તમારા કામનું / લોનનો બોજ વધી ગયો છે? આ સરળ ટિપ્સ અપનાવીને દેવામાંથી વહેલા મુક્ત થાઓ

આજના સમયમાં દરેક સામાન્ય વ્યક્તિ પોતાની નાની-મોટી જરૂરિયાતો જેવી કે નવું ઘર ખરીદવું, કાર લેવી, બાળકોનું ઉચ્ચ શિક્ષણ કે પર્સનલ ઇમરજન્સી માટે લોન (Loan) નો સહારો લે છે. મર્યાદિત આવક હોવા છતાં લોન દ્વારા જરૂરિયાતો સરળતાથી પૂરી થઈ જાય છે અને ધીમે-ધીમે તેની ચુકવણી પણ થઈ જાય છે. પરંતુ, ઘણી વખત લોકો લોન લીધા પછી મુશ્કેલીમાં મુકાઈ જાય છે, ખાસ કરીને જ્યારે તેઓ સમયસર લોનના હપ્તા (EMI) ચૂકવી શકતા નથી.

આવી સ્થિતિમાં વ્યાજ પર વ્યાજ વધવાના કારણે દેવાનો બોજ સતત વધતો જાય છે, જે આર્થિક બોજ વધારવાની સાથે મોટો માનસિક તણાવ પણ લાવે છે. જો કે, યોગ્ય આયોજન અને નાણાકીય શિસ્ત દ્વારા તમે નક્કી કરેલા સમય પહેલાં પણ લોન ચૂકવીને તણાવમુક્ત થઈ શકો છો.

લોન ઝડપથી ચૂકવવાના સરળ રસ્તા

માસિક ખર્ચનું બજેટ બનાવો: સૌથી પહેલાં તમારી બધી EMI અને દર મહિનાના જરૂરી ખર્ચાઓનો એક હિસાબ તૈયાર કરો. પ્રયાસ કરો કે તમારી માસિક આવકનો એક નાનો હિસ્સો વધારાની ચુકવણી માટે બચાવી શકાય.

વધારાની રકમ જમા કરો (Prepayment):

જો તમારી લોન પર કોઈ પ્રીપેમેન્ટ ચાર્જ ન હોય, તો સમય-સમય પર લોન ખાતામાં વધારાની રકમ જમા કરાવતા રહો. આનાથી તમારી મુખ્ય રકમ (Principal Amount) ઝડપથી ઘટશે અને કુલ વ્યાજનો બોજ પણ ઓછો થઈ જશે.

વધારે વ્યાજવાળી લોન પહેલાં ચૂકવો:

જો તમારી પાસે એકથી વધુ લોન ચાલતી હોય, તો સૌથી પહેલાં એ લોન પૂરી કરવા પર ધ્યાન કેન્દ્રિત કરો જેમાં વ્યાજનો દર સૌથી વધુ હોય. લાંબા ગાળે આનાથી વ્યાજની મોટી બચત થશે.

બોનસ કે સેલરી વધારાનો ઉપયોગ:

જો તમને નોકરીમાં બોનસ મળે અથવા તમારો પગાર વધે (Salary Increment), તો તે વધારાની રકમ આડેધડ ખર્ચ કરવાના બદલે લોન ચૂકવવામાં વાપરો.

ઓછા વ્યાજ દરનો વિકલ્પ :

જો તમારી લોનનો વ્યાજ દર ખૂબ ઊંચો હોય, તો તમે કોઈ અન્ય બેંક કે નાણાકીય સંસ્થામાં ઓછા વ્યાજ દરે લોન બેલેન્સ ટ્રાન્સફર કરાવી શકો છો. આનાથી તમારી માસિક EMI અથવા કુલ વ્યાજનો બોજ ઘટી જશે.

લોન ભરતી વખતે આ ભૂલો કરવાથી બચો

નાણાકીય તણાવ અને દેવાના સંકટથી બચવા માટે લોન ચાલતી હોય ત્યારે કેટલીક બાબતોનું ખાસ ધ્યાન રાખવું જરૂરી છે:

EMI ની તારીખ ક્યારેય મિસ ન કરો:

જો તમે સમયસર હપ્તો નહીં ભરો તો ભારે પેનલ્ટી (દંડ) ચૂકવવી પડશે અને તમારો ક્રેડિટ સ્કોર (Credit Score) પણ ખરાબ થશે.

એક લોન ચૂકવવા નવી મોંઘી લોન ન લો:

જૂનું દેવું ચૂકવવા માટે વારંવાર નવું અને મોંઘું દેવું લેવાની ભૂલ ક્યારેય ન કરો, આનાથી તમે દેવાની જાળમાં ફસાઈ જશો.

ક્રેડિટ કાર્ડનું બિલ બાકી ન રાખો:

ક્રેડિટ કાર્ડના બાકી નાણાં લાંબા સમય સુધી ન છોડો, કારણ કે તેના પર વ્યાજનો દર સૌથી વધારે હોય છે.

શરતો સમજ્યા વિના બેલેન્સ ટ્રાન્સફર ન કરો:

લોન બીજા બેંકમાં ટ્રાન્સફર કરતી વખતે પ્રોસેસિંગ ફી અને અન્ય છુપા ચાર્જિસ અચૂક ચેક કરી લો.

ક્ષમતા કરતાં વધુ EMI નો બોજ ન લો:

તમારી માસિક આવકને ધ્યાનમાં રાખીને જ EMI નક્કી કરો, વધુ પડતો બોજ ઘરનું બજેટ ખોરવી નાખશે.

આ પણ વાંચોઃ નેશનલ / પીએમ મોદીએ જાપાનના પીએમને ગણાવ્યા "નાની બહેન", ફાર્મા-સંરક્ષણ ક્ષેત્રોમાં મહત્વપૂર્ણ કરાર

જો તમે આ નાની પણ મહત્વની બાબતોનું ધ્યાન રાખશો, તો લોન ક્યારેય તમારા પર બોજ નહીં બને અને ચપટીમાં દેવું પૂરું થઈ જશે. આનાથી તમારો ક્રેડિટ સ્કોર પણ સુધરશે, જેથી ભવિષ્યમાં જરૂર પડ્યે ફરીથી સરળતાથી લોન મળી શકશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ