Gold Silver Price / ના હોય! સોનું ₹4000 અને ચાંદી ₹9000 સસ્તી થઈ? USથી આવ્યા મહત્વના સમાચાર

સોના-ચાંદીના ભાવમાં શુક્રવારે અચાનક મોટો ઘટાડો જોવા મળ્યો છે.MCX પર સોનું ₹4,000 સુધી અને ચાંદી ₹9,000 સુધી ગગડતાં બજારમાં હલચલ મચી ગઈ.અમેરિકાથી આવેલા મહત્વના સમાચારને કારણે કિંમતી ધાતુઓના ભાવ પર દબાણ જોવા મળ્યું છે.શુક્રવારે કોમોડિટી માર્કેટમાં સોના અને ચાંદીના ભાવમાં મોટો ઘટાડો જોવા મળ્યો હતો. MCX પર સોનું પોતાના રેકોર્ડ હાઈથી લગભગ ₹4,000 સુધી ગગડ્યું હતું જ્યારે ચાંદીમાં પણ ₹9,000 સુધીનો ઘટાડો નોંધાયો હતો. જોકે થોડા સમય બાદ બંને કિંમતી ધાતુઓના ભાવમાં થોડી રિકવરી જોવા મળી હતી. અમેરિકાથી આવેલા મહત્વના સમાચાર બાદ રોકાણકારોમાં ચિંતા વધતાં સોના-ચાંદી પર દબાણ જોવા મળ્યું હતું.

MCX પર સોના-ચાંદીના ભાવમાં ઘટાડો

MCX પર 5 ઓક્ટોબર વાયદા માટે સોનાનો ભાવ ₹2,596 એટલે કે 1.63 ટકા ઘટીને ₹1,56,400 પ્રતિ 10 ગ્રામ પર આવી ગયો હતો. જ્યારે 4 સપ્ટેમ્બર વાયદાની ચાંદી ₹4,000 એટલે કે 1.66 ટકા ઘટીને ₹2,36,651 પ્રતિ કિલો પર પહોંચી હતી.

દિલ્હીમાં સોનું ₹3,300 સસ્તું

શુક્રવારે દિલ્હીના બજારમાં 24 કેરેટ 99.9 ટકા શુદ્ધતાવાળા સોનાના ભાવમાં ₹3,300નો ઘટાડો થયો હતો. સોનું ઘટીને ₹1,62,400 પ્રતિ 10 ગ્રામ થયું હતું. અગાઉના સત્રમાં સોનાનો ભાવ ₹1,65,700 હતો. આમ ત્રણ દિવસમાં સોનું ₹4,700 એટલે કે લગભગ 3 ટકા સસ્તું થયું છે.

આ પણ વાંચોઃ મોંઘુ થશે પેટ્રોલ-ડીઝલ? હોર્મુઝ સંકટથી ભારતનો તેલ-ગેસ આયાત ખર્ચ પહોંચ્યો કરોડોમાં

ચાંદીના ભાવમાં પણ મોટો ઘટાડો

દિલ્હીના સ્થાનિક બજારમાં ચાંદીના ભાવમાં પણ ₹5,000નો ઘટાડો નોંધાયો હતો. ચાંદી ઘટીને ₹2,45,500 પ્રતિ કિલો થઈ હતી. અગાઉના કારોબારી સત્રમાં ચાંદીનો ભાવ ₹2,50,500 પ્રતિ કિલો હતો.

USના સમાચારથી કેમ ઘટ્યા ભાવ?

સોના-ચાંદીના ભાવમાં ઘટાડા પાછળ અમેરિકાની વ્યાજદર નીતિને લઈને આવેલી ચિંતા મહત્વનું કારણ માનવામાં આવી રહી છે. ફેડરલ રિઝર્વના પ્રમુખ કેવિન વાર્શના નિવેદન બાદ આગામી સમયમાં વ્યાજદરમાં વધારો થવાની આશંકા વધી છે. વ્યાજદરમાં વધારો થવાની શક્યતાથી સોના-ચાંદી પર દબાણ જોવા મળ્યું હતું.

આંતરરાષ્ટ્રીય બજારમાં પણ કડાકો

આંતરરાષ્ટ્રીય બજારમાં પણ સોના-ચાંદીના ભાવમાં મોટો ઘટાડો નોંધાયો હતો. સોનાનો ભાવ 3.43 ટકા ઘટીને 4,504.10 ડોલર પ્રતિ ઔંસ થયો હતો. જ્યારે ચાંદીનો ભાવ 4.57 ટકા ઘટીને 66.255 ડોલર પ્રતિ ઔંસ પર આવી ગયો હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ