ગુજરાત / ગરબા રમતા ખેલૈયાઓ ખાણી-પીણીની મજા માણી ઘરે પહોંચી જશે ત્યારે આવશે ‘દૂધ-તેલ’ના રિપોર્ટ! AMCએ 148 સ્ટોલ ચેક

નવરાત્રીમાં ગરબાની રમઝટ વચ્ચે ખાણી-પીણીના સ્ટોલ પર ખેલૈયાઓની ભીડ જામે છે. મોડી રાત સુધી ગરબા રમ્યા બાદ લોકો નાસ્તો, ફાસ્ટ ફૂડ અને અન્ય ખાદ્યપદાર્થો આરોગે છે. આવા સમયે ખાદ્યસામગ્રીની ગુણવત્તા અને શુદ્ધતા જાળવવાની જવાબદારી મ્યુનિસિપલ કોર્પોરેશનના ફૂડ વિભાગની છે, જોકે વિભાગે ગરબા સ્થળોએ ચેકિંગ કરીને શંકાસ્પદ ખાદ્યપદાર્થોના નમૂના લેબોરેટરીમાં મોકલ્યા હોવા છતાં તેના રિપોર્ટ સમયસર ન આવે તો તપાસનો હેતુ કેટલો સિદ્ધ થશે તેવો સવાલ ઊભો થયો છે. ખેલૈયાઓ ખાદ્યપદાર્થો આરોગી લે અને નવરાત્રી પૂર્ણ થયા બાદ રિપોર્ટ આવે તો ખાદ્ય સુરક્ષાની આ કવાયત કેટલી અસરકારક ગણાય?

AMCના ફૂડ વિભાગે શહેરનાં આશરે ૧૫ મોટાં ગરબા સ્થળોએ આવેલા ૧૪૮ ખાણી-પીણીના સ્ટોલનું સરપ્રાઈઝ ચેકિંગ કર્યું હતું. તળવા માટે વપરાતા તેલની ગુણવત્તા તપાસવા ટીપીસી (ટોટલ પોલર કમ્પાઉન્ડ્સ) મશીનથી ૩૫ સ્થળે તપાસ કરવામાં આવી હતી. આ ઉપરાંત શંકાસ્પદ જણાયેલા ખાદ્યપદાર્થોના ૪૧ નમૂના એકત્ર કરીને વધુ તપાસ માટે પબ્લિક હેલ્થ લેબોરેટરીમાં મોકલવામાં આવ્યા હતા, જોકે આ નમૂનાઓનાં પરિણામ ક્યારે આવશે અને તેમાં કોઈ ખામી જણાય તો તાત્કાલિક શું કાર્યવાહી થશે તે મહત્ત્વનો મુદ્દો છે.

નમૂના લેવાયા પણ રિપોર્ટની રાહમાં ખાદ્ય સુરક્ષા

ખાદ્યપદાર્થોના નમૂના એકત્ર કરીને લેબોરેટરીમાં મોકલવા એ તપાસની જરૂરી પ્રક્રિયા છે, પરંતુ તહેવાર દરમિયાન વેચાતી ખાદ્યસામગ્રીની ગુણવત્તા અંગે સમયસર નિર્ણય લેવો પણ એટલો જ જરૂરી છે. લેબોરેટરીના રિપોર્ટમાં વિલંબ થાય તો ત્યાં સુધીમાં સંબંધિત ખાદ્યપદાર્થોનું વેચાણ થઈ ચૂક્યું હોવાની શક્યતા રહે છે. જો નમૂનામાં ભેળસેળ, હલકી ગુણવત્તા અથવા આરોગ્ય માટે હાનિકારક બાબત બહાર આવે તો ત્યાર બાદ દંડાત્મક કાર્યવાહી થઈ શકે, પરંતુ અગાઉ એ ખોરાક આરોગી ચૂકેલા લોકોના સ્વાસ્થ્ય સામે ઊભા થયેલા જોખમનું શું? ખાસ કરીને તેલ, દૂધ, પનીર અને અન્ય કાચામાલની ગુણવત્તા અંગે શંકા હોય ત્યારે માત્ર નમૂના લઈને પરિણામની રાહ જોવાના બદલે સ્થળ પર સ્વચ્છતા, સંગ્રહની પદ્ધતિ, ખાદ્યસામગ્રીની તાજગી અને રસોઈમાં વપરાતા તેલની સ્થિતિની પણ સઘન તપાસ જરૂરી છે. જ્યાં ગંભીર અનિયમિતતા જણાય ત્યાં નિયમો મુજબ તાત્કાલિક કાર્યવાહી થવી જોઈએ.

લાઈસન્સ વગરના સ્ટોલનું સ્થળ પર જ રજિસ્ટ્રેશન

ચેકિંગ દરમિયાન ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI)નું રજિસ્ટ્રેશન ન ધરાવતા કેટલાક સ્ટોલધારકો પાસે સ્થળ પર જ રજિસ્ટ્રેશનની પ્રક્રિયા કરાવવામાં આવી હતી. આ કામગીરીથી સ્ટોલધારકોને નિયમન હેઠળ લાવવાનો પ્રયાસ થયો છે, પરંતુ ખાદ્ય સુરક્ષાના સંદર્ભમાં રજિસ્ટ્રેશનની સાથે ખાદ્યપદાર્થોની વાસ્તવિક ગુણવત્તાની ચકાસણી પણ એટલી જ મહત્ત્વની છે. ગરબા સ્થળોએ થોડા દિવસ માટે ઊભા કરાતા સ્ટોલમાં ખાદ્યસામગ્રી ક્યાંથી આવે છે, તેનો સંગ્રહ કેવી રીતે થાય છે અને તેલનો વારંવાર ઉપયોગ થાય છે કે નહીં તેની ચકાસણી પણ જરૂરી બને છે. રજિસ્ટ્રેશનની પ્રક્રિયા પૂરી થવી અને ખાદ્યપદાર્થો સુરક્ષિત હોવા એ બંને અલગ બાબતો છે.

આ પણ વાંચો : આદિત્ય ગઢવીના રંગ મોરલા ગરબાના વિવાદમાં નવો ટ્વિસ્ટ, વિધર્મી બાઉન્સરે મહિલાની છેડતી કરી હોવાનો આરોપ

ગરબા શરૂ થાય તે પહેલાં તપાસ કેમ નહીં?

ખાદ્ય સુરક્ષાની કામગીરીને વધુ અસરકારક બનાવવા માટે ગરબા શરૂ થાય તે પહેલાં જ સ્ટોલધારકો, કાચામાલના સપ્લાયરો અને ખાદ્યસામગ્રીના સંગ્રહની વ્યવસ્થાની તપાસ થઈ શકે છે. તેલ, દૂધ, પનીર સહિતના સંવેદનશીલ ખાદ્યપદાર્થોના નમૂના અગાઉથી લઈને ચકાસણી કરવાની વ્યવસ્થા ઊભી કરવામાં આવે તો તહેવાર દરમિયાન જોખમ ઘટાડવામાં મદદ મળી શકે છે. આ ઉપરાંત શક્ય હોય ત્યાં મોબાઈલ ફૂડ ટેસ્ટિંગ લેબની મદદથી સ્થળ પર પ્રાથમિક પરીક્ષણ કરવાની વ્યવસ્થા ગોઠવી શકાય. પ્રાથમિક તપાસમાં શંકાસ્પદ જણાતા ખાદ્યપદાર્થો અંગે વધુ તપાસને પ્રાથમિકતા આપવામાં આવે તો કાર્યવાહી ઝડપી બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ