મનોરંજન / ડેટિંગ એપ્સ ચલાવનાર મર્દોનો ભરોસો નહીં, ચહલ સાથે અણબનાવ વચ્ચે બોલી RJ મહવશ

તાજેતરમાં મહવશે એક ઇન્ટરવ્યૂ દરમિયાન પ્રેમ, સંબંધો અને આજકાલની ડેટિંગ સંસ્કૃતિ અંગે પોતાના વિચારો ખુલ્લેઆમ વ્યક્ત કર્યા હતા. તેમણે જણાવ્યું કે આજના સમયમાં લોકો સંબંધોને ખૂબ જ સરળતાથી લે છે અને ડેટિંગ એપ્સના કારણે સંબંધોની ગંભીરતા ઓછી થઈ ગઈ છે. મહવશે કહ્યું કે દરેક સંબંધમાં થોડું સમાધાન અને સમજણ જરૂરી હોય છે. તેમના જણાવ્યા પ્રમાણે, આજકાલ ઘણા લોકો ટિન્ડર જેવી ડેટિંગ એપ્સ પર સતત ‘લેફ્ટ’ અને ‘રાઇટ’ સ્વાઇપ કરતા રહે છે, જાણે લોકો કોઈ વસ્તુ હોય. તેમણે સ્પષ્ટ કહ્યું કે તેઓ આ પ્રકારની વિચારસરણી સાથે સહમત નથી.

તેમણે વધુમાં જણાવ્યું કે જ્યારે કોઈ વ્યક્તિને વાસ્તવિક જીવનમાં સ્વાભાવિક રીતે મળવામાં આવે છે, ત્યારે તે સંબંધ વધુ મજબૂત અને વિશ્વાસભર્યો બની શકે છે. પાર્ટી, મિત્રવર્તુળ અથવા અન્ય કોઈ પ્રસંગે બનેલો પરિચય વધુ સારો હોય છે, કારણ કે તેમાં એક સ્વાભાવિક જોડાણ હોય છે.મહવશે કહ્યું કે તેમને એવા લોકો પર વિશ્વાસ કરવો મુશ્કેલ લાગે છે જે સતત ડેટિંગ એપ્સનો ઉપયોગ કરે છે. તેમના મતે, જ્યારે કોઈ વ્યક્તિ એક સાથે અનેક લોકો સાથે વાતચીત કરી રહ્યો હોય ત્યારે વિશ્વાસનું બંધન મજબૂત બનવું મુશ્કેલ બને છે.

આજકાલ ડેટિંગ ઘણા લોકો માટે રોજિંદી પ્રવૃત્તિ જેવી બની ગઈ છે, જ્યારે તેઓ આજે પણ જૂના જમાનાના પ્રેમમાં વિશ્વાસ રાખે છે. તેમના માટે પ્રેમનો અર્થ માત્ર મોટા વચનો નહીં, પરંતુ નાની-નાની કાળજી, લાગણી અને પોતાના માણસ માટે કરાયેલા નાના પ્રયત્નોમાં છુપાયેલો છે.મહવશના આ નિવેદનો બાદ સોશિયલ મીડિયા પર ફરી ચર્ચા શરૂ થઈ છે. કેટલાક લોકો માની રહ્યા છે કે તેમણે ડેટિંગ એપ્સ અંગે વાત કરીને પરોક્ષ રીતે યુઝવેન્દ્ર ચહલ પર નિશાન સાધ્યું હોઈ શકે છે. જોકે, મહવશે પોતાના નિવેદનમાં ક્યાંય પણ ચહલનું નામ લીધું નથી.

આ પણ વાંચોઃ 200 કરોડના મની લોન્ડરિંગ કેસમાં દિલ્હીની કોર્ટમાં હાજર થઈ જેકલીન ફર્નાન્ડીઝ, પોતાને ગણાવી નિર્દોષ

કુલ મળીને મહવશનું માનવું છે કે સારો અને લાંબો ચાલતો સંબંધ વિશ્વાસ, સાચી લાગણી અને વાસ્તવિક જીવનના જોડાણ પર આધારિત હોય છે નહીં કે ફક્ત ઓનલાઈન ડેટિંગની ઝડપી દુનિયા પર.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ