પર્વ / અમદાવાદ-વડોદરામાં પ્રીમિયમ ગરબા પેકેજની ધૂમઃ વેલેટ પાર્કિંગથી બટલર સુધીની સુવિધા

નવરાત્રીનો પરંપરાગત ગરબો હવે લક્ઝરી અનુભવમાં પણ બદલાઈ રહ્યો છે. ભીડભાડ, પાર્કિંગની મુશ્કેલી અને ફૂડ કાઉન્ટરની લાંબી કતારથી દૂર રહીને ગરબાની મજા માણવા માટે આયોજકો ખાસ પ્રીમિયમ પેકેજ રજૂ કરી રહ્યા છે. તેમાં વેલેટ પાર્કિંગ, ઝડપી પ્રવેશ, વીવીઆઈપી બેઠક, ભોજન, વ્યક્તિગત ફોટોગ્રાફર, બટલર અને કેટલીક જગ્યાએ ફૂટ મસાજ જેવી સુવિધાઓ પણ સામેલ છે.

વડોદરાના લક્ષ્મી વિલાસ પેલેસ હેરિટેજ ગરબામાં પ્રીમિયમ પેકેજની કિંમત સામાન્ય દિવસોમાં આશરે રૂ. ૧૦,૬૨૦, જ્યારે સાતમ-આઠમના ખાસ દિવસોમાં રૂ. ૧૪,૭૫૦ સુધી છે. પેકેજમાં ખેલૈયાના પાસ, આરતીમાં પ્રવેશ, વીવીઆઈપી બેઠક, રિઝર્વ પાર્કિંગ, ભોજન માટેનાં વાઉચર અને મહેમાનોની મદદ માટે પ્રતિનિધિની સુવિધા મળે છે. બહારગામથી વડોદરા આવતા લોકોમાં આ પેકેજને ખાસ પ્રતિસાદ મળી રહ્યો છે.

૧૦ લોકોનાં ટેબલ માટે રૂ. ૧.૨૧ લાખ

કંકુ પગલાંએ લક્ઝરી અનુભવને વધુ આગળ વધાર્યો છે. અહીં ૧૦ લોકો સુધીના એક વીવીઆઈપી ટેબલની કિંમત રૂ. ૧.૨૧ લાખ છે. તેમાં વેલેટ પાર્કિંગ, ઝડપી પ્રવેશ, ખેલૈયા પાસ ઉપરાંત બટલર સેવા, વ્યક્તિગત ફોટોગ્રાફર અને ભોજનનો સમાવેશ થાય છે. આયોજકોના જણાવ્યા મુજબ બહારગામથી આવતા લોકો અને એનઆરઆઈમાં આવા પેકેજની ખાસ માંગ છે.વડોદરા વાઇબ્રન્ટ નવરાત્રીમાં રૂ. ૨૫ હજારનું એલિટ પેકેજ છે. તેમાં એલિટ ટાવરમાં બેઠક, ભોજન, વીવીઆઈપી પાર્કિંગ અને ચાર ખેલૈયા પાસ મળે છે. કોર્પોરેટ પેકેજમાં ૧૫ ખેલૈયા પાસ, પ્રેક્ષકો માટેના પાસ અને બે વીવીઆઈપી પાર્કિંગ સ્લોટ પણ આપવામાં આવે છે. ખેલૈયાઓને ફૂડ એરિયામાં સીધો પ્રવેશ અને અન્ય ખાસ સુવિધાઓ મળે છે.

અમદાવાદમાં ગઝેબો પેકેજ રૂ. ૨.૭૫ લાખનું

અમદાવાદમાં પણ લક્ઝરી ગરબાનો ટ્રેન્ડ જોવા મળી રહ્યો છે. સફેદ પરિંદેના ૧૦ લોકોના ગઝેબો પેકેજની કિંમત રૂ. ૨.૭૫ લાખ એટલે કે વ્યક્તિદીઠ રૂ. ૨૭,૫૦૦ છે. પેકેજમાં ઘરેથી પિકઅપ-ડ્રોપ, વ્યક્તિગત સુરક્ષા, ખાનગી ભોજન, કોફી, ગઝેબોમાં ફૂટ મસાજ અને ગિફ્ટ બેગ જેવી સુવિધાઓ છે. સફેદ થીમ આધારિત આ આયોજનમાં ફૂલોથી સ્વાગત, પ્રીમિયમ સજાવટ, ફોટો-સેલ્ફી ઝોન અને વિશાળ ગરબા વિસ્તાર પણ રાખવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ