વિશ્વ / વડાપ્રધાન નરેન્દ્ર મોદી કાલે રશિયાના પ્રેસિડેન્ટ વ્લાદિમીર પુતિન સાથે કરશે મુલાકાત, જાણો કયા મુદ્દા પર થશે વાતચીત?

કિર્ગિસ્તાનની રાજધાની બિશ્કેક ખાતે યોજાઈ રહેલી 26મી SCO શિખર પરિષદ દરમિયાન સોમવારે ભારતના વડાપ્રધાન નરેન્દ્ર મોદી અને રશિયાના રાષ્ટ્રપતિ વ્લાદિમીર પુતિન વચ્ચે એક અત્યંત મહત્વપૂર્ણ દ્વિપક્ષીય બેઠક યોજાવા જઈ રહી છે. આશરે 50 મિનિટ સુધી ચાલનારી આ ઉચ્ચ સ્તરીય બેઠકમાં ભારત-રશિયાના દ્વિપક્ષીય સંબંધો ઉપરાંત વૈશ્વિક અને પ્રાદેશિક મુદ્દાઓ પર વિગતવાર ચર્ચા કરવામાં આવશે.

વૈશ્વિક ઊર્જા ક્ષેત્રે ચાલી રહેલી અનિશ્ચિતતાઓ વચ્ચે આ મુલાકાત ભારત માટે વ્યૂહાત્મક રીતે ખૂબ મહત્વની માનવામાં આવે છે. રશિયા ભારત માટે ક્રૂડ ઓઈલ અને ખાતરનો સૌથી મોટો પુરવઠો પૂરો પાડતો દેશ છે. આ બેઠકમાં તેલ અને ગેસનો સીમલેસ સપ્લાય, પરમાણુ ઊર્જા ક્ષેત્રે સહયોગ અને ખાતરની સમયસર ઉપલબ્ધતા જેવા મહત્વના વિષયો પર બંને નેતાઓ સમીક્ષા કરશે.

આ ઉપરાંત, લાંબા સમયથી ચાલી આવતી સંરક્ષણ ભાગીદારી પણ એજન્ડામાં અગ્રસ્થાને રહેશે. સૈન્ય સાધનોનો પૂરવઠો, સ્પેરપાર્ટ્સની ત્વરિત ડિલિવરી, ટેકનિકલ સહયોગ અને સંરક્ષણ ક્ષેત્રે સંયુક્ત ઉત્પાદનને પ્રોત્સાહન આપવા અંગે વિચારણા થઈ શકે છે.

વધુ વાંચો : ગુજરાતમાં ભાજપ નેતાએ જ રક્ષાબંધનના દિવસે સાડીથી ગળેફાંસો ખાધો, દીકરીઓનો તહેવાર માતમમાં ફેરવાયો

બેઠકનો અન્ય એક મુખ્ય વિષય બંને દેશો વચ્ચેનો દ્વિપક્ષીય વેપાર છે. તાજેતરના સમયમાં ભારત અને રશિયા વચ્ચેનો વેપાર નોંધપાત્ર રીતે વધ્યો છે, પરંતુ તેમાં રહેલી વેપારી અસંતુલનતા (ટ્રેડ ઈમ્બેલેન્સ) ભારત માટે ચિંતાનો વિષય છે. આ બેઠકમાં ભારતીય ઉત્પાદનોની રશિયન બજારમાં નિકાસ વધારવા, રોકાણ પ્રોત્સાહિત કરવા અને પેમેન્ટ સિસ્ટમને વધુ સરળ બનાવવા પર ભાર મુકાશે. આવતા મહિને નવી દિલ્હીમાં પ્રસ્તાવિત બ્રિક્સ (BRICS) શિખર પરિષદ પૂર્વે આ બેઠક દ્વિપક્ષીય સંબંધોને નવી ઊંચાઈ આપશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ