વિશ્વ / અમેરિકામાં રુવાંડા ઊભી કરતી ઘટના, મિસિસિપી શહેરમાં ગોળીબારમાં 6થી વધુના મોત

અમેરિકામાં ફરી એક વખત ગોળીબારની ઘટનાએ સમગ્ર દેશને હચમચાવી દીધો છે. મિસિસિપિ રાજ્યના એક શહેરમાં થયેલી માસ શૂટિંગમાં છ નિર્દોષ લોકોના મોત થયા છે. આ ઘટના એટલી ભયાનક હતી કે સ્થાનિક લોકો હજુ પણ ભય અને આઘાતમાંથી બહાર આવી શક્યા નથી. એક જ વ્યક્તિએ અલગ-અલગ સ્થળોએ જઈને ગોળીબાર કર્યો હોવાના અહેવાલો સામે આવ્યા છે, જેના કારણે સમગ્ર વિસ્તાર અચાનક યુદ્ધભૂમિ જેવો બની ગયો હતો.

ન્યૂયોર્ક પોસ્ટના અહેવાલ મુજબ, આરોપી વ્યક્તિ માનસિક રીતે અસંતુલિત હોવાનું કહેવાય છે. તેણે કોઈ એક સ્થળ પર નહીં પરંતુ જુદા જુદા વિસ્તારોમાં જઈને અંધાધૂંધ ફાયરિંગ કર્યું. ગોળીઓના અવાજથી લોકોમાં અફરાતફરી મચી ગઈ હતી અને ઘણા લોકો જીવ બચાવવા માટે ઘરોમાં છુપાઈ ગયા હતા. ક્લે કાઉન્ટીના શેરીફ એડી સ્કોટે સોશિયલ મીડિયા પ્લેટફોર્મ ફેસબુક પર આ ઘટનાની પુષ્ટિ કરતા લખ્યું કે, અમારી કમ્યુનિટી માટે આ એક અત્યંત દુઃખદ દિવસ છે. હિંસાની આ ઘટનામાં ઘણા નિર્દોષ લોકોએ પોતાના પ્રાણ ગુમાવ્યા છે. તેમણે શોક વ્યક્ત કરતા મૃતકોના પરિવારજનો પ્રત્યે સંવેદના વ્યક્ત કરી હતી.

અમેરિકન પોલીસના જણાવ્યા અનુસાર, આ ગોળીબારની ઘટનાઓ વેસ્ટ પોઈન્ટ વિસ્તારમાં ત્રણ અલગ-અલગ સ્થળોએ બની હતી. પોલીસે ઝડપી કાર્યવાહી કરતા આરોપી વ્યક્તિને ધરપકડ કરી લીધી છે. હાલ તેની પૂછપરછ ચાલી રહી છે અને તે કયા કારણોસર આ હિંસક પગલું ભર્યું તે અંગે તપાસ કરવામાં આવી રહી છે. નામીસા શહેર, જ્યાં આ ઘટના બની, તે મિસિસિપિ રાજ્યના ઉત્તરપૂર્વ ભાગમાં સ્થિત છે અને ક્લે કાઉન્ટી હેઠળ આવે છે. આ વિસ્તારની વસ્તી આશરે 20 હજાર જેટલી છે. સામાન્ય રીતે શાંત માનવામાં આવતા આ શહેરમાં આવી ઘટના બનતા લોકોમાં સુરક્ષાને લઈને ભારે ચિંતા જોવા મળી રહી છે.

આ પહેલી વખત નથી કે મિસિસિપિમાં આવી હિંસક ઘટના બની હોય. ગયા વર્ષે ઓક્ટોબરમાં પણ રાજ્યમાં ગોળીબારની ઘટનાઓ સામે આવી હતી. તે સમયે આ ઘટનાઓ હાઈ સ્કૂલ ફૂટબોલ રમતો સાથે જોડાયેલી હોવાનું કહેવાયું હતું. ઉત્તર-પશ્ચિમ મિસિસિપિના લી શહેરમાં થયેલા એક હુમલામાં છ લોકોના મોત થયા હતા અને ઓછામાં ઓછા 12 લોકો ઘાયલ થયા હતા. વારંવાર બનતી આવી ઘટનાઓને કારણે અમેરિકા ફરી એક વખત ગન કંટ્રોલ કાયદાઓને લઈને ચર્ચાના કેન્દ્રમાં આવી ગયું છે. સામાન્ય નાગરિકો અને માનવાધિકાર સંગઠનો હથિયારો પર કડક નિયંત્રણોની માંગ કરી રહ્યા છે. બીજી તરફ, સ્થાનિક પ્રશાસને લોકોને શાંતિ જાળવવાની અને અફવાઓથી દૂર રહેવાની અપીલ કરી છે.

મિસિસિપિની આ તાજી ઘટનાએ ફરી સાબિત કરી દીધું છે કે ગન વાયોલન્સ અમેરિકાની સૌથી ગંભીર સામાજિક સમસ્યાઓમાંથી એક બની ગઈ છે. નિર્દોષ લોકોના જીવ જતા રહે છે અને આખી કમ્યુનિટી લાંબા સમય સુધી તેના દુઃખ અને ભય સાથે જીવવા મજબૂર બને છે.