Video / IPL ચેમ્પિયન બનતા જ કોહલીનો પાર્ટી મોડ ઑન, પત્ની અનુષ્કા સાથે લગાવ્યા ઠુમકા

IPL 2026નો ખિતાબ જીત્યા બાદ વિરાટ કોહલીએ પત્ની અનુષ્કા શર્મા સાથે જોરદાર ઉજવણી કરી હતી. RCB દ્વારા શેર કરાયેલા એક વીડિયોમાં બંને ડાન્સ ફ્લોર પર મસ્તી કરતા અને જીતની ખુશી માણતા જોવા મળ્યા હતા.બીજી તરફ ફાઈનલ મેચમાં વિરાટ કોહલીએ અણનમ 75 રનની શાનદાર ઇનિંગ રમી હતી. સાથે જ બોલરોએ પણ ઉત્તમ પ્રદર્શન કર્યું હતું. તેમના આ પ્રદર્શનના કારણે રોયલ ચેલેન્જર્સ બેંગલોરે ગુજરાત ટાઇટન્સને હરાવીને સતત બીજી વખત આઈપીએલ ટ્રોફી પોતાના નામે કરી હતી.

આઈપીએલ 2026નો ખિતાબ જીત્યા બાદ રોયલ ચેલેન્જર્સ બેંગલોર (આરસીબી)ના કેમ્પમાં જશ્નનો માહોલ જોવા મળ્યો હતો. મેદાન પર બેટથી ટીમને જીત અપાવનાર વિરાટ કોહલીએ ટ્રોફી જીત્યા પછી ડાન્સ ફ્લોર પર પણ પોતાના અંદાજથી ચાહકોનું દિલ જીતી લીધું હતું.

RCBએ સોશિયલ મીડિયા પર શેર કરેલા વીડિયોમાં વિરાટ કોહલી પત્ની અનુષ્કા શર્મા સાથે સેલિબ્રેશન પાર્ટીમાં જોરદાર ડાન્સ કરતા જોવા મળ્યા હતા. RCBએ પોતાના સત્તાવાર પોસ્ટમાં 46 સેકન્ડનો વીડિયો શેર કર્યો હતો જેમાં વિરાટ અને અનુષ્કા સંપૂર્ણ ઉત્સાહ સાથે ડાન્સ કરતા અને જીતની ખુશી માણતા નજર આવ્યા હતા.

પોસ્ટના કેપ્શનમાં લખવામાં આવ્યું હતું, “ડાન્સ ફ્લોર પર કિંગ કોહલીનો માસ્ટરક્લાસ, મસ્તી અને ઘણું બધું. અનુષ્કા શર્મા, અમારી પહેલા દિવસની ઉજવણીમાં જોડાવા બદલ તમારો આભાર.”

આ પણ વાંચોઃ કોહલીથી પણ વધારે RCBના આ ખેલાડીઓ પાસે છે ટ્રોફી, એક તો...!

IPL 2026ની ફાઈનલમાં શું થયું?

• આ પહેલાં રવિવારે (1 જૂન) અમદાવાદમાં રમાયેલી ફાઈનલ મેચમાં પણ વિરાટ કોહલીએ પોતાના શાનદાર પ્રદર્શનથી ફરી એકવાર સાબિત કરી દીધું કે મોટા મુકાબલાઓમાં તેમના કરતાં વધુ વિશ્વસનીય ખેલાડી શોધવો મુશ્કેલ છે.
• ગુજરાત ટાઇટન્સ સામેની ફાઈનલમાં વિરાટે 42 બોલમાં અણનમ 75 રનની ઇનિંગ રમી હતી. પોતાની ઇનિંગ દરમિયાન તેમણે 9 ચોગ્ગા અને 3 છગ્ગા ફટકાર્યા હતા. વિરાટે માત્ર 25 બોલમાં અડધી સદી પૂર્ણ કરી હતી જે તેમના આઈપીએલ કરિયરની સૌથી ફાસ્ટ ફિફ્ટી પણ બની હતી.
• 156 રનના લક્ષ્યનો પીછો કરવા ઉતરેલી આરસીબીને વિરાટ કોહલી અને વેંકટેશ અય્યરે શાનદાર શરૂઆત અપાવી હતી. બંનેએ પ્રથમ વિકેટ માટે 62 રનની ભાગીદારી કરી હતી. વેંકટેશ અય્યરે 32 રન બનાવ્યા હતા, જ્યારે વિરાટ અંત સુધી ક્રિઝ પર ટકી રહ્યા હતા અને વિજેતા છગ્ગો ફટકારીને ટીમને 18 ઓવરમાં 161/5 સુધી પહોંચાડી હતી.
• તે પહેલાં આરસીબીના બોલરોએ ગુજરાત ટાઇટન્સના બેટરોને ખુલ્લેઆમ રમવાની તક આપી નહોતી. ટાઇટન્સની મજબૂત બેટિંગ લાઇનઅપ પાવરપ્લેમાં જ દબાણમાં આવી ગઈ હતી અને ટીમ 20 ઓવરમાં માત્ર 155/8 રન જ બનાવી શકી હતી.
• વોશિંગ્ટન સુંદરએ અણનમ 50 રનની લડાયક ઇનિંગ રમી હતી પરંતુ તેમને બીજા છેડેથી પૂરતો સાથ મળ્યો નહોતો.
• બેંગલુરુ તરફથી રસિક સલામ દારે સૌથી સફળ બોલર તરીકે 3 વિકેટ ઝડપી હતી. જ્યારે અનુભવી ઝડપી બોલર ભુવનેશ્વર કુમાર અને જોશ હેઝલવુડે 2-2 વિકેટ લીધી હતી. તેમની સચોટ બોલિંગ સામે ગુજરાતની બેટિંગ લાઇનઅપ સતત દબાણમાં જોવા મળી હતી.
• સતત બીજા આઈપીએલ ખિતાબ સાથે આરસીબીએ ફરી એકવાર પોતાની તાકાત અને દબદબો સાબિત કર્યો છે. મેદાન પર વિરાટ કોહલીની અણનમ ઇનિંગ અને ત્યારબાદ અનુષ્કા શર્મા સાથેની તેમની ઉજવણી, બંને ચાહકો માટે યાદગાર ક્ષણો બની ગઈ હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ