ગુજરાત / આદિત્ય ગઢવીના રંગ મોરલા ગરબાના વિવાદમાં નવો ટ્વિસ્ટ, વિધર્મી બાઉન્સરે મહિલાની છેડતી કરી હોવાનો આરોપ

ગરબાના તાલે ખેલૈયાઓ ઝૂમી રહ્યા હતા અને રંગ મોરલા કાર્યક્રમમાં ઉત્સાહનો માહોલ હતો. પરંતુ આ દરમિયાન એક એવી ફરિયાદ સામે આવી કે સમગ્ર કાર્યક્રમ વિવાદમાં આવી ગયો. એક બાઉન્સર દ્વારા મહિલા સાથે છેડતી કરવામાં આવી હોવાનો મેસેજ મળતાં વિશ્વ હિન્દુ પરિષદ અને બજરંગદળના કાર્યકરો કાર્યક્રમ સ્થળે પહોંચી ગયા હતા. ત્યારબાદ આયોજકો સાથે થયેલી ચર્ચા અને સ્ટેજ પરથી કરવામાં આવેલી જાહેરાતને લઈને વિવાદ વધુ વકર્યો છે. હવે આ સમગ્ર મામલે સિંગર આદિત્ય ગઢવીના નિવેદન સામે પણ VHP અને બજરંગદળે સવાલ ઉઠાવ્યા છે.

મહિલાની છેડતીની ફરિયાદ બાદ બજરંગદળના કાર્યકરો પહોંચ્યા

અમદાવાદ શહેરમાં યોજાયેલા રંગ મોરલા ગરબા કાર્યક્રમમાં એક બાઉન્સરે મહિલા સાથે ગેરવર્તન અને છેડતી કરી હોવાની ફરિયાદ વિશ્વ હિન્દુ પરિષદ અને બજરંગદળને મળી હતી. આ ફરિયાદ મળ્યા બાદ સંગઠનના કાર્યકરો કાર્યક્રમ સ્થળે પહોંચ્યા હતા. વિશ્વ હિન્દુ પરિષદ અને બજરંગદળના પ્રમુખ જ્વલીત મહેતાના જણાવ્યા પ્રમાણે, એક બાઉન્સરે કોઈ મહિલા સાથે ગેરવર્તન કર્યું હોવાનો મેસેજ મળ્યો હતો. જેના આધારે બજરંગદળના કાર્યકરો કાર્યક્રમના બેકસ્ટેજ વિસ્તારમાં પહોંચ્યા હતા અને આયોજકો સાથે વાતચીત કરી હતી.

ગરબામાં 13 વિધર્મી બાઉન્સર હોવાનો VHPનો દાવો

જ્વલીત મહેતાએ દાવો કર્યો છે કે રંગ મોરલા ગરબા કાર્યક્રમમાં તપાસ દરમિયાન 13 બાઉન્સર વિધર્મી હોવાનું સામે આવ્યું હતું. તેમણે જણાવ્યું કે આ બાબતને લઈને આયોજકો સાથે ચર્ચા કરવામાં આવી હતી અને તેમને બજરંગદળની વિચારધારા વિશે સમજાવવામાં આવ્યા હતા. જ્વલીત મહેતાના જણાવ્યા પ્રમાણે, નવરાત્રીના સમયમાં લવ જેહાદના કિસ્સાઓ સામે આવતા હોવાની સંગઠનની ચિંતા છે. આ કારણથી નવરાત્રી જેવા ધાર્મિક કાર્યક્રમોમાં વિધર્મી લોકોને કેમ રાખવા જોઈએ નહીં તે અંગે આયોજકો સમક્ષ પોતાની વાત રજૂ કરવામાં આવી હતી. જોકે, 13 બાઉન્સરની ધાર્મિક ઓળખ અને મહિલા સાથે થયેલી કથિત છેડતી અંગેના દાવા સંગઠન દ્વારા કરવામાં આવ્યા છે. આ આરોપોની સ્વતંત્ર પુષ્ટિ થઈ નથી.

આયોજકોની સહમતી બાદ સ્ટેજ પરથી જાહેરાત કરાઈ હોવાનો દાવો

રંગ મોરલા ગરબામાં સ્ટેજ પરથી કરવામાં આવેલી જાહેરાતને લઈને પણ વિવાદ સર્જાયો છે. આ મુદ્દે જ્વલીત મહેતાએ સ્પષ્ટતા કરતાં જણાવ્યું હતું કે બજરંગદળના કાર્યકરોએ સ્ટેજ પર કોઈ બળજબરી કરી નહોતી. તેમના જણાવ્યા પ્રમાણે, કાર્યકરો બેકસ્ટેજથી આયોજકો પાસે પહોંચ્યા હતા અને તેમની સાથે સમગ્ર મામલે ચર્ચા કરી હતી. આયોજકોએ બજરંગદળની વાત સાથે સહમતી દર્શાવી હતી અને ત્યારબાદ પોતાની રીતે વિધર્મી બાઉન્સરોને કાર્યક્રમમાંથી દૂર કર્યા હતા. જ્વલીત મહેતાએ વધુમાં જણાવ્યું હતું કે આયોજકોએ પોતે જ સ્ટેજ પરથી જાહેરાત કરી હતી. સંગઠન દ્વારા કોઈને બળજબરીપૂર્વક સ્ટેજ પર મોકલવામાં આવ્યા નહોતા કે જાહેરાત કરવા માટે દબાણ કરવામાં આવ્યું નહોતું.

સિંગર આદિત્ય ગઢવીના નિવેદન સામે VHPએ ઉઠાવ્યા સવાલ

આ સમગ્ર વિવાદમાં જાણીતા ગુજરાતી સિંગર આદિત્ય ગઢવીના નિવેદનને લઈને પણ વિશ્વ હિન્દુ પરિષદ અને બજરંગદળે નારાજગી વ્યક્ત કરી છે. જ્વલીત મહેતાએ જણાવ્યું હતું કે આદિત્ય ગઢવીએ જે નિવેદન આપ્યું છે તે યોગ્ય નથી. તેમણે દાવો કર્યો હતો કે સંગઠનના કાર્યકરો માત્ર ફરિયાદના આધારે કાર્યક્રમમાં તપાસ કરવા પહોંચ્યા હતા અને આયોજકો સાથે વાતચીત કરીને જ આગળની કાર્યવાહી કરવામાં આવી હતી. તેમણે ફરી સ્પષ્ટતા કરી હતી કે સ્ટેજ પર કોઈ પ્રકારની બળજબરી કરવામાં આવી નહોતી. આયોજકો સાથે ચર્ચા થયા બાદ તેમની સહમતીથી જ જાહેરાત કરવામાં આવી હતી. આ રીતે આદિત્ય ગઢવીના નિવેદન સામે VHP અને બજરંગદળે પોતાનો પક્ષ રજૂ કર્યો છે.

આ પણ વાંચો : અમિત શાહ આજે ગુજરાતમાં, રૂપાલમાં 81 ફૂટ ઊંચી શિવજીની પ્રતિમાનો શિલાન્યાસથી લઈને ગરબા મહોત્સવ સુધીના કાર્યક્રમો

ફરી ફરિયાદ મળશે તો રંગ મોરલામાં તપાસ કરવા જઈશું: જ્વલીત મહેતા

વિશ્વ હિન્દુ પરિષદ અને બજરંગદળના પ્રમુખ જ્વલીત મહેતાએ જણાવ્યું હતું કે ભવિષ્યમાં પણ રંગ મોરલા ગરબા કાર્યક્રમ અંગે કોઈ ફરિયાદ મળશે તો સંગઠનના કાર્યકરો ફરી ત્યાં તપાસ કરવા જશે. તેમના જણાવ્યા પ્રમાણે, મહિલાની છેડતીની ફરિયાદ મળ્યા બાદ જ કાર્યકરો કાર્યક્રમ સ્થળે પહોંચ્યા હતા. બાઉન્સરો અંગે માહિતી મેળવ્યા બાદ આયોજકો સાથે ચર્ચા કરવામાં આવી હતી અને આયોજકોએ તેમની વાત સાથે સહમતી દર્શાવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ