વડોદરા / ગણેશોત્સવમાં અશ્લીલ અને ઉશ્કેરણીજનક ગીતો નહીં વગાડવા વડોદરા પોલીસની સૂચના

ગણેશોત્સવ દરમિયાન ઢોલ-નગારાં અને ડીજેના તાલે ઉજવણી થવાની છે ત્યારે વડોદરા પોલીસે મંડળોના આયોજકો અને ડીજે સંચાલકોને અશ્લીલ ગીતો, વાંધાજનક સંવાદો અને ઉશ્કેરણીજનક ગીતો ન વગાડવા સૂચના આપી છે. ખાસ કરીને સંવેદનશીલ વિસ્તારોમાં એવાં ગીતો વગાડવાથી કોમી તણાવ સર્જાઈ શકે છે, તેથી પોલીસ દ્વારા તેના પર નજર રાખવામાં આવશે.

શહેર પોલીસ કમિશનર નરસિમ્હા તોમરે જણાવ્યું હતું કે ગણેશોત્સવના આયોજકો અને ડીજે સિસ્ટમ સંચાલકો સાથે બેઠક યોજીને ગણેશ વિસર્જન સહિતના કાર્યક્રમો અને મંડપોમાં અશ્લીલ ગીતો ન વગાડવા માટે સૂચના આપવામાં આવી છે. આવાં ગીતો ધાર્મિક ઉત્સવોને અનુરૂપ નથી અને તેનાથી બિનજરૂરી વિક્ષેપ પણ ઊભો થઈ શકે છે.

તેમણે કહ્યું કે વડોદરા સમૃદ્ધ પરંપરાઓ ધરાવતી ‘સંસ્કારી નગરી’ છે અને તહેવારો શહેરની આ છબીને વધુ મજબૂત બનાવે તે જરૂરી છે. પોલીસની ટીમો સમગ્ર ઉજવણી પર નજર રાખશે અને જો અશ્લીલ શબ્દો ધરાવતાં ગીતો વગાડવામાં આવશે તો આયોજકોને તે તાત્કાલિક બંધ કરવા જણાવાશે.

પોલીસ કમિશનરે સ્પષ્ટ કર્યું કે આ કોઈની નૈતિકતા નક્કી કરવાની કાર્યવાહી નથી, પરંતુ ગણેશોત્સવની ગરિમા અને માહોલ જાળવવાનો પ્રયાસ છે. જોકે, જો કોઈ ગીત અથવા સંવાદથી કોમી તણાવ ભડકાવવાનો પ્રયાસ થશે અને તે ડીજે દ્વારા વગાડવામાં આવશે તો પોલીસ કાયદેસરની કાર્યવાહી કરશે.

આ પણ વાંચો: ભરૂચના પાલેજમાં ₹4,300નું પેટ્રોલ ભરાવી કારચાલક ફરાર, નંબર વગરની કાર CCTVમાં કેદ

અશ્લીલ કે વાંધાજનક ગીતોની કોઈ ચોક્કસ યાદી પોલીસે તૈયાર કરી છે કે કેમ તે અંગે પૂછવામાં આવતા કમિશનરે જણાવ્યું કે આવી કોઈ યાદી બનાવવામાં આવી નથી. કયા ગીત સામે સ્થળ પર શું કાર્યવાહી કરવી તે અંગેનો નિર્ણય પોલીસની ટીમ પરિસ્થિતિ પ્રમાણે લેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ