દિલ્હી / ડોભાલ સામે ચીનની કસોટી! BRICS બેઠકમાં વાંગ યીની મુલાકાત પર સૌની નજર

BRICS NSA Meeting : ભારતની અધ્યક્ષતામાં આજે શરૂ થનારી BRICS દેશોના રાષ્ટ્રીય સુરક્ષા સલાહકારો (NSA) અને ઉચ્ચ પ્રતિનિધિઓની બેઠક વૈશ્વિક સુરક્ષા ચર્ચાઓની સાથે ભારત-ચીન સંબંધોના સંદર્ભમાં પણ ખાસ મહત્વ ધરાવે છે. બે દિવસ સુધી ચાલનારી આ બેઠકનું નેતૃત્વ ભારતના રાષ્ટ્રીય સુરક્ષા સલાહકાર અજિત ડોભાલ કરશે અને તેમાં સભ્ય દેશો વચ્ચે વ્યૂહાત્મક સંકલન અને સહકાર પર ચર્ચા થવાની છે.

મહત્વપૂર્ણ રાજદ્વારી મંચ

સપ્ટેમ્બરમાં યોજાનારી BRICS સમિટ પહેલાં આ બેઠકને એક મહત્વપૂર્ણ રાજદ્વારી મંચ તરીકે જોવામાં આવી રહી છે. બેઠકમાં મુખ્યત્વે આતંકવાદ વિરોધી સહયોગ, નવી ટેક્નોલોજીથી ઉભા થતા સુરક્ષા પડકારો અને વૈશ્વિક સ્તરે બદલાતા સુરક્ષા માળખા અંગે ચર્ચા થશે. સાથે સાથે માહિતી અને સંદેશાવ્યવહાર ટેક્નોલોજીના સુરક્ષિત ઉપયોગ તથા સંયુક્ત કાર્યકારી જૂથોની કામગીરીની પણ સમીક્ષા કરવામાં આવશે. જોકે બેઠકનો સત્તાવાર એજન્ડા બહુવિધ સુરક્ષા મુદ્દાઓ પર કેન્દ્રિત છે, પરંતુ ભારત અને ચીન વચ્ચેનો સરહદી તણાવ આ બેઠકને વધુ ચર્ચાસ્પદ બનાવે છે. આ બેઠકમાં ચીન તરફથી વિદેશ મંત્રી વાંગ યી હાજરી આપશે, જે હાલના ભૂરાજકીય સંજોગોમાં વિશેષ મહત્વ ધરાવે છે.

પૂર્વી લદ્દાખમાં લાંબા સમયથી ચાલી રહેલા સરહદી મતભેદો બાદ બંને દેશો વચ્ચે અનેક તબક્કાની રાજદ્વારી અને લશ્કરી ચર્ચાઓ થઈ ચૂકી છે. કેટલાક વિસ્તારોમાં પ્રગતિ જોવા મળી છે, છતાં સંપૂર્ણ રીતે સ્થિતિ સામાન્ય બની નથી. ભારત સતત સ્પષ્ટ સંદેશ આપતું આવ્યું છે કે સરહદ પર શાંતિ અને સ્થિરતા વગર દ્વિપક્ષીય સંબંધોને સામાન્ય રીતે આગળ વધારવા શક્ય નથી.

ડોભાલ સામે ચીનની કસોટી!

આ બેઠકને ચીન માટે એક પ્રકારની રાજદ્વારી કસોટી તરીકે પણ જોવામાં આવી રહી છે. એક તરફ ચીન આંતરરાષ્ટ્રીય મંચો પર સહયોગ અને ભાગીદારીની વાત કરે છે, જ્યારે બીજી તરફ સરહદ સંબંધિત મુદ્દાઓ હજુ ઉકેલની રાહ જોઈ રહ્યા છે. આવી સ્થિતિમાં ભારત ચીનના નિવેદનો અને વાસ્તવિક પગલાં વચ્ચે કેટલો તાલમેલ છે તેનું મૂલ્યાંકન કરી શકે છે.

આ પણ વાંચો : ઉદ્ધવ ઠાકરેની ગર્જના: 'ગદ્દારોને ટિકિટ આપવી એ મારી ભૂલ હતી, જનતાની માફી માંગુ છું'

ચીન લાંબા સમયથી એવી નીતિ અપનાવતું રહ્યું છે કે, સરહદી મતભેદોને અલગ રાખીને વેપાર અને બહુપક્ષીય સંબંધોને આગળ વધારવામાં આવે. પરંતુ ભારત માટે સરહદ સુરક્ષા અને વિશ્વાસનું પુનઃસ્થાપન પ્રાથમિકતા છે. આવી સ્થિતિમાં નવી દિલ્હીમાં યોજાતી આ બેઠક માત્ર BRICS સહયોગ સુધી મર્યાદિત નહીં રહે પરંતુ ભારત-ચીન સંબંધોની દિશા અને ભવિષ્ય અંગેના સંકેતો પણ આપી શકે છે. આ કારણે હવે સમગ્ર વ્યૂહાત્મક અને રાજદ્વારી વર્તુળોની નજર આ બેઠકના પરિણામો અને તેમાંથી બહાર આવતા સંદેશાઓ પર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ