બિઝનેસ / શું કૈજાદ ભરૂચા બનશે HDFCના નવા CEO? જાણો કોણ છે કૈજાદ ભરૂચા અને CEOની રેસમાં અન્ય કોણ-કોણ સામેલ છે?

ભારત ક્ષેત્રની સૌથી મોટી પ્રાઇવેટ લૅન્ડર HDFC બેંક ઓક્ટોબર મહિના સુધીમાં પોતાના નવા એમડી (MD) અને સીઇઓ (CEO)ના નામની જાહેરાત કરી શકે છે. વર્તમાન એમડી અને સીઇઓ શશિધર જગદીશનનો બીજો કાર્યકાળ 26 ઓક્ટોબર 2026ના રોજ પૂર્ણ થઈ રહ્યો છે અને તેમણે આ પદ પર આગળ ન વધવાનો નિર્ણય લીધો છે. બેંક બોર્ડ તરફથી તેમના ઉત્તરાધિકારીની પસંદગી પ્રક્રિયા ઝડપી બનાવવામાં આવી છે.

કૈજાદ ભરુચાનું નામ શા માટે સૌથી આગળ?

બેંકના ડેપ્યુટી મેનેજિંગ ડિરેક્ટર કૈજાદ ભરુચાને શશિધર જગદીશનના સંભવિત ઉત્તરાધિકારી તરીકે જોવામાં આવી રહ્યા છે. ભરુચા બેંકના અનુભવી અધિકારીઓમાંના એક છે અને તેઓ હાલમાં રિટેલ તથા હોલસેલ બંને બિઝનેસ સેગમેન્ટનું સફળતાપૂર્વક નેતૃત્વ કરી રહ્યા છે. રિઝર્વ બેંક ઓફ ઇન્ડિયા (RBI)ના નિયમો અનુસાર ફુલ-ટાઇમ ડિરેક્ટરનો મહત્તમ કાર્યકાળ 15 વર્ષનો હોઈ શકે છે અને ભરુચાનો આ સમયગાળો 2029માં પૂર્ણ થાય છે. તેથી તેઓ આ નિયમ મુજબ સંપૂર્ણપણે પાત્ર ઠરે છે.

RBI નીતિ અને બાહ્ય ઉમેદવારોની તલાશ

RBIના નિયમ મુજબ બેંકે CEO પદ માટે એક કરતાં વધુ ઉમેદવારોના નામ મોકલવાના હોય છે, જેના આધારે કેન્દ્રીય બેંક આખરી નિર્ણય લે છે. સૂત્રોના જણાવ્યા અનુસાર HDFC બેંક આંતરિક દાવેદાર ઉપરાંત બાહ્ય ઉમેદવારોની શોધ પણ કરી રહી છે.

છેલ્લા છ મહિનામાં ટોચના મેનેજમેન્ટમાં ઉથલપાથલ

HDFC બેંક માટે વિતેલા કેટલાક મહિના પડકારજનક રહ્યા છે. માર્ચ મહિનામાં બેંકના ચેરમેન અતનુ ચક્રવર્તીએ રાજીનામું આપ્યું હતું. બાદમાં થયેલી બાહ્ય કાનૂની સમીક્ષામાં ગવર્નન્સ સંબંધિત આરોપો સામે કોઈ પુરાવા મળ્યા ન હતા, પરંતુ ડિપોઝિટ પ્રાઇસિંગના એક કિસ્સામાં કાર્યવાહી થતાં લીડરશિપ પર દબાણ વધ્યું હતું.

વધુ વાંચો : ગુજરાતમાં ભાજપ નેતાએ જ રક્ષાબંધનના દિવસે સાડીથી ગળેફાંસો ખાધો, દીકરીઓનો તહેવાર માતમમાં ફેરવાયો

નવા CEO સામેના મુખ્ય પડકારો

ચાલુ વર્ષે HDFC બેંકના શેરમાં આશરે 27% નો ઘટાડો નોંધાયો છે. નવા વાઇસ પ્રેસિડેન્ટ/CEOએ શેરના ભાવ સ્થિર કરવા પડશે. માર્ચ 2023માં HDFC લિમિટેડ સાથે થયેલા ઐતિહાસિક મર્જરનો ધાર્યો લાભ રોકાણકારોને હજુ મળ્યો નથી. વિદેશી રોકાણકારોનો વિશ્વાસ જીતવો એ નવી લીડરશિપ માટે પ્રાથમિકતા રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ