નેશનલ / મેજરના પોતાના જ સાથી ઓફિસર્સની પત્ની સાથે અફેર્સની ફરિયાદ! ઈન્ડિયન આર્મીનો ચોંકાવનારો કિસ્સો

Indian Army Major Extra-Marital Affair Story: આર્મી ચીફે એક મેજરને કારણદર્શક નોટિસ જારી કરી છે, જેમાં બે સાથી અધિકારીઓની પત્નીઓ સાથેના કથિત લગ્નેત્તર સંબંધો સહિત અનેક આરોપો પર તેમને સેવામાંથી બરતરફ કરવા માટે કારણદર્શક નોટિસ ફટકારી છે. મેજરે આર્મ્ડ ફોર્સિસ ટ્રિબ્યુનલમાં આને પડકારી છે, પરંતુ AFT એ કાર્યવાહી પર રોક લગાવી ન હતી. ટ્રિબ્યુનલે સેનાને આરોપોની સુનાવણી સંબંધિત તપાસ અહેવાલ અને દસ્તાવેજો આપવાનો નિર્દેશ આપ્યો હતો. મેજર હવે નોટિસનો જવાબ આપી પોતાનો પક્ષ રજૂ કરી શકે છે.

ભારતીય સેનાના શિસ્તબદ્ધ માહોલમાં હડકંપ મચી ગયો છે, જેનાથી સમગ્ર લશ્કરી દેખરેખ અને શિસ્ત જોખમમાં મુકાઈ ગઈ છે. 11મી આર્મર્ડ રેજિમેન્ટના એક હાઇ-પ્રોફાઇલ મેજર પર બે સાથી અધિકારીઓની પત્નીઓ સાથે લગ્નેત્તર સંબંધો, નશો અને ગેરવર્તણૂકના ગંભીર આરોપો મૂકવામાં આવ્યો છે. આર્મી ચીફ (COAS) એ આ હાઇ-વોલ્ટેજ ડ્રામામાં સીધી દખલ કરી મેજરને કારણદર્શક નોટિસ જારી કરી છે અને તેમને તાત્કાલિક સેવામાંથી બરતરફ કરવાની તૈયારીઓ શરૂ કરી છે.

સેના માને છે કે આ મામલો એટલો સંવેદનશીલ છે કે સામાન્ય કોર્ટ-માર્શલ કરતાં વહીવટી કાર્યવાહી એકમાત્ર વિકલ્પ છે. જોકે મેજરે કાનૂની દાવપેચનો ઉપયોગ કરીને આ નિર્ણયને આર્મ્ડ ફોર્સિસ ટ્રિબ્યુનલ (AFT) માં પડકાર્યો. ટ્રિબ્યુનલે કાર્યવાહી પર રોક લગાવવાનો સ્પષ્ટ ઇનકાર કર્યો અને મેજરને જવાબ આપવાનો નિર્દેશ આપતી નોટિસ જારી કરી.

બે અધિકારીઓની પત્નીઓ સાથે સંબંધોના આરોપો

એક ન્યૂઝમાં પ્રકાશિત થયેલા અહેવાલ મુજબ મેજર 11મી આર્મર્ડ રેજિમેન્ટના અધિકારી છે અને હાલમાં 23મી ગ્રેનેડિયર્સ સાથે જોડાયેલા છે. ઓગસ્ટ 2023માં તેમની તત્કાલીન પત્ની દ્વારા સંરક્ષણ મંત્રાલયના આર્મી હેડક્વાર્ટર ખાતે ડિસિપ્લિન એન્ડ વિજિલન્સ ડિરેક્ટોરેટમાં તેમની વિરુદ્ધ ફરિયાદ દાખલ કરવામાં આવી હતી. ફરિયાદમાં લગ્નેત્તર સંબંધો, નશાનો દુરુપયોગ અને જવાબદારીઓમાં બેદરકારીનો આરોપ મૂકવામાં આવ્યો હતો. તેમાં બે અન્ય લશ્કરી અધિકારીઓની પત્નીઓ સહિત ચાર મહિલાઓ સાથે સંબંધોનો દાવો કરવામાં આવ્યો હતો. આ બધા આરોપો ટ્રિબ્યુનલે તેના આદેશમાં સાબિત થયા નથી.

મેજરનો દાવો છે કે તપાસમાં આર્મી નિયમ 180 ની ફરજિયાત જોગવાઈઓનું પાલન કરવામાં આવ્યું ન હતું. તેમના મતે સંબંધીત મહિલાઓ અને તેમના પતિઓને નિવેદનો માટે બોલાવવામાં આવ્યા ન હતા. તેમણે મોબાઇલ ફોન, લેપટોપ અને પેન ડ્રાઇવ જપ્ત કરવામાં અને તેમના નિવાસસ્થાનની શોધમાં અનિયમિતતાનો પણ આરોપ લગાવ્યો હતો.

આ પણ વાંચોઃ નેશનલ / CJP ની 'તિરંગા યાત્રા' પહેલા દિલ્હીમાં ગરમાયું વાતાવરણ: કનૉટ પ્લેસનું સેન્ટ્રલ પાર્ક બે દિવસ માટે બંધ, પોલીસની કડક ચેતવણી!

છૂટાછેડા પછી ભૂતપૂર્વ પત્નીએ ફરિયાદ પાછી ખેંચી લીધી

મેજર અને તેમની પત્નીના 30 માર્ચ 2026 ના અનંતનાગ, જ્યુડિશિયલ મેજિસ્ટ્રેટ ફર્સ્ટ ક્લાસના આદેશથી પરસ્પર સંમતિથી છૂટાછેડા લેવામાં આવ્યા હતા. સમાધાન દસ્તાવેજમાં ભૂતપૂર્વ પત્નીએ ઓગસ્ટ 2023 ની ફરિયાદ પાછી ખેંચી લીધાની વાત કહી છે. તેણે દાવો કર્યો હતો કે ફરિયાદ અજાણતાં અને વૈવાહિક વિવાદ દરમિયાન કોઈ નક્કર આધાર વિના દાખલ કરવામાં આવી હતી. મેજરે આ આધારે કાર્યવાહીની કાયદેસરતા પર પ્રશ્ન ઉઠાવ્યો હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ