રાજકોટ / અલ્પેશ ઢોલરિયાના પત્રથી ભાજપમાં હાહાકાર, રાજકોટમાં ભાજપની આંતરિક લડાઈ શરૂ

રાજકોટ લોધિકા સંઘની ચૂંટણી બાદ ભાજપના આંતરિક રાજકારણમાં ગરમાવો આવ્યો છે. ચૂંટણીમાં પક્ષ દ્વારા આપવામાં આવેલા વ્હિપનો અનાદર થયો હોવાના આક્ષેપોને લઈને પ્રદેશ કક્ષાએ ફરિયાદ કરવામાં આવી હોવાનું સામે આવ્યું છે.

સમગ્ર મામલે ભાજપના પ્રદેશ પ્રમુખને લેખિતમાં જાણ

મળતી માહિતી મુજબ, રાજકોટ જિલ્લા ભાજપ પ્રમુખ અલ્પેશ ઢોલરિયાએ સમગ્ર મામલે ભાજપના પ્રદેશ પ્રમુખને લેખિતમાં જાણ કરી છે. આ મામલે વિજય સખીયા, વિજય કોરાટ, જયેશ બોઘરા અને ભૂપતસિંહ જાડેજા સહિતના નેતાઓ દ્વારા રજૂઆત કરવામાં આવી હોવાની માહિતી છે.

લોધિકા સંઘની માધાપર બેઠક પરથી પૃથ્વીરાજસિંહ ઉર્ફે ઘોઘુભા જાડેજાને ભાજપ તરફથી મેન્ડેટ આપવામાં આવ્યું હતું. પક્ષ દ્વારા પૃથ્વીરાજસિંહ જાડેજાને મત આપવા માટે વ્હિપ આપવામાં આવ્યો હોવા છતાં ચૂંટણીના પરિણામમાં વિજય સખીયા વિજેતા બન્યા હોવાનું સામે આવ્યું છે.

સંગઠનમાં વ્હિપના પાલનને લઈને સવાલો ઊભા થયા

આ પરિણામ બાદ ભાજપના સંગઠનમાં વ્હિપના પાલનને લઈને સવાલો ઊભા થયા છે. પક્ષના આદેશ છતાં વિપરીત પરિણામ કેવી રીતે આવ્યું અને કોના દ્વારા વ્હિપનું ઉલ્લંઘન થયું તે અંગે હવે સંગઠન સ્તરે તપાસની શક્યતા છે.

સ્થાનિક ભાજપના આંતરિક રાજકારણ સાથે પણ જોડાયું

ચર્ચામાં રહેલા વિજય સખીયા પૂર્વ મંત્રી જયેશ રાદડિયાના નજીકના નેતા તરીકે ઓળખાતા હોવાનું પણ રાજકીય વર્તુળોમાં ચર્ચાઈ રહ્યું છે. જેના કારણે આ ચૂંટણીનું પરિણામ માત્ર સહકારી સંસ્થાની ચૂંટણી પૂરતું ન રહેતા સ્થાનિક ભાજપના આંતરિક રાજકારણ સાથે પણ જોડાઈ રહ્યું છે.

આ પણ વાંચોઃ વિધાનસભામાં વંદે માતરમ્ વિવાદ વચ્ચે અમિત ચાવડાની સ્પષ્ટતા, ‘પ્રથમ બે અંતરા બાદ ખેડાવાલા બેઠા’

હવે પ્રદેશ ભાજપ દ્વારા જિલ્લા પ્રમુખની લેખિત રજૂઆતના આધારે શું કાર્યવાહી કરવામાં આવે છે તેના પર સૌની નજર છે. વ્હિપનો અનાદર સાબિત થાય છે કે કેમ અને જવાબદારી નક્કી થાય છે કે નહીં તે આગામી દિવસોમાં સ્પષ્ટ થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ