CWG 2026 / બોક્સિંગમાં સાક્ષી અને પ્રિયાનો 'ગોલ્ડન પંચ': કોમનવેલ્થ ગેમ્સમાં ભારતના 11 ગોલ્ડ સહિત કુલ 35 મેડલ !

ગ્લાસગો કોમનવેલ્થ ગેમ્સ 2026 માં ભારતીય બોક્સરોનું શાનદાર પ્રદર્શન ચાલુ છે. દિવસ દરમિયાન અગાઉ બે મહિલા બોક્સરોએ દેશ માટે સ્વર્ણ પદક જીત્યા બાદ, સાક્ષી ચૌધરી અને પ્રિયા ઘનઘસે પણ ગોલ્ડ મેડલ પોતાના નામે કરીને ભારતીય બોક્સિંગની ક્ષમતાનો પરિચય આપ્યો છે. આ વિજયો સાથે ભારતની મેડલ ટેલી 35 પર પહોંચી ગઈ છે, જેમાં 11 ગોલ્ડ, 16 સિલ્વર અને 9 બ્રોન્ઝ મેડલ સામેલ છે.

સાક્ષી ચૌધરીનો 5-0 થી એકતરફી વિજય

ભારતીય બોક્સિંગના ગઢ ગણાતા હરિયાણાના ભિવવાનીની રહેવાસી સાક્ષી ચૌધરીએ મહિલાઓની 51 કિગ્રા ભારવર્ગ શ્રેણીમાં સુવર્ણ પદક મેળવ્યો છે:

ફાઇનલ મુકાબલો: ફાઇનલમાં સાક્ષી સામે ઈંગ્લેન્ડની રુબી વ્હાઈટે આક્રમક શરૂઆત કરી હતી, પરંતુ સાક્ષી સામે તે ટકી શકી નહીં.

વર્ચસ્વ: સાક્ષીએ ત્રણેય રાઉન્ડમાં પોતાનો પૂર્ણ દબદબો જાળવી રાખ્યો અને રુબી વ્હાઈટને કમબેક કરવાની એક પણ તક આપી નહીં. જજિસ દ્વારા સર્વસંમતિથી સાક્ષીને 5-0 થી વિજેતા જાહેર કરવામાં આવી.

ભાવુક ક્ષણો: સાક્ષીનું પ્રદર્શન એટલું શ્રેષ્ઠ હતું કે ત્રીજો રાઉન્ડ પૂરો થતાં જ તેણે વિજયની ઉજવણી શરૂ કરી દીધી હતી, જ્યારે હારનો અહેસાસ થતાં રુબી વ્હાઈટની આંખોમાં આંસુ આવી ગયા હતા.

સાક્ષીનો મોટો નિર્ણય અને કઠિન પરિશ્રમ

સાક્ષી માટે આ ગોલ્ડ મેડલ સુધી પહોંચવું આસાન નહોતું. તે હંમેશા 54 કિગ્રા વજન જૂથમાં રમતી હતી. પરંતુ આ વખતે 54 કિગ્રામાં ભારતનો કોટા પ્રીતિ પવાર પહેલેથી જ મેળવી ચૂકી હતી. હાર માનવાને બદલે સાક્ષીએ વજન ઘટાડીને નવી કેટેગરીમાં રમવાનો જોખમી નિર્ણય લીધો. કોચની સલાહથી તેણે 51 કિગ્રા વર્ગ પસંદ કર્યો. 3 કિલો વજન ઘટાડવા માટે સાક્ષીએ અત્યંત કડક ડાયટ ફોલો કર્યું. તેણે 1 મહિનાથી વધુ સમય સુધી રોટલીને સ્પર્શ પણ કર્યો નહોતો અને માત્ર ફણગાવેલા કઠોળ, દહીં અને થોડા પનીરના સહારે સખત ટ્રેનિંગ લીધી હતી.

વધુ વાંચો : 'પહેલા એરપોર્ટના નામ એક જ પરિવાર પર રખાતાં, અમારી સરકારે પરંપરા બદલી- PM મોદી

પ્રિયાનું શાનદાર કમબેક અને ગોલ્ડ

સાક્ષીના વિજય બાદ પ્રિયા ઘનઘસે મહિલાઓની 60 કિગ્રા કેટેગરીમાં પોતાનો દમખમ બતાવ્યો. પ્રિયાનો સામનો કેનેડાની મેરી બાથેલ અલ અહમદી સામે થયો હતો. પ્રથમ રાઉન્ડ ગુમાવ્યા બાદ પ્રિયાએ જબરદસ્ત વાપસી કરી અને બાકીના બંને રાઉન્ડ પોતાના નામે કરીને ગોલ્ડ મેડલ પર કબ્જો જમાવ્યો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ