અમરેલી / અમરેલીનું અરજણસુખ ગામ સિંહણ માટે બન્યું હોટસ્પોટ, પાંચ વખત હુમલો કરતાં ગ્રામજનોમાં ભયનો માહોલ

અમરેલી જિલ્લાના અરજણસુખ ગામમાં સિંહણના સતત હુમલાઓને પગલે ગ્રામજનોમાં ભારે ભયનો માહોલ સર્જાયો છે. રાત્રી દરમિયાન સિંહણે બે રાહદારીઓ અને બે ખેડૂતો બાદ વનવિભાગના કર્મચારી પર પણ હુમલો કરતાં ગામમાં ચકચાર મચી ગઈ છે. એક બાદ એક પાંચ હુમલાની ઘટનાઓ સામે આવતા લોકો ઘરની બહાર નીકળવાનું ટાળી રહ્યા છે.

સિંહણના હુમલાના પગલે અરજણસુખ ગામની શેરીઓ સુમસામ જોવા મળી રહી છે. ખેતરમાં રખોપું કરતા ખેડૂતો અને મજૂરો પણ સુરક્ષાને ધ્યાનમાં રાખીને ખેતરની ઓરડીઓમાં આશરો લઈ રહ્યા છે. સીમ વિસ્તારમાં રહેલા અનેક લોકો પણ પરિસ્થિતિને ધ્યાનમાં રાખીને સુરક્ષિત રીતે ગામમાં પરત ફર્યા છે.

ઘટનાની જાણ થતાં વનવિભાગની ટીમો અરજણસુખ ગામે પહોંચી ગઈ છે. સિંહણને સુરક્ષિત રીતે રેસ્ક્યૂ કરી પાંજરે પૂરવા માટે વોચ અને સર્ચ ઓપરેશન હાથ ધરવામાં આવ્યું છે. શેત્રુંજી વનવિભાગનો સ્ટાફ પણ રેસ્ક્યૂ કામગીરીમાં જોડાયો છે અને સિંહણની હિલચાલ પર નજર રાખવામાં આવી રહી છે.

સતત હુમલાઓને કારણે ગ્રામજનોમાં ચિંતા વધી છે. ગ્રામજનોની મુખ્ય માંગ છે કે સિંહણને તાત્કાલિક રેસ્ક્યૂ કરી પાંજરે પૂરવામાં આવે, જેથી લોકો અને ખેડૂતોની સુરક્ષા સુનિશ્ચિત થઈ શકે.

અરજણસુખ ગામ કાયદા મંત્રી કૌશિક વેકરિયાના મતવિસ્તારમાં આવતું હોવાથી તેમણે પણ સમગ્ર મામલે ઉચ્ચ અધિકારીઓ સાથે સંપર્ક સાધ્યો હોવાનું જાણવા મળે છે. ગાંધીનગર સુધી અધિકારીઓ સાથે વાતચીત કરી સિંહણને ઝડપી પકડવા માટે તાત્કાલિક ટીમો તૈનાત કરી જરૂરી કાર્યવાહી કરવા સૂચના આપવામાં આવી છે.

આ પણ વાંચોઃ રાજકોટમાં ગુરુ-શિષ્યના સંબંધને લજવતો કિસ્સો સામે આવ્યો, શિક્ષકે 14 વર્ષની સગીરાને પીંખી નાખી

હાલ વનવિભાગ દ્વારા સિંહણને પાંજરે પૂરવા માટે યુદ્ધના ધોરણે કામગીરી ચાલી રહી છે. ટીમો દ્વારા સર્ચ અને વોચ ઓપરેશન ચાલુ રાખવામાં આવ્યું છે. સિંહણ પકડાય ત્યાં સુધી ગ્રામજનોને સાવચેતી રાખવા અને સીમ વિસ્તારમાં એકલા ન જવા અપીલ કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ