હુમલો / દ્વારકામાં પ્રેમ પ્રકરણમાં યુવકનું અપહરણ બાદ કર્યો હુમલો, પાંચ સામે ગુનો નોંધાયો

Dwarka News: દ્વારકા જિલ્લામાં પ્રેમ પ્રકરણને લઈને એક ગંભીર મારામારી અને અપહરણની ઘટના સામે આવી છે. પટેલકા ગામના ખીમાભાઈ ચાવડા નામના યુવકને પાંચ શખ્સોએ મળીને પહેલા બોલાવી અને પછી હુમલો કર્યો હોવાની ફરિયાદ નોંધાઈ છે. મળતી માહિતી મુજબ હંજડાપર ગામના પાટિયા પાસે યુવકને બોલાવવામાં આવ્યો હતો. જ્યાં આરોપીઓએ તેને ઘેરી લઈને મારપીટ શરૂ કરી હતી. અચાનક થયેલા હુમલાથી યુવકને ગંભીર ઇજા પહોંચી હતી.

અપહરણ કરી ખંભાળિયા લઈ જઈ વધુ મારપીટ

ફરિયાદ અનુસાર આરોપીઓએ ખીમાભાઈનું અપહરણ કરી તેને રીક્ષામાં બેસાડી ખંભાળિયા લઈ ગયા હતા. ત્યાં પહોંચ્યા બાદ ફરીથી તેની પર હુમલો કરવામાં આવ્યો હતો. આરોપીઓએ નિર્દયી રીતે માર મારતા યુવકના બન્ને હાથ અને પગમાં ફ્રેક્ચર થઈ ગયાનું જણાવાયું છે. ગંભીર હાલતમાં યુવકને સારવાર માટે હોસ્પિટલ ખસેડવામાં આવ્યો હતો. સમગ્ર બનાવને લઈને વિસ્તારમાં ભય અને ચિંતા ફેલાઈ છે.

ફરિયાદીનું કહેવું છે કે

" તેમની છોકરીએ મને કહ્યું હતું કે તેને માંરી સાથે લગ્ન કરવા છે અને મારે ત્યાં 25-30 લોકો આવ્યા અને મને મારીને અધમૂઓ કરી નાખ્યો પછી રિક્ષામાં બેસાડીને ખંભાળિયા લઈ ગયા અને ત્યાં લઈ ગયા પછી પણ મને ખૂબ માર મારવામાં આવ્યો."

આ પણ વાંચો: કેશોદમાં ધોળા દિવસે લૂંટ, હનુમાન મંદિર પાસે યુવાનને ધમકાવી રોકડ લૂંટી ફરાર

5 આરોપીઓ સામે ગુનો નોંધાયો

આ બનાવ અંગે ખંભાળિયા પોલીસ સ્ટેશનમાં ફરિયાદ નોંધાઈ છે. પોલીસ દ્વારા જયેશ સોલંકી, નરેશ સોલંકી, અશ્વિન સોલંકી, કેતન સોલંકી અને દુદા ચાવડા સામે ગુનો દાખલ કરવામાં આવ્યો છે. પ્રેમ પ્રકરણને કારણે આ હુમલો કરવામાં આવ્યો હોવાની પ્રાથમિક માહિતી મળી રહી છે. પોલીસે તમામ આરોપીઓને ઝડપવા માટે તપાસ શરૂ કરી છે અને વધુ પૂછપરછ હાથ ધરાઈ રહી છે. સ્થાનિકોમાં આ બનાવને લઈને રોષ જોવા મળી રહ્યો છે અને કડક કાર્યવાહી કરવાની માંગ ઉઠી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ