CJP Protest / દિલ્હી પોલીસે 7000થી વધુને કસ્ટડીમાં લીધા, કેજરીવાલ સહિત આ નેતાઓને છોડ્યા, જાણો આજે શું શું થયું?

Delhi CJP Protest: સીજેપી વિરોધ પ્રદર્શન દરમિયાન લગભગ 7,000 પ્રદર્શનકારીની અટકાયત કરવામાં આવી છે. મમતા બેનર્જી અને અરવિંદ કેજરીવાલને પણ અટકાયતમાં લેવામાં આવ્યા હતા. સીજેપીના સ્થાપક દીપકના દાદીનું અવસાન થયું છે, અને પોલીસે તેને તેમના અંતિમ સંસ્કારમાં હાજરી આપવાનો વિકલ્પ આપ્યો છે.

શનિવારે દિલ્હીમાં સીજેપીના જંતર-મંતર પર વિરોધ પ્રદર્શન પોલીસ ઘેરાબંધીને કારણે ઘણા નાના વિરોધ પ્રદર્શનોમાં વિભાજિત થયું. પાર્ટી મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી રહી છે અને તેમના પર SIR અને ફોર્મ 6 માં અનિયમિતતાઓનો આરોપ લગાવી રહી છે. મેટ્રો, ટ્રેન અને મોબાઇલ ઇન્ટરનેટ સેવાઓ અવરોધિત કરવામાં આવી હતી, અને લગભગ 25,000 પોલીસ કર્મચારીઓને તૈનાત કરવામાં આવ્યા હતા.

સાંજે 5 વાગ્યા સુધીમાં નેતાઓ અને સંગઠનોના વડાઓ સહિત ઓછામાં ઓછા 7,000 લોકોની અટકાયત કરવામાં આવી હતી. પોલીસે બળ પ્રયોગ કર્યો ન હતો. સીજેપીએ રવિવારે જંતર-મંતર તરફ ફરી કૂચ કરવાની જાહેરાત કરી છે.

વિરોધ પ્રદર્શનોને કારણે દિલ્હીના કનોટ પ્લેસ વિસ્તારમાં દુકાનો બંધ રહી હતી. સમગ્ર વિસ્તારમાં મોટી સંખ્યામાં સુરક્ષા દળો તૈનાત કરવામાં આવ્યા હતા. સુરક્ષાના કારણોને લઇ ગઇકાલે જ દુકાનો બંધ રાખવા એડવાઇઝરી જારી કરવામાં આવી હતી.

દિલ્હી પોલીસે જંતર-મંતર તરફ જઈ રહેલા એએપી નેતાઓ સામે કાર્યવાહી કરી છે. પોલીસે અરવિંદ કેજરીવાલ સહિત ચાર નેતાઓની અટકાયત કરી હતી.

શનિવારે CJP એ એક પ્રેસ કોન્ફરન્સ યોજી હતી, જેમાં અજિંક્ય શિંદેએ જણાવ્યું હતું કે જ્ઞાનેશ કુમાર રાજીનામું ન આપે ત્યાં સુધી વિરોધ પ્રદર્શનો સમાપ્ત થશે નહીં. તેમણે જાહેરાત કરી હતી કે સીજેપી રવિવારે ફરી એકવાર જંતર-મંતર તરફ કૂચ કરશે.

ભાજપ મુખ્યાલય પાસે AISA વિરોધ પ્રદર્શન

ઓલ ઈન્ડિયા સ્ટુડન્ટ્સ એસોસિએશન (AISA) અને ડાબેરી પક્ષોના કાર્યકરો દિલ્હીમાં ભાજપ મુખ્યાલય પાસે વિરોધ પ્રદર્શન કર્યુ હતું. દરમિયાન કોકરોચ જનતા પાર્ટી (CJP) એ પણ આજે (શનિવાર, 10 ઓક્ટોબર) દિલ્હીના જંતર મંતર પર મુખ્ય ચૂંટણી કમિશનર (CEC) જ્ઞાનેશ કુમારને લગતા મુદ્દાને લઈને વિરોધ પ્રદર્શનનું આહ્વાન કર્યું છે.

પટણા જિલ્લા વહીવટીતંત્રે વિરોધ પ્રદર્શનો અંગે એક નવી એડવાઇઝરી જારી કરી છે. આ અંતર્ગત તમામ સંગઠનો અને વ્યક્તિઓએ તેમની માંગણીઓ માટે ફક્ત ગર્દાનીબાગમાં સ્થિત નિર્ધારિત સ્થળ પર જ પ્રદર્શન કરવાનું રહેશે. વહીવટીતંત્રના જણાવ્યા અનુસાર પરવાનગી વિના વિવિધ સ્થળોએ પ્રદર્શનો ટ્રાફિકને વિક્ષેપિત કરે છે અને જનતાને અસુવિધા પહોંચાડે છે. આ માર્ગદર્શિકાનું ઉલ્લંઘન કરનારાઓ સામે કાનૂની કાર્યવાહી કરવામાં આવશે.

અમદાવાદમાં વિરોધ પ્રદર્શન

અમદાવાદના એલિસબ્રિજમાં એમજે લાઇબ્રેરી પાસે GenZ એ વિરોધ પ્રદર્શન કર્યું. પ્રદર્શનકારીઓએ મુખ્ય ચૂંટણી કમિશનર (CEC) જ્ઞાનેશ કુમારનું રાજીનામું અને સ્પેશિયલ ઇન્ટેન્સિવ રિવિઝન (SIR) ને લઇ વિરોધ નોધાવ્યો હતો. વિરોધ પ્રદર્શનને લઇ સમગ્ર વિસ્તારમાં મોટી સંખ્યામાં પોલીસ બંદોબસ્ત ગોઠવી દેવામાં આવ્યો. પોલીસે વિરોધ પ્રદર્શન કરવા માટે ભેગા થયેલી મહિલાઓ સહિત પ્રદર્શનકારીઓની અટકાયત કરી હતી.

રેખા ગુપ્તાએ રાહુલ ગાંધી અને કેજરીવાલ પર પ્રહારો કર્યા

દિલ્હીના મુખ્યમંત્રી રેખા ગુપ્તાએ રાહુલ ગાંધી અને અરવિંદ કેજરીવાલ પર નિશાન સાધ્યું છે. તેમણે આરોપ લગાવ્યો છે કે જનતા દ્વારા નકારવામાં આવેલા રાહુલ ગાંધી અને કેજરીવાલ તેમની બી-ટીમ સીજેપી સાથે મળીને દિલ્હીને અખાડામાં ફેરવવાનો પ્રયાસ કરી રહ્યા છે.

મુંબઈમાં અભિનેતા ઈમરાન ખાનની અટકાયત

અભિનેતા ઈમરાન ખાનને મુંબઈના અગસ્ટ ક્રાંતિ મેદાનમાં અટકાયતમાં લેવામાં આવ્યા છે, જ્યાં સીજેપીના પ્રદર્શનના સમર્થનમાં આયોજિત વિરોધ પ્રદર્શનનું આયોજન કરવામાં આવ્યું હતું.

સોનમ વાંગચુકનું સરકારને અલ્ટીમેટમ

સોનમ વાંગચુકે દિલ્હીમાં સીજેપી વિરોધ પ્રદર્શન દરમિયાન નેતાઓની ધરપકડ પર સવાલ ઉઠાવ્યા છે. તેમણે ભારતને અઘોષિત કટોકટીની સ્થિતિમાં ગણાવ્યું હતું અને કહ્યું હતું કે તેમણે એક દિવસ પહેલા શાંતિ અને એકતાની અપીલ કરી હતી. આંદોલનનું નેતૃત્વ કરનારા ઘણા નેતાઓ આગળ આવ્યા હતા, પરંતુ હવે બધાની ધરપકડ કરવામાં આવી છે.

તમારી જેલ ઓછી પડશે - અરવિંદ કેજરીવાલ

આમ આદમી પાર્ટી (AAP) ના કન્વીનર અરવિંદ કેજરીવાલ અને પાર્ટીના અન્ય નેતાઓને દિલ્હી પોલીસે કસ્ટડીમાંથી મુક્ત કર્યા છે. કેજરીવાલને લોધી એસ્ટેટ ખાતેથી અટકાયતમાં લેવામાં આવ્યા હતા અને જાફરપુર કલાન પોલીસ સ્ટેશનમાં રાખવામાં આવ્યા હતા. CJP ના વિરોધ પ્રદર્શનના આહ્વાનના સમર્થનમાં કૂચ કરવાનો પ્રયાસ કરતી વખતે અરવિંદ કેજરીવાલ, સંજય સિંહ અને દુર્ગેશ પાઠકની અટકાયત કરવામાં આવી હતી. તેમની મુક્તિ પછી કેજરીવાલે સોશિયલ મીડિયા પર એક વીડિયો જાહેર કરીને કહ્યું, "મોદીજી, તમારી જેલ ઓછી પડશે. દેશના યુવાનો સાથે બાથ ભીડવાની હિંમત ન કરો. જ્ઞાનેશ કુમારનું રાજીનામું લો અને મત ચોરી બંધ કરો."

આ પણ વાંચોઃ નેશનલ / સરકારની મુશ્કેલી વધારશે સોનમ વાંગચુક? ફરી આપી ચેતવણી, કહ્યું- "જો CJPના લોકોને કાલ સુધીમાં નહીં છોડો તો..."

મમતા બેનર્જી અભિજીત દિપકના કાર્યક્રમમાં હાજરી આપવા માંગતા હતા

અટકાયતમાંથી મુક્ત થયા પછી પશ્ચિમ બંગાળના ભૂતપૂર્વ મુખ્યમંત્રી મમતા બેનર્જીએ જણાવ્યું હતું કે તેમને ગેરકાયદેસર રીતે અટકાયતમાં રાખવામાં આવ્યા હતા અને ગુનેગાર જેવો વ્યવહાર કરવામાં આવ્યો હતો. તેમણે જણાવ્યું હતું કે તેઓ જંતર મંતર જવા માંગતા હતા. અભિજીત દિપકએ તેમને તેમના કાર્યક્રમોમાં હાજરી આપવા માટે ઘણી વખત બોલાવ્યા છે, પરંતુ તેમને પહેલાં ત્યાં જવાની તક મળી ન હતી. મમતા બેનર્જીએ જણાવ્યું હતું કે જ્યારે તેઓ આ વખતે દિલ્હી આવ્યા ત્યારે તેમણે કાર્યક્રમમાં હાજરી આપવાનું નક્કી કર્યું. તેમણે જણાવ્યુ કે, INDIA ગઠબંધનનો પણ એક કાર્યક્રમ હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ