કામની વાત / ટ્રેનમાં સ્પીકર પર ફોન કોલ પર વાત કરી કે મ્યુઝિક વગાડ્યું તો આવી બન્યું, વસુલાશે મોટો દંડ

જો તમે ભારતીય રેલવેમાં મુસાફરી કરતા હોવ જે તમે કદાચ કરતા જ હશો અને જો તમે મોટેથી વાત કરો અથવા હેડફોનનો ઉપયોગ કર્યા વિના તમારા ફોન પર 'રીલ્સ' જુઓ, તો તમારે 5,000 રુપિયા સુધીનો દંડ ભરવો પડી શકે છે. એટલું જ નહીં, તમને ટ્રેનમાંથી ઉતારી પણ દેવામાં આવી શકે છે અથવા છ મહિના સુધીની જેલની સજા પણ થઈ શકે છે. ભારતીય રેલવેએ મુસાફરોને ચેતવણી આપી છે કે ટ્રેનમાં કે રેલવે પરિસરમાં હોય ત્યારે તેમણે પોતાના મોબાઈલ ફોન પર સ્પીકર મોડનો ઉપયોગ કરીને ગીતો, વીડિયો કે અન્ય કોઈ ઓડિયો વગાડવા નહીં.

TTE કરશે દંડ

મીડિયા રિપોર્ટ મુજબ, પ્રથમ વખત નિયમનો ભંગ કરવા બદલ 1,000નો દંડ થઈ શકે છે અને સંબંધિત વ્યક્તિને ટ્રેનમાંથી ઉતારી પણ દેવામાં આવી શકે છે. જો આવી વર્તણૂક ચાલુ રહે, તો દંડની રકમ વધીને 5,000 સુધી પહોંચી શકે છે અથવા તે વ્યક્તિને છ મહિના સુધીની જેલની સજા પણ થઈ શકે છે. આવા કિસ્સાઓમાં કાર્યવાહી કરવા માટે ટિકિટ એક્ઝામિનર્સ (TTEs)ને અધિકાર આપવામાં આવ્યો છે.

મુસાફરોને સલાહ આપવામાં આવે છે કે તેઓ અન્ય મુસાફરોને ખલેલ ન પહોંચે તે માટે ઈયરફોનનો ઉપયોગ કરે, અને ફોન પરની વાતચીત ટૂંકી તથા ધીમા અવાજે રાખે. જોકે આ વાત સામાન્ય લાગે છે, પરંતુ એ નોંધવું જરૂરી છે કે એસી કોચ જેવી બંધ જગ્યાઓમાં, જોરદાર રિંગટોન, હેડફોન વગર ઓડિયો વગાડવો કે ફોન પર લાંબી વાતચીત કરવી અન્ય મુસાફરો માટે મોટી પરેશાનીનું કારણ બની શકે છે.

વળી, જો તમને કોઈ ગીત ગમતું હોય, તો તેનો આનંદ જરૂર માણો પણ અન્ય મુસાફરોને શાંતિથી બેસવા કે સૂવા દો. અને તમારા દૂરના કાકાના દીકરાના મિત્ર કોઈ મોટી કંપનીમાં એક્ઝિક્યુટિવ બની ગયા છે, તે વાત આખા જગતને એકદમ મોટેથી બૂમો પાડીને જાહેર કરવાની શું જરૂર છે? મને ખબર છે, તમે કહેશો કે "હું આવું નથી કરતો," પણ તો પછી, જે લોકો આવું કરે છે તેમના વિરુદ્ધ મારે ફરિયાદ ક્યાં નોંધાવવી?

આ પણ વાંચોઃ મતદાર યાદી અપડેટ માટે ચૂંટણી પંચના નવા નિર્દેશ, SIR પછી શું છે SSR અને કેવી રીતે થશે પ્રક્રિયા?

રેલ મદદ પર ફરીયાદ કરો

જો ટ્રેનમાં મુસાફરી કરતી વખતે તમને આવી જ કોઈ પરિસ્થિતિનો સામનો કરવો પડે જ્યાં તમારી બાજુમાં બેઠેલી વ્યક્તિને વિનંતી કરવા છતાં તે તેના સોશિયલ મીડિયા રીલ્સનો અવાજ ધીમો કરવાનો ઇનકાર કરે તો તેમની સાથે દલીલબાજીમાં ઉતરવાની જરૂર નથી. તેના બદલે, તમે રેલવે સ્ટાફ અથવા TTEને જાણ કરી શકો છો, અથવા 'RailMadad' એપ કે પોર્ટલ દ્વારા ફરિયાદ નોંધાવી શકો છો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ