National / 31 ઓગસ્ટે સુપ્રીમ કોર્ટમાં મહત્વની સુનાવણી, પેટ્રોલ પંપ પર ઇથેનોલનું પ્રમાણ દર્શાવવાની માંગ

જ્યારે તમે તમારી કાર કે બાઇકમાં પેટ્રોલ ભરાવવા માટે પેટ્રોલ પંપ પર જાઓ છો ત્યારે સામાન્ય રીતે તમારું ધ્યાન મીટર શૂન્યથી શરૂ થાય છે કે નહીં અને કેટલું પેટ્રોલ ભરાયું તેના પર જ હોય છે. પરંતુ પેટ્રોલમાં ખરેખર કેટલું ઇથેનોલ ભેળવવામાં આવ્યું છે તે જાણવાનો કોઈ સરળ રસ્તો નથી. પેટ્રોલમાં 10 ટકા ઇથેનોલ છે કે 20 ટકા, તેની સ્પષ્ટ માહિતી ગ્રાહકને નોઝલ પર દેખાતી નથી. હવે આ જ મુદ્દો સુપ્રીમ કોર્ટ સુધી પહોંચ્યો છે અને આ મામલે 31 ઓગસ્ટે સુનાવણી થવાની છે.

નરેન્દ્ર કુમાર ગોસ્વામીએ E20 પેટ્રોલમાં ઇથેનોલ ભેળવવા અંગે સુપ્રીમ કોર્ટમાં અરજી દાખલ કરી છે. અરજીમાં ખાસ માંગ કરવામાં આવી છે કે પેટ્રોલ પંપના નોઝલ પર પેટ્રોલમાં ભેળવવામાં આવેલા ઇથેનોલનું પ્રમાણ સ્પષ્ટ રીતે લખવામાં આવે. સુપ્રીમ કોર્ટ 31 ઓગસ્ટના રોજ આ અરજી પર સુનાવણી કરશે. 31 ઓગસ્ટ માટેની કોર્ટની કારણ યાદી પ્રમાણે આ મામલો જસ્ટિસ એમ.એમ. સુંદરેશ અને પ્રસન્ના બી. વરાલેની બેન્ચ સમક્ષ રજૂ થશે.

માત્ર પેટ્રોલ પંપ પર ઇથેનોલની ટકાવારી દર્શાવવા સુધી જ સીમિત

મામલો માત્ર પેટ્રોલ પંપ પર ઇથેનોલની ટકાવારી દર્શાવવા સુધી જ સીમિત નથી. અરજીમાં સરકારને એ પણ પૂછવામાં આવ્યું છે કે દેશની દરેક કાર અને બાઇક E20 માટે તૈયાર છે કે નહીં. જો કોઈ વાહન E20 પેટ્રોલ માટે યોગ્ય ન હોય તો તેના માલિકો માટે કયા વિકલ્પો ઉપલબ્ધ છે તેની પણ સ્પષ્ટ માહિતી આપવાની માંગ કરવામાં આવી છે.

શના દરેક પેટ્રોલ પંપના ડિસ્પેન્સિંગ નોઝલ પર પેટ્રોલમાં ઇથેનોલનું પ્રમાણ

અરજીમાં દેશના દરેક પેટ્રોલ પંપના ડિસ્પેન્સિંગ નોઝલ પર પેટ્રોલમાં ઇથેનોલનું પ્રમાણ સ્પષ્ટ રીતે દર્શાવવાની માંગ કરવામાં આવી છે. સાથે જ વેચાતા પેટ્રોલની ઇથેનોલ ટકાવારી દરેક ઇંધણ બિલ પર પણ સ્પષ્ટ અને વાંચી શકાય તે રીતે લખવાની માંગ કરવામાં આવી છે. આનાથી ગ્રાહકોને તેઓ જે પેટ્રોલ ખરીદી રહ્યા છે તેમાં કેટલું ઇથેનોલ છે તેની સીધી માહિતી મળશે અને તેઓ પોતાના વાહન માટે યોગ્ય ઇંધણ પસંદ કરી શકશે.

દરેક કાર અને બાઇક માટે ડેટાબેઝની માંગ

અરજીમાં કેન્દ્ર સરકાર અને સંબંધિત વિભાગોને એક સત્તાવાર અને જાહેર વાહન સુસંગતતા ડેટાબેઝ બનાવવાનો પણ નિર્દેશ આપવાની માંગ કરવામાં આવી છે. આ ડેટાબેઝમાં વાહનનું ઉત્પાદન, મોડેલ, એન્જિનનો પ્રકાર અને ઉત્પાદન વર્ષ પ્રમાણે માહિતી હોવી જોઈએ. કયું વાહન કયા ઇથેનોલ મિશ્રણવાળા પેટ્રોલ માટે યોગ્ય છે અને કયું વાહન યોગ્ય નથી તેની માહિતી તેમાં ઉપલબ્ધ કરાવવાની માંગ છે.

આ ડેટાબેઝ લોકોને ઓનલાઈન ઉપલબ્ધ કરાવવાની પણ માંગ કરવામાં આવી છે. જેથી વાહન માલિક પોતાના વાહનની માહિતી દાખલ કરીને જાણી શકે કે તેના માટે E20 અથવા અન્ય ઇથેનોલ મિશ્રિત પેટ્રોલ યોગ્ય છે કે નહીં. અરજીમાં પેટ્રોલિયમ અને કુદરતી ગેસ મંત્રાલય, માર્ગ પરિવહન અને હાઇવે મંત્રાલય તથા ભારતીય માનક બ્યુરોના પ્રતિનિધિઓ ઉપરાંત ઓટોમોબાઇલ એન્જિનિયરોને સામેલ કરીને એક સ્વતંત્ર નિષ્ણાત સમિતિ બનાવવાની પણ માંગ કરવામાં આવી છે.

E20ની અસર અને તેની સુસંગતતાની તપાસ કરે અને જાહેર અહેવાલ તૈયાર કરે

આ સમિતિ હાલના વાહનો પર E20ની અસર અને તેની સુસંગતતાની તપાસ કરે અને જાહેર અહેવાલ તૈયાર કરે તેવી માંગ છે. તેમાં માત્ર લેબોરેટરી ટેસ્ટ જ નહીં, પરંતુ હાલમાં રસ્તા પર ચાલી રહેલા અલગ-અલગ ઉંમર અને પ્રકારના વાહનો પર E20ની અસરનો અભ્યાસ કરવાની વાત પણ કરવામાં આવી છે. નોંધનીય છે કે સરકારે અગાઉ દાવો કર્યો છે કે લેબોરેટરી ટેસ્ટમાં E20 પેટ્રોલ વાહનો માટે સંપૂર્ણપણે યોગ્ય હોવાનું સામે આવ્યું છે.

માઇલેજ અને જાળવણી ખર્ચનો પણ અભ્યાસ

અરજીમાં નિષ્ણાત સમિતિ દ્વારા E20ની વાહનો પર થતી અસરની સંપૂર્ણ તપાસ કરવાની માંગ કરવામાં આવી છે. તેમાં અલગ-અલગ વર્ષના વાહનોમાં માઇલેજ, જાળવણી ખર્ચ, વીમો અને વોરંટી કવરેજ પર થતી અસર અંગે વિગતવાર માહિતી આપવાનો સમાવેશ થાય છે. આ સાથે E20ની પર્યાવરણીય અસરનો પણ અભ્યાસ કરવાની માંગ છે. તેમાં વાહનોમાંથી થતા ઉત્સર્જન ઉપરાંત ઇથેનોલના ઉત્પાદન માટે વપરાતા પાણીની માત્રાનો પણ સમાવેશ કરવાની વાત કરવામાં આવી છે.

E20 સંબંધિત દસ્તાવેજો કોર્ટમાં રજૂ કરવાની માંગ

અરજીમાં સંબંધિત અધિકારીઓને E20ના ફરજિયાત અમલીકરણ સાથે જોડાયેલા તમામ દસ્તાવેજો સુપ્રીમ કોર્ટ સમક્ષ રજૂ કરવાનો નિર્દેશ આપવાની પણ માંગ કરવામાં આવી છે. તેમાં સરકારી નીતિ ફાઇલો, ટેક્નિકલ અભ્યાસ, વાહન સુસંગતતા રિપોર્ટ, સલામતી ધોરણો, ગ્રાહકો માટેની સલાહ અને જાહેર પરામર્શ સંબંધિત દસ્તાવેજોનો સમાવેશ થાય છે. અરજીમાં એમ પણ કહેવામાં આવ્યું છે કે E20 અંગે લેવાયેલા નિર્ણય પાછળનો ટેક્નિકલ અને નીતિગત આધાર જાહેર રીતે સ્પષ્ટ થવો જોઈએ.

જૂના વાહનો માટે સંક્રમણ યોજના જરૂરી

અરજીમાં જૂના અને E20 પેટ્રોલ માટે સુસંગત ન હોય તેવા વાહનો માટે પારદર્શક સંક્રમણ માળખું બનાવવાની પણ માંગ કરવામાં આવી છે. જૂના વાહન માલિકો માટે અલગ વ્યવસ્થા કરવામાં આવે તેવી વાત કરવામાં આવી છે. જ્યાં ટેક્નિકલ, આર્થિક અને લોજિસ્ટિક રીતે શક્ય હોય ત્યાં ઓછા ઇથેનોલ મિશ્રણવાળા પેટ્રોલનો વિકલ્પ વિચારવાની પણ માંગ કરવામાં આવી છે.

આ પણ વાંચો : 13 વર્ષની IAS સેવા બાદ દિવ્યા મિત્તલે આપ્યું રાજીનામું, કહ્યું- ‘પોતાના માટે જોયેલા સપના પૂરા થયા, હવે લોકો માટે...

જૂના વાહનો સૌથી મોટી ચિંતા

આ સમગ્ર ચર્ચામાં રસ્તા પર પહેલેથી ચાલી રહેલા જૂના પેટ્રોલ વાહનો સૌથી મોટી ચિંતાનો વિષય છે. ઓટો ઉદ્યોગના મતે એપ્રિલ 2023 પછી ઉત્પાદિત અને વેચાયેલા પેટ્રોલ વાહનો સંપૂર્ણપણે E20 માટે તૈયાર છે, કારણ કે BS6 ફેઝ 2 ઉત્સર્જન નિયમો હેઠળ E20 પાલન ફરજિયાત કરવામાં આવ્યું છે. પરંતુ એપ્રિલ 2023 પહેલાં વેચાયેલા મોટાભાગના પેટ્રોલ વાહનોની સ્થિતિ અલગ છે. ઉદાહરણ તરીકે દિલ્હી-NCRમાં પેટ્રોલ વાહનો માટે 15 વર્ષની વય મર્યાદા નક્કી કરવામાં આવી છે. એટલે માર્ચ 2023માં બનેલી પેટ્રોલ કાર વર્તમાન નિયમો મુજબ માર્ચ 2038 સુધી રસ્તા પર ચાલી શકે છે. ઘણા લોકોએ એપ્રિલ 2023 પહેલાં નવી કાર ખરીદી હતી અને આ વાહનો આજે માત્ર 3થી 4 વર્ષ જૂના છે. વાહનો સારી સ્થિતિમાં છે અને લોકો તેનો રોજ ઉપયોગ કરે છે. પરંતુ આવા વાહનોમાં E20 પેટ્રોલના ઉપયોગને લઈને સવાલો ઉઠી રહ્યા છે. હવે સૌની નજર 31 ઓગસ્ટે સુપ્રીમ કોર્ટમાં થનારી સુનાવણી પર રહેશે. E20 પેટ્રોલ અંગે વાહન માલિકોને કેટલી માહિતી આપવી ફરજિયાત હોવી જોઈએ અને જૂના વાહનો માટે ઓછા ઇથેનોલ મિશ્રણવાળા પેટ્રોલની કોઈ વ્યવસ્થા કરી શકાય કે નહીં, તે મુદ્દે કોર્ટનું વલણ મહત્વનું બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ