ગુજરાત / અમદાવાદમાં હવે પાણી-ગટર કનેક્શન માટે ઓનલાઇન અરજી ફરજિયાત, ફી પણ ઓનલાઈન ભરાશે

શહેરમાં પાણી અને ગટર કનેક્શન મેળવવા માંગતા નાગરિકો માટે હવે પ્રક્રિયા વધુ ઓનલાઇન બની રહી છે. મ્યુનિ.ની વેબસાઇટ મારફતે નાગરિકો હવે નવા પાણી કનેક્શન અથવા ગટર કનેક્શન માટે ઓનલાઇન અરજી કરી શકશે. આ માટે મ્યુનિ.ના પોર્ટલ પર ખાસ વ્યવસ્થા ઊભી કરવામાં આવી છે. એટલે કે, કનેક્શન મેળવવા માટેની અરજીની પ્રક્રિયા હવે ઓનલાઇન જ કરી શકાશે.

નાગરિકો મ્યુનિ.ની વેબસાઇટ પર જઈને પાણીના જોડાણ અથવા ડ્રેનેજ જોડાણ માટે અરજી કરી શકશે. અરજી કરતી વખતે જરૂરી દસ્તાવેજો પીડીએફ ફોર્મેટમાં ઓનલાઇન અપલોડ કરવાના રહેશે. અરજી સબમિટ કર્યા બાદ અરજદારને તેની જાણ તેમના ઇમેઇલ અથવા ફોન નંબર પર મેસેજ દ્વારા કરવામાં આવશે. જો અરજીમાં કોઈ દસ્તાવેજ ખૂટતો હશે તો તેની માહિતી પણ મ્યુનિ. દ્વારા મેસેજ મારફતે આપવામાં આવશે.

પોતાની અરજી ક્યાં સુધી પહોંચી છે તેની માહિતી પણ ઓનલાઇન

આ ઉપરાંત નાગરિકો પોતાની અરજી ક્યાં સુધી પહોંચી છે તેની માહિતી પણ ઓનલાઇન મેળવી શકશે. એટલે કે અરજી કર્યા બાદ ઓફિસમાં વારંવાર જઈને માહિતી મેળવવાની જરૂર નહીં પડે. પોર્ટલ પર જ અરજીનું સ્ટેટસ ટ્રેક કરી શકાશે. કનેક્શન માટેની જરૂરી ફી પણ નાગરિકો ઓનલાઇન ચૂકવી શકશે. આ રીતે અરજી, દસ્તાવેજો, ફી અને સ્ટેટસ જેવી અનેક પ્રક્રિયા ઓનલાઇન કરવામાં આવી છે.

છેલ્લા વર્ષની પ્રોપર્ટી ટેક્સની પહોંચ જરૂરી

નવું પાણી અથવા ગટર કનેક્શન મેળવવા માટે નાગરિકોએ છેલ્લા વર્ષની પ્રોપર્ટી ટેક્સ ભર્યાની પહોંચ પણ રજૂ કરવાની રહેશે. આ પહોંચ અરજીની પ્રક્રિયા દરમિયાન જરૂરી પુરાવા તરીકે આપવાની રહેશે. મ્યુનિ. દ્વારા નક્કી કરવામાં આવેલા અન્ય જરૂરી દસ્તાવેજો પણ ઓનલાઇન અપલોડ કરવા પડશે. નવા પાણી કે ગટર કનેક્શન માટે ઓળખના પુરાવા તરીકે આધાર કાર્ડ, ચૂંટણી કાર્ડ અને પાસપોર્ટ સાઇઝનો ફોટો આપવાનો રહેશે. આ ઉપરાંત સ્થળનો નકશો અને BU પરમિશન સહિતના વિવિધ દસ્તાવેજો પણ ઓનલાઇન અપલોડ કરવા પડશે. જો મિલકત સોસાયટીમાં આવેલી હોય તો સોસાયટીનું નો ઓબ્જેક્શન સર્ટિફિકેટ (NOC) પણ રજૂ કરવાનું રહેશે. પાણી અથવા ગટર કનેક્શનના કામ માટે પ્લમ્બરનું લાઇસન્સ પણ જરૂરી રહેશે. એટલે અરજી કરતા પહેલા નાગરિકોએ તમામ જરૂરી દસ્તાવેજો તૈયાર રાખવા પડશે, જેથી અરજી કરતી વખતે કોઈ મુશ્કેલી ન પડે.

આ પણ વાંચો : ધંધુકા રેલવે ઓવરબ્રિજ પર અકસ્માત, અજાણ્યા વાહનની ટક્કરથી 2 યુવાનોના ઘટનાસ્થળે જ મોત

ઘર-ઘર નળ યોજના છતાં કેટલાક વિસ્તારો ટેન્કર પર નિર્ભર

ઉલ્લેખનીય છે કે ઘર-ઘર નળ યોજના અમલી બન્યા બાદ પણ શહેરના ઘણા વિસ્તારોમાં નાગરિકો હજુ ટેન્કરના ભરોસે છે. આવા વિસ્તારોમાં પાણીની જરૂરિયાત માટે ટેન્કર પર આધાર રાખવો પડે છે. હવે નવા પાણી કનેક્શન માટે ઓનલાઇન અરજીની સુવિધા શરૂ થતાં નાગરિકોને ઘરે બેઠા અરજી કરવાની તક મળશે. આ નવી વ્યવસ્થાથી પાણી અને ગટર કનેક્શનની અરજી પ્રક્રિયા વધુ સરળ અને પારદર્શક બનશે. નાગરિકો ઓનલાઇન અરજી કરી શકશે, જરૂરી દસ્તાવેજો અપલોડ કરી શકશે, કનેક્શનની ફી ઓનલાઇન ભરી શકશે અને ત્યારબાદ અરજીનું સ્ટેટસ પણ ઓનલાઇન ટ્રેક કરી શકશે. સાથે જ મ્યુનિ. તરફથી કોઈ દસ્તાવેજ ખૂટતો હશે તો તેની જાણ પણ મેસેજ દ્વારા કરવામાં આવશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ