કરિયર / રેલવેમાં આવી મોટાપાયે ભરતી, 12 પાસ ઉમેદવારો તૈયાર થઇ જાઓ! આ રીતે થશે સિલેક્શન

રેલવેમાં સરકારી નોકરીની તૈયારી કરી રહેલા 12 પાસ ઉમેદવારો માટે ભરતીની તક આવી છે. રેલવે ભરતી બોર્ડે NTPC અંડરગ્રેજ્યુએટ કેટેગરીમાં 1688 જગ્યાઓ માટે ટૂંકી સૂચના જાહેર કરી છે. આ ભરતી માટે ઓનલાઈન અરજી પ્રક્રિયા ઓક્ટોબર 2026થી શરૂ થશે. ઉમેદવારો સત્તાવાર વેબસાઇટ પર જઈને અરજી કરી શકશે. ભરતીમાં કોમર્શિયલ કમ ટિકિટ ક્લાર્ક સહિતની પોસ્ટનો સમાવેશ કરવામાં આવ્યો છે.

1688 જગ્યાઓ માટે ભરતી

રેલવે ભરતી બોર્ડ એટલે કે RRB દ્વારા જાહેરાત નંબર 07/2026 હેઠળ NTPC અંડરગ્રેજ્યુએટ ભરતીની ટૂંકી સૂચના જાહેર કરવામાં આવી છે. આ ભરતીમાં કુલ 1688 જગ્યાઓ ભરવામાં આવશે. ભરતી માટે ઓનલાઈન અરજી કરવાની પ્રક્રિયા 5 ઓક્ટોબર 2026થી શરૂ થશે અને 13 નવેમ્બર 2026ની રાત્રે 11:59 વાગ્યા સુધી અરજી કરી શકાશે. અરજી માટે ઉમેદવારોએ RRBની સત્તાવાર વેબસાઇટનો ઉપયોગ કરવાનો રહેશે.

કઈ પોસ્ટ પર ભરતી થશે?

આ ભરતીમાં કોમર્શિયલ કમ ટિકિટ ક્લાર્ક, જુનિયર ક્લાર્ક કમ ટાઇપિસ્ટ, એકાઉન્ટ ક્લાર્ક કમ ટાઇપિસ્ટ અને ટ્રેન ક્લાર્ક જેવી પોસ્ટનો સમાવેશ થાય છે. એટલે કે 12મું ધોરણ પાસ કરેલા ઉમેદવારો માટે રેલવેમાં અલગ-અલગ પોસ્ટ પર સરકારી નોકરી મેળવવાની તક છે. અરજી કરતા પહેલા ઉમેદવારોએ પોતાની લાયકાત અને ઉંમરની શરતો ચકાસી લેવી જરૂરી રહેશે.

કોણ અરજી કરી શકશે?

આ ભરતી માટે માન્યતા પ્રાપ્ત શિક્ષણ બોર્ડમાંથી ઓછામાં ઓછા 50 ટકા ગુણ સાથે 12મું ધોરણ પાસ કરેલું હોવું જરૂરી છે. જોકે SC, ST અને દિવ્યાંગ શ્રેણીના ઉમેદવારો માટે 50 ટકા ગુણની શરત લાગુ પડતી નથી. ઉમેદવારની ઉંમર 18થી 30 વર્ષની વચ્ચે હોવી જોઈએ. અનામત કેટેગરીના ઉમેદવારોને નિયમ મુજબ ઉંમરમાં છૂટછાટ આપવામાં આવશે.

આ પણ વાંચોઃ હવે અંતરિક્ષમાં બનવા જઇ રહ્યું છે ભારતનું પહેલું AI ડેટા સેન્ટર, થશે અનેક ફાયદા

ટાઇપિંગ આવડવું પણ જરૂરી

જુનિયર ક્લાર્ક કમ ટાઇપિસ્ટ અને એકાઉન્ટ ક્લાર્ક કમ ટાઇપિસ્ટ પોસ્ટ માટે ઉમેદવારોએ કમ્પ્યુટર ટાઇપિંગ સ્કિલ ટેસ્ટ પાસ કરવો પડશે. આ માટે અંગ્રેજીમાં ઓછામાં ઓછી 30 શબ્દ પ્રતિ મિનિટ અને હિન્દીમાં 25 શબ્દ પ્રતિ મિનિટની ટાઇપિંગ સ્પીડ જરૂરી રહેશે. ટાઇપિંગ ટેસ્ટના અલગથી ગુણ આપવામાં આવશે નહીં, પરંતુ આ પરીક્ષા પાસ કરવી ફરજિયાત રહેશે.

CBT-1માં 100 પ્રશ્નો પૂછાશે

પસંદગી પ્રક્રિયાનો પ્રથમ તબક્કો કમ્પ્યુટર આધારિત પરીક્ષા એટલે કે CBT-1 હશે. પરીક્ષાનો સમય 90 મિનિટ રહેશે. તેમાં જનરલ અવેરનેસના 40 પ્રશ્નો, ગણિતના 30 પ્રશ્નો અને જનરલ ઇન્ટેલિજન્સ તથા રિઝનિંગના 30 પ્રશ્નો પૂછવામાં આવશે. કુલ 100 પ્રશ્નો હશે અને ખોટા જવાબ માટે એક તૃતીયાંશ નેગેટિવ માર્કિંગ રહેશે. CBT-1ના સ્કોરના આધારે ઉમેદવારોને બીજા તબક્કા માટે શોર્ટલિસ્ટ કરવામાં આવશે.

CBT-2માં 120 પ્રશ્નો હશે

CBT-2 પરીક્ષામાં કુલ 120 પ્રશ્નો પૂછવામાં આવશે. તેમાં જનરલ અવેરનેસના 50, ગણિતના 35 અને જનરલ ઇન્ટેલિજન્સ તથા રિઝનિંગના 35 પ્રશ્નો હશે. આ પરીક્ષામાં પણ ખોટા જવાબ માટે નેગેટિવ માર્કિંગ રહેશે. CBT-2 માટે કેટેગરી પ્રમાણે લઘુત્તમ ગુણની શરત રાખવામાં આવી છે.

કેટેગરી પ્રમાણે લઘુત્તમ ગુણ

જનરલ કેટેગરી અને EWS ઉમેદવારોએ ઓછામાં ઓછા 40 ટકા ગુણ મેળવવાના રહેશે. OBC નોન-ક્રીમી લેયર અને SC ઉમેદવારો માટે લઘુત્તમ 30 ટકા ગુણની શરત છે. ST ઉમેદવારોએ ઓછામાં ઓછા 25 ટકા ગુણ મેળવવાના રહેશે. આ લઘુત્તમ ગુણની શરત પૂર્ણ કર્યા બાદ જ ઉમેદવાર આગળની પ્રક્રિયા માટે પાત્ર બનશે.

દસ્તાવેજ વેરિફિકેશન બાદ મેડિકલ ટેસ્ટ

CBT પરીક્ષાઓ અને જ્યાં લાગુ પડે ત્યાં ટાઇપિંગ ટેસ્ટ પૂર્ણ થયા બાદ ઉમેદવારોને દસ્તાવેજ ચકાસણી માટે બોલાવવામાં આવશે. આ તબક્કે ઉમેદવારોએ પોતાના મૂળ શૈક્ષણિક અને અન્ય જરૂરી દસ્તાવેજો રજૂ કરવાના રહેશે. ત્યારબાદ પસંદ કરાયેલા ઉમેદવારોની તબીબી તપાસ કરવામાં આવશે. રેલવેમાં નિમણૂક માટે ઉમેદવારનું સંબંધિત મેડિકલ માપદંડ પૂર્ણ કરવું જરૂરી રહેશે.

અરજી ક્યારે અને ક્યાં કરવી?

RRB NTPC ભરતી માટે ઓનલાઈન અરજી પ્રક્રિયા 5 ઓક્ટોબર 2026થી શરૂ થવાની છે. ઉમેદવારો 13 નવેમ્બર 2026ની રાત્રે 11:59 વાગ્યા સુધી ફોર્મ ભરી શકશે. અરજી માટે સત્તાવાર વેબસાઇટ www.rrbapply.gov.in પર જવાનું રહેશે. અરજી કરતા પહેલા ઉમેદવારોએ નોટિફિકેશનમાં આપેલી તમામ શરતો, લાયકાત અને જરૂરી દસ્તાવેજોની માહિતી ચકાસી લેવી જોઈએ.

તૈયારી માટે અત્યારથી લાગી જાઓ

રેલવે NTPC ભરતીમાં 1688 જગ્યાઓ હોવાથી 12 પાસ ઉમેદવારો માટે આ ભરતી મહત્વની તક બની શકે છે. અરજી શરૂ થવાની રાહ જોવાને બદલે ઉમેદવારો અત્યારથી ગણિત, રિઝનિંગ અને જનરલ અવેરનેસની તૈયારી શરૂ કરી શકે છે. ખાસ કરીને CBT-1 અને CBT-2ના અભ્યાસક્રમ પ્રમાણે તૈયારી કરવાથી પરીક્ષાની તૈયારીને વ્યવસ્થિત કરી શકાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ