નેશનલ / બાળકોના ફોર્મ્યૂલા મિલ્કને લઈ Nestle પર FSSAIની મોટી કાર્યવાહી, ખોટા દાવાઓ પર સ્પષ્ટીકરણ માંગ્યું

National News: ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ નેસ્લે ઈન્ડિયા લિમિટેડના શિશુ ફોર્મ્યુલા મિલ્ક પ્રોડક્ટ સામે કાનૂની કાર્યવાહી શરૂ કરી છે. કંપનીના NAN એક્સેલા પ્રો સ્ટેજ 1 અને લેક્ટોજેન પ્રો 1 ઉત્પાદનો માટેના પ્રમોશનલ દાવાઓ નિયમોનું ઉલ્લંઘન કરતા જોવા મળ્યા છે.

ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ નેસ્લે ઈન્ડિયા લિમિટેડ સામે શિશુ ફોર્મ્યુલા દૂધ અંગે કાનૂની કાર્યવાહી શરૂ કરી છે. આમાં કંપનીના કુલ ત્રણ પોષણ ઉત્પાદનોનો સમાવેશ થાય છે. FSSAI ના નિર્ણય વિભાગની નોટિસ અનુસાર નેસ્લેના NAN એક્સેલા પ્રો સ્ટેજ 1, લેક્ટોજેન પ્રો 1 અને ફોલો-અપ ફોર્મ્યુલા અંગે સ્પષ્ટતા માંગવામાં આવી છે. આ ઉત્પાદનો માટેના પ્રમોશનલ દાવાઓ નિયમોનું ઉલ્લંઘન કરતા જોવા મળ્યા છે.

એફએસએસએઆઇ અનુસાર NAN એક્સેલા પ્રો સ્ટેજ 1 ના પ્રમોશનમાં 5 HMO અને વ્હે પ્રોટીન જેવા દાવાઓ મળી આવ્યા હતા. લેક્ટોજેન પ્રો 1 ના પ્રમોશનમાં વ્હે પ્રોટીનને સરળતાથી સુપાચ્ય તરીકે પણ વર્ણવવામાં આવ્યું હતું. FSSAI એ કંપની પાસેથી આ દાવાઓ અંગે સ્પષ્ટતા માંગી છે. નોટિસમાં જણાવાયું છે કે આ ઉત્પાદનો પ્રમોશનલ નિયમોનું ઉલ્લંઘન કરે છે. આ પ્રમોશન વેચાણ વધારવા માટે કરવામાં આવ્યા હતા.

એક ઉત્પાદનમાં બાયોટિનનું પ્રમાણ પણ તપાસ હેઠળ

આ મામલો ફક્ત પ્રમોશનલ દાવાઓ પૂરતો મર્યાદિત નથી. FSSAI ના જણાવ્યા મુજબ નેસ્લે ઇન્ડિયાના ફોર્મ્યુલાના ફોલો-અપ નમૂનામાં પણ બાયોટિનનું ઉચ્ચ સ્તર જોવા મળ્યું. આ નમૂનાને પરીક્ષણ માટે લેબમાં પાછો મોકલવામાં આવ્યો હતો, અને તેમાં એ પણ જાણવા મળ્યું કે બાયોટિનનું પ્રમાણ નિર્ધારિત પરિમાણો કરતાં વધુ છે.

આ પણ વાંચોઃ નેશનલ / ગેંગરેપ કેસમાં નામ આવતાં જ ભાજપના પૂર્વ ધારાસભ્યનું રાજીનામું, કહ્યું- 'મારી વિરુદ્ધ ષડ્યંત્ર'

ત્રણ અલગ અલગ કેસ દાખલ

આ કથિત ઉલ્લંઘનો માટે નેસ્લે ઇન્ડિયા લિમિટેડ સામે ત્રણ અલગ અલગ કેસ દાખલ કરવામાં આવ્યા છે. તેમનો કાયદેસર રીતે સામનો કરવામાં આવશે. FSSAI એ સલાહ આપી છે કે બાળકો માટે આવા ઉત્પાદનો ખરીદતી વખતે, ફક્ત જાહેરાત પર આધાર રાખવો જોઈએ નહી. તેના બદલે આવા ઉત્પાદનો ખરીદતા પહેલા ડૉક્ટરની સલાહ લો. FSSAI એ જણાવ્યું છે કે નેસ્લે ઇન્ડિયા લિમિટેડ સામે કાર્યવાહી હાલમાં નિર્ણય પ્રક્રિયામાં છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ