકોટની સરાઝા હોટલમાં LCBના દરોડા, બર્થડે પાર્ટીમાં ડોક્ટર્સ-બિલ્ડરો 76 લોકો સામેલ, જુઓ લિસ્ટ

ખાસ કરીને ટૂંકા સમયમાં રૂપિયા ડબલ થઈ જશે અથવા કોઈ વિધિથી લાખો રૂપિયાનો ફાયદો થશે તેવી લાલચમાં આવીને કોઈને પણ પૈસા ટ્રાન્સફર ન કરવા જોઈએ. આ ઘટનાએ ફરી એકવાર સાબિત કર્યું છે કે અંધશ્રદ્ધા અને વધુ પૈસા કમાવવાની લાલચ લોકોને મોટી આર્થિક મુશ્કેલીમાં મૂકી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ