અમદાવાદ / નરોડા GIDCની કંપનીમાં લાગી ભીષણ આગ, ફાયરની 10 ગાડીઓ ઘટનાસ્થળે, બ્રિગ્રેડ કોલ

અમદાવાદના નરોડા GIDC વિસ્તારમાં આજે ભીષણ આગની ઘટના સામે આવી છે. નરોડા GIDCના ફેઝ-3માં આવેલી એક કંપનીમાં અચાનક વિકરાળ આગ ફાટી નીકળતા સમગ્ર વિસ્તારમાં અફરાતફરીનો માહોલ સર્જાયો હતો.

10 જેટલી ફાયર વિભાગની ગાડીઓ ઘટનાસ્થળે

આગની જાણ થતાં જ ફાયર વિભાગને તાત્કાલિક જાણ કરવામાં આવી હતી. આગે વિકરાળ સ્વરૂપ ધારણ કરતા ફાયર વિભાગ દ્વારા બ્રિગેડ કોલ જાહેર કરવામાં આવ્યો હતો. ઘટનાની ગંભીરતાને ધ્યાનમાં રાખીને નરોડા, કૃષ્ણનગર અને નરોડા GIDC ફાયર સ્ટેશનની ટીમો સહિત આશરે 10 જેટલી ફાયર વિભાગની ગાડીઓ ઘટનાસ્થળે દોડી આવી હતી.

આગ પર કાબૂ મેળવવા માટે યુદ્ધના ધોરણે કામગીરી

ફાયર ફાઈટરો દ્વારા આગ પર કાબૂ મેળવવા માટે યુદ્ધના ધોરણે કામગીરી હાથ ધરવામાં આવી રહી છે. આગ કયા કારણોસર લાગી તે અંગે હાલ તપાસ ચાલી રહી છે. આગના કારણે કંપનીમાં કેટલું નુકસાન થયું છે અને કોઈ જાનહાનિ થઈ છે કે કેમ તે અંગેની સત્તાવાર વિગતોની રાહ જોવાઈ રહી છે.

આ પણ વાંચોઃ CM ભૂપેન્દ્ર પટેલ જશે દિલ્હી, કરશે વન ટૂ વન બેઠક, જાણો કેમ

મેયર હિતેશ બારોટ પણ GIDC પહોંચ્યા

દરમિયાન અમદાવાદના મેયર હિતેશ બારોટ પણ પરિસ્થિતિની સમીક્ષા કરવા નરોડા GIDC ખાતે પહોંચ્યા હતા. તેમણે ઘટનાસ્થળે ચાલી રહેલી ફાયર વિભાગની કામગીરીની માહિતી મેળવી હતી. હાલ ફાયર વિભાગની અનેક ટીમો આગને સંપૂર્ણપણે કાબૂમાં લેવા માટે સતત પ્રયાસ કરી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ