સ્પોર્ટ્સ / CWG 2026 માં ભારતનો દબદબો: 3 કલાકમાં 3 ગોલ્ડ સહિત 7 મેડલ સાથે મેડલ ટેલીમાં મારી મોટી છલાંગ!

કોમનવેલ્થ ગેમ્સ 2026 નો 10 મો દિવસ ભારત માટે ગોલ્ડન સાબિત થયો છે. શનિવાર, 1 ઓગસ્ટના રોજ ભારતીય એથ્લેટ્સના શાનદાર પ્રદર્શનના દમ પર દેશને માત્ર 3 કલાકમાં 3 સ્વર્ણ પદક સહિત કુલ 7 મેડલ મળ્યા છે. આ સાથે ભારત મેડલ ટેલીમાં ઓવરઓલ 8 ગોલ્ડ, 15 સિલ્વર અને 7 બ્રોન્ઝ સાથે કુલ 30 મેડલ જીતીને છઠ્ઠા સ્થાને પહોંચી ગયું છે, જે શુક્રવાર સુધી 10 મા સ્થાને હતું.

રિંગમાં બોક્સરોનો દબદબો (2 ગોલ્ડ, 1 સિલ્વર)

બોક્સિંગમાં ભારતીય મુક્કાબાજોએ વિરોધીઓને ધૂળ ચાટતી કરી દીધી હતી. માત્ર 15 મિનિટના અંતરમાં ભારતની બે મહિલા બોક્સરોએ સતત બે ગોલ્ડ મેડલ જીત્યા:

પ્રીતિ પવાર: મહિલાઓની 54 કિગ્રા કેટેગરીમાં કેનેડાની સ્કાર્લેટ ડેલગાડોને 5-0 થી હરાવીને દિવસનો પ્રથમ બોક્સિંગ ગોલ્ડ અપાવ્યો.

જૈસ્મિન લંબોરિયા: મહિલાઓની 57 કિગ્રા સ્પર્ધામાં નોર્ધર્ન આયર્લેન્ડની મિકેલા વોલ્શને સર્વસંમતિથી (5-0) પરાજય આપીને બોક્સિંગમાં બીજો અને ભારત માટે ઓવરઓલ સાતમો ગોલ્ડ જીત્યો.

જાદૂમણિ: પુરુષોની 55 કિગ્રા ફાઇનલમાં ઓસ્ટ્રેલિયાના ઝાઈ ડિક્સન સામે 0-5 થી હારી જતાં સિલ્વર મેડલથી સંતોષ માનવો પડ્યો.

પેરા-એથ્લેટિક્સ શોટ પુટમાં ગોલ્ડ અને સિલ્વરનો કબ્જો

પેરા-એથ્લેટિક્સના શોટ પુટ (F57) ઈવેન્ટમાં ભારતીય ખેલાડીઓએ ટોચના બંને સ્થાનો પર કબજો જમાવ્યો:

સોમન રાણા: પોતાના બીજા પ્રયાસમાં 13.40 મીટરનો સર્વશ્રેષ્ઠ થ્રો ફેંકીને ભારતને આઠમો ગોલ્ડ મેડલ અપાવ્યો.

શુભમ જુયાલ: પોતાના અંતિમ પ્રયાસમાં 13.28 મીટરના થ્રો સાથે સિલ્વર મેડલ પોતાના નામે કર્યો.

ટ્રિપલ જમ્પમાં ડબલ ધમાકો

પુરુષોની ટ્રિપલ જમ્પ સ્પર્ધામાં ભારતે બે મેડલ મેળવ્યા:

પ્રવીણ ચિત્રાવેલ: 16.58 મીટરની છલાંગ લગાવીને સિલ્વર મેડલ જીત્યો.

સેલ્વા પ્રભુ: 16.52 મીટરના પ્રયાસ સાથે બ્રોન્ઝ મેડલ પોતાના નામે કર્યો.

ગોલ્ડ મેડલ જીતનાર ભારતીય ખેલાડીઓની યાદી

• મીરાબાઈ ચાનૂ – મહિલા 48 કિગ્રા (વેટલિફ્ટિંગ)
• શર્મિલા ધનખડ – મહિલા શોટ પુટ F57 (પેરા એથ્લેટિક્સ)
• દિલીપ મહાદૂ ગાવિત – પુરુષ 100 મીટર T47 (પેરા એથ્લેટિક્સ)
• અસ્મિતા ડે – મહિલા 48 કિગ્રા (જુડો)
• હર્ષ સિંહ – પુરુષ 60 કિગ્રા (જુડો)
• પ્રીતિ પવાર – મહિલા 54 કિગ્રા (બોક્સિંગ)
• જૈસ્મિન લંબોરિયા – મહિલા 57 કિગ્રા (બોક્સિંગ)
• સોમન રાણા – પુરુષ શોટ પુટ F57 (પેરા એથ્લેટિક્સ)

અન્ય રમતોમાં ભારતનું પ્રદર્શન

જુડો: મહિલાઓની 63 કિગ્રા શ્રેણીમાં ઉન્નતિ શર્માએ ન્યુઝીલેન્ડની કોના ક્રિસ્ટીને હરાવીને સેમિફાઇનલમાં પ્રવેશ કર્યો છે. જ્યારે હર્ષ તોકસ (81 કિગ્રા), ઇનુનગામ્બી તખેલાબામ (70 કિગ્રા) અને કરણજીત સિંહ માન (90 કિગ્રા) ક્વાર્ટર ફાઇનલ હારી ગયા છે, જોકે તેમની પાસે રેપચેજ દ્વારા બ્રોન્ઝ જીતવાની તક રહેશે.

વધુ વાંચો : 'પહેલા એરપોર્ટના નામ એક જ પરિવાર પર રખાતાં, અમારી સરકારે પરંપરા બદલી- PM મોદી

સાયકલિંગ (સપ્રિન્ટ): ડેવિડ બેકહામ, રોનાલ્ડો સિંહ અને રોહિત સિંહ ટોપ 16 માં જગ્યા બનાવી શક્યા ન હતા અને સ્પર્ધામાંથી બહાર થઈ ગયા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ