હળવદ / જોર તો જુઓ વરસાદનું! ફસાયેલા લોકોને બચાવવા ગયેલી ટીમ ખુદ ફસાઈ, પછી શું બન્યું?

મોરબીના હળવદમાં ભારે વરસાદથી જળબંબાકારની સ્થિતિ સર્જાઈ છે. આવી સ્થિતિ વચ્ચે લોકોને બચાવવા ગયેલી ટીમને ખુદ ફસાવાનો વારો આવ્યો હતો. હળવદના જૂના માલણીયાદમાં ખેતરે ગયા બાદ સતત પાણીની આવક 2 મહિલા સહિત 5 લોકો ફસાયા હતા.

રેસ્ક્યૂ માટે પહોંચેલી ફાયરની ટીમ પણ ફસાઈ

ચોંકાવનારુ તો એ બન્યું કે 5 લોકોને બચાવવા ગયેલી ફાયર વિભાગની ટીમ પણ ખુદ ફસાઈ હતી તેમને પણ અટકવું પડ્યું હતું. પાણીને લીધે ફાયર વિભાગની ટીમ આગળ ન વધી શકી નહોતી. ભારે વરસાદથી જૂનું માલણીયાદ ગામ સંપર્કવિહોણું બન્યું હતું.

હવામાન વિભાગે 6 જિલ્લામાં રેડ એલર્ટ કર્યુ જાહેર

ગુજરાતમાં છેલ્લા કેટલાક દિવસોથી વરસી રહેલા ભારે વરસાદ વચ્ચે હવે સ્થિતિમાં થોડો સુધારો જોવા મળી રહ્યો છે. હવામાન વિભાગના તાજા અનુમાન મુજબ રાજ્યમાં અતિભારે વરસાદનો ખતરો મોટાભાગે ટળી ગયો છે. હાલ માત્ર 6 જિલ્લાઓ માટે રેડ એલર્ટ જાહેર કરવામાં આવ્યું છે. અમદાવાદ, આણંદ, ભાવનગર, બોટાદ, સુરેન્દ્રનગર અને રાજકોટ જિલ્લામાં ભારે વરસાદની સંભાવના વ્યક્ત કરવામાં આવી છે. બીજી તરફ બનાસકાંઠા, વાવ-થરાદ, પાટણ, મહેસાણા સહિત કુલ 11 જિલ્લાઓમાં મધ્યમથી ભારે વરસાદની આગાહી સાથે ઓરેન્જ એલર્ટ જાહેર કરવામાં આવ્યું છે. લોકોને હવામાન વિભાગની સૂચનાઓનું પાલન કરવા અને જરૂરી સાવચેતી રાખવા અપીલ કરવામાં આવી છે.

વધુ વાંચો : ગુજરાતમાં સાર્વત્રિક વરસાદ, હજી 6 જિલ્લામાં રેડ એલર્ટ, 11 જિલ્લામાં ઓરેન્જ એલર્ટ

સાયલા અને આસપાસના વિસ્તારોમાં ધોધમાર વરસાદ

સુરેન્દ્રનગર જિલ્લામાં મેઘરાજાએ જોરદાર એન્ટ્રી કરતાં સાયલા અને આસપાસના વિસ્તારોમાં ધોધમાર વરસાદ વરસ્યો હતો. સાયલા પંથકમાં અંદાજે 5 ઈંચ જેટલો વરસાદ નોંધાતા જનજીવન પર અસર જોવા મળી હતી. સાયલા ઉપરાંત નવા સુદામડા, થોરિયારી, કેરાળા સહિતના ગામોમાં પણ ભારે વરસાદ વરસ્યો હતો. સતત વરસાદને કારણે નીચાણવાળા વિસ્તારોમાં પાણી ભરાઈ ગયા હતા, જ્યારે ખેતરોમાં પણ પાણી ભરાતા ઉભા પાકને નુકસાન થવાની ખેડૂતોમાં ચિંતા વધી છે. બીજી તરફ વરસાદથી વાતાવરણમાં ઠંડક પ્રસરી હતી અને સ્થાનિક પ્રશાસન પરિસ્થિતિ પર નજર રાખી રહ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ