ન્યૂઝ અપડેટ્સ
Last Updated: 09:33 AM, 18 November 2026
ADVERTISEMENT
એરલાઇનની નબળી આર્થિક સ્થિતિની અસર હવે તેની રોજિંદી કામગીરી પર જોવા મળી રહી છે. મુંબઈ એરપોર્ટ પર મંગળવારે સાંજે 7 વાગ્યાથી ફ્લાઇટ્સનું સંચાલન ખોરવાયું હતું. તેના કારણે સેંકડો મુસાફરો કલાકો સુધી એરપોર્ટ પર અટવાઈ રહ્યા હતા. ફ્લાઇટ ક્યારે ઉડશે તેની યોગ્ય માહિતી પણ મુસાફરોને મળી નહોતી. બીજી તરફ દુબઈથી ચાર ફ્લાઇટ્સ રદ થવાની ઘટના બાદ એરલાઇનની મુશ્કેલીઓમાં વધારો થયો છે. બાકી પેમેન્ટ, વિમાનો ગ્રાઉન્ડેડ રહેવા અને કર્મચારીઓના પગારને લઈને પણ સવાલો ઊભા થઈ રહ્યા છે.
ADVERTISEMENT
મુંબઈ એરપોર્ટના ટર્મિનલ-1 પર મંગળવારે SpiceJetના મુસાફરોને ભારે હાલાકીનો સામનો કરવો પડ્યો હતો. સાંજે 7 વાગ્યાથી એરલાઇનની ફ્લાઇટ્સનું સંચાલન ખોરવાયું હતું. તેના કારણે મોટી સંખ્યામાં મુસાફરો એરપોર્ટ પર ફસાઈ ગયા હતા. કલાકો સુધી રાહ જોયા પછી પણ ફ્લાઇટ ક્યારે રવાના થશે તેની સ્પષ્ટ માહિતી મળી રહી નહોતી.મુસાફરોએ આક્ષેપ કર્યો હતો કે એરલાઇન તરફથી ફ્લાઇટ મોડી થવા અંગે યોગ્ય જાણકારી આપવામાં આવી રહી નથી. નવા ડિપાર્ચર ટાઈમ વિશે પણ કોઈ સ્પષ્ટતા કરવામાં આવી નહોતી. એરલાઇનના કાઉન્ટર પર મુસાફરોની ભારે ભીડ જોવા મળી હતી. લાંબા સમયથી રાહ જોઈ રહેલા લોકોએ કાઉન્ટર પર હોબાળો કર્યો હતો અને નારાજગી વ્યક્ત કરતા નારા લગાવ્યા હતા.રાત્રે 11:30 વાગ્યે રવાના થનારી એક ફ્લાઇટનું બોર્ડિંગ પણ શરૂ થયું નહોતું. જેના કારણે મુસાફરોમાં વધુ નારાજગી જોવા મળી હતી. લોકો પોતાની મુસાફરી ક્યારે શરૂ થશે તેની રાહ જોતા રહ્યા હતા.
ADVERTISEMENT
મુંબઈમાં SpiceJetના મુસાફરોને આવી મુશ્કેલીનો સામનો પહેલીવાર કરવો પડ્યો નથી. આ પહેલાં સોમવારે પણ ફ્લાઇટ્સ મોડી પડતાં મુસાફરો કલાકો સુધી એરપોર્ટ પર અટવાયા હતા. મુસાફરોના જણાવ્યા પ્રમાણે તેઓ સાંજે લગભગ 7 વાગ્યે એરપોર્ટ પહોંચી ગયા હતા, પરંતુ લાંબા સમય સુધી કોઈ ફ્લાઇટ રવાના થઈ નહોતી.કેટલાક મુસાફરોએ લગભગ 9 કલાક સુધી રાહ જોવી પડી હતી. તેમની ફ્લાઇટ મોડી રાત્રે નહીં પરંતુ બીજા દિવસે વહેલી સવારે લગભગ 4 વાગ્યે રવાના થઈ હતી. અચાનક ફ્લાઇટ મોડી થવી અને એરલાઇન તરફથી યોગ્ય માહિતી ન મળવાને કારણે વૃદ્ધો અને બાળકોને પણ મુશ્કેલી પડી હતી.કેટલાક મુસાફરોને ટિકિટના પૈસા 7 દિવસમાં પરત આપવાની વાત કહેવામાં આવી હતી. જોકે, મુસાફરોની ફરિયાદ હતી કે ફ્લાઇટમાં વિલંબ અને આગળની વ્યવસ્થા અંગે તેમને સમયસર જાણ કરવામાં આવી નહોતી.
ADVERTISEMENT

ADVERTISEMENT
SpiceJetની મુશ્કેલીઓ માત્ર મુંબઈ સુધી મર્યાદિત નથી. થોડા દિવસ પહેલાં રવિવારે દુબઈથી એરલાઇનની ચાર ફ્લાઇટ્સ રદ કરવામાં આવી હતી. દુબઈ એરપોર્ટ પર ગ્રાઉન્ડ હેન્ડલિંગની કામગીરી સંભાળતી કંપની dnataએ SpiceJetની ચેક-ઇન સેવા અટકાવી દીધી હતી. તેનું કારણ એરલાઇન તરફથી બાકી પેમેન્ટ ન ચૂકવવાનું હોવાનું જણાવાયું હતું.મળતી માહિતી પ્રમાણે SpiceJet પર dnataના 1.4 કરોડ UAE દિરહમથી વધુ રૂપિયા બાકી હતા. પેમેન્ટ ન મળતાં કંપનીએ દુબઈ એરપોર્ટ પર એરલાઇનની ચેક-ઇન સેવા બંધ કરી દીધી હતી. આના કારણે મુસાફરોને મુશ્કેલી પડી હતી અને ચાર ફ્લાઇટ્સ રદ કરવાની નોબત આવી હતી.આ ઘટનાથી સ્પષ્ટ થાય છે કે એરલાઇનની આર્થિક મુશ્કેલીઓની અસર હવે એરપોર્ટ પર મળતી જરૂરી સેવાઓ પર પણ પડી રહી છે.
ADVERTISEMENT
SpiceJetની ફ્લાઇટ્સમાં વારંવાર વિલંબ અને સંચાલનમાં આવી રહેલી મુશ્કેલીઓને ધ્યાનમાં રાખીને દિલ્હી અને મુંબઈ એરપોર્ટ દ્વારા મુસાફરો માટે એડવાઇઝરી જાહેર કરવામાં આવી હતી.દિલ્હીના ઇન્દિરા ગાંધી ઇન્ટરનેશનલ એરપોર્ટ દ્વારા શુક્રવારે મુસાફરોને સંભવિત ફ્લાઇટ વિલંબ અને અન્ય મુશ્કેલીઓ અંગે સાવચેત કરવામાં આવ્યા હતા. ત્યારબાદ શનિવારે મુંબઈ એરપોર્ટ દ્વારા પણ આવી જ સૂચના આપવામાં આવી હતી.એરલાઇનની કામગીરી ખોરવાવા છતાં મુંબઈમાં ફ્લાઇટ્સને અસર થવા અંગે SpiceJet તરફથી કોઈ સત્તાવાર નિવેદન આપવામાં આવ્યું નહોતું. મુસાફરો માટે સૌથી મોટી મુશ્કેલી એ છે કે ફ્લાઇટ મોડી પડે ત્યારે તેમને સમયસર અને સ્પષ્ટ માહિતી મળતી નથી.
Passenger Advisory issued at 10:05 hrs. For Live flight status: https://t.co/1CVJNL6Ry1 #DelhiAirport #PassengerAdvisory #DELAdvisory https://t.co/HdcWqf4tMw
— Delhi Airport (@DelhiAirport) November 13, 2026
ADVERTISEMENT

આ પણ વાંચોઃ UP ચૂંટણી પહેલાં INDIA ગઠબંધનમાં ખેંચતાણ, 181 બેઠકોની માંગથી અખિલેશની વધી મુશ્કેલી
SpiceJetની કામગીરી પર નજર કરીએ તો એરલાઇનની મુશ્કેલીઓ સતત વધી રહી છે. અહેવાલો પ્રમાણે એરલાઇન દરરોજ લગભગ 65 નિર્ધારિત ફ્લાઇટ્સનું સંચાલન કરી રહી છે. જોકે, તેમાંથી દરરોજ 15થી 20 ફ્લાઇટ્સ રદ થતી હોવાની માહિતી સામે આવી છે. આ ઉપરાંત અનેક ફ્લાઇટ્સ 3થી 5 કલાક મોડી પડી રહી છે.એરલાઇન પર વિમાન ભાડે આપતી કંપનીઓ, ઓઇલ કંપનીઓ, એરપોર્ટ સંચાલકો અને ગ્રાઉન્ડ હેન્ડલિંગ એજન્સીઓનું પેમેન્ટ બાકી હોવાનું કહેવાય છે. બાકી પેમેન્ટને કારણે કેટલીક જરૂરી સેવાઓ મેળવવા માટે એરલાઇનને અગાઉથી પૈસા ચૂકવવા પડી રહ્યા છે. જેના કારણે રોજિંદી કામગીરી પર વધુ દબાણ વધી રહ્યું છે.મળતી માહિતી પ્રમાણે એરલાઇન પાસે હાલમાં લગભગ 12 વિમાનનું જ ઓપરેશનલ ફ્લીટ રહી ગયું છે. તેમાંથી પણ ત્રણ વિમાન પેમેન્ટ સંબંધિત મુશ્કેલીઓને કારણે હાલ ગ્રાઉન્ડેડ છે. એટલે કે આ વિમાનો હાલમાં ઉડાન ભરી શકતા નથી.
SpiceJetની મુશ્કેલીઓની અસર કર્મચારીઓ પર પણ પડી રહી હોવાનું સામે આવ્યું છે. મળતી માહિતી પ્રમાણે એરલાઇનના કર્મચારીઓને જૂન 2026થી પગાર મળ્યો ન હોવાના અહેવાલ છે. પગારની સમસ્યા અને વિમાનોની અછતને કારણે એરલાઇનની કામગીરી પર પણ અસર પડી રહી છે.કંપનીની આર્થિક સ્થિતિ અંગે વાત કરીએ તો સપ્ટેમ્બર 2025માં પૂરા થયેલા ત્રિમાસિક ગાળામાં SpiceJetને ₹621 કરોડનું ચોખ્ખું નુકસાન થયું હતું. એક વર્ષ પહેલાં આ જ સમયગાળામાં કંપનીને ₹458 કરોડનું નુકસાન થયું હતું. એટલે કે કંપનીની ખોટમાં મોટો વધારો થયો હતો.
#PassengerAdvisory https://t.co/4mpDrIVsm0
— Mumbai Airport (@CSMIA_Official) November 13, 2026
આ સમયગાળા દરમિયાન કંપનીની આવક પણ વાર્ષિક ધોરણે 13.4 ટકા ઘટીને ₹792 કરોડ રહી હતી. અગાઉ આ આવક ₹915 કરોડ હતી. કંપનીને આ ત્રિમાસિક ગાળામાં ₹297 કરોડનું ઓપરેટિંગ નુકસાન પણ થયું હતું.આ ઉપરાંત ગ્રાઉન્ડેડ વિમાનો પર ₹120 કરોડનો ખર્ચ થયો હતો. જ્યારે આ વિમાનોને ફરીથી ઉડાન માટે તૈયાર કરવા ₹30 કરોડનો ખર્ચ થયો હતો. કંપનીએ ફેબ્રુઆરીમાં ડિસેમ્બર ત્રિમાસિક ગાળાનાં પરિણામો જાહેર કર્યા હતા. ત્યારબાદથી નવા ત્રિમાસિક નાણાકીય પરિણામો જાહેર કર્યા નથી.આમ બાકી પેમેન્ટ, વિમાનોની અછત, કર્મચારીઓના પગારની સમસ્યા અને સતત રદ થતી ફ્લાઇટ્સને કારણે SpiceJet સામે મોટો પડકાર ઊભો થયો છે. તેની સીધી અસર મુસાફરોની મુસાફરી પર પડી રહી છે.
સંકળાયેલા મુદ્દાઓ
Sub Editor at VTV Gujarati | 8+ Years of Experience in Gujarati Journalism, News Writing & Digital Content Creation.