Nepal Flood / નેપાળમાં વિનાશક પૂર બાદ ભારત એક્શનમાં! IAFનું રાહત સામગ્રી સાથે વિમાન રવાના, NDRFની ટીમો સ્ટેન્ડબાય પર

નેપાળમાં હિમાલયી વિસ્તારમાં અચાનક આવેલ ભીષણ જળપ્રલયે મોટા પાયે તબાહી મચાવી છે. આ કુદરતી આપદામાં અત્યાર સુધીમાં ઓછામાં ઓછા 46 લોકોના મોત નીપજ્યા છે, જ્યારે 105 ભારતીય પ્રવાસીઓ અને 37 NRI સહિત અંદાજે 400 લોકો લાપતા હોવાના અહેવાલ છે. આ ગંભીર પરિસ્થિતિને ધ્યાનમાં રાખીને ભારત સરકારે પાડોશી દેશની મદદે તાત્કાલિક કદમ ઉઠાવ્યા છે.

ભારતીય વાયુસેનાનું વિમાન રાહત સામગ્રી સાથે રવાના

નેપાળમાં માનવતાવાદી સહાય પૂરી પાડવા માટે ભારતીય વાયુસેના (IAF) નું વિશેષ વિમાન 10 ટન HADR (હ્યુમેનિટેરિયન એસિસ્ટન્સ એન્ડ ડિઝાસ્ટર રિલીફ) સામગ્રી અને જરૂરી દવાઓનો જથ્થો લઈને રવાના થઈ ચૂક્યું છે. આ ઉપરાંત, કોઈ પણ આકસ્મિક સ્થિતિને પહોંચી વળવા માટે નેશનલ ડિઝાસ્ટર રિસ્પોન્સ ફોર્સ (NDRF) ની ટીમોને સ્ટેન્ડબાય પર રાખવામાં આવી છે.

300 થી વધુ વિદેશી નાગરિકો લાપતા, યુદ્ધના ધોરણે રેસ્ક્યુ ઓપરેશન

નેપાળ ટૂરિઝમ બોર્ડના જણાવ્યા અનુસાર, લાપતા થયેલા 400 લોકોમાં 291 વિદેશી અને 93 નેપાળી નાગરિકો છે.

વિદેશીઓમાં ભારત ઉપરાંત અમેરિકા, બ્રિટન, મલેશિયા, દક્ષિણ આફ્રિકા, ઓસ્ટ્રેલિયા અને નેધરલેન્ડના પ્રવાસીઓનો સમાવેશ થાય છે. ફસાયેલા લોકોને શોધવા માટે નેપાળી સેના, પોલીસ અને સશસ્ત્ર દળો દ્વારા 14 હેલિકોપ્ટર, ડ્રોન અને સ્નિફર ડોગ્સની મદદથી શોધખોળ હાથ ધરવામાં આવી છે.

ગંડક નદીમાં પૂરનું જોખમ: બિહાર અને UP માં NDRF તૈનાત

સેન્ટ્રલ વોટર કમિશન (CWC) ના જણાવ્યા મુજબ, નેપાળ-ચીન સરહદ નજીક ગ્લેશિયર લેક આઉટબર્સ્ટ ફ્લડ (GLOF) ના કારણે ત્રિશૂલી નદીના જળસ્તરમાં ભયાનક વધારો થયો છે. આ પૂરનું પાણી ગંડક નદી મારફતે ભારતમાં પ્રવેશવાની શક્યતાને પગલે બિહાર અને ઉત્તર પ્રદેશના સીમાવર્તી જિલ્લાઓને હાઇએલર્ટ પર મૂકવામાં આવ્યા છે.

પશ્ચિમ ચંપારણ અને મુઝફ્ફરપુરમાં NDRF ની ટીમો ગોઠવવામાં આવી છે. રાજ્યમાં કુલ 9 ટીમો તૈનાત છે. કુશીનગર અને ગંડક નદીના કિનારે આવેલા વિસ્તારોમાં NDRF ની 11 ટીમો સતત મોનિટરિંગ કરી રહી છે.

વધુ વાંચો : 'તમારા ભાઈ કે બહેને રક્ષાબંધનની ગિફ્ટ મોકલી છે' આવા મેસેજ આવે તો ચેતજો નહીંતર બેન્ક એકાઉન્ટ ખાલી

રસૂવા અને તિમુરેમાં વ્યાપક નુકસાન

અચાનક આવેલા પૂરના કારણે નેપાળનો રસૂવા જિલ્લો સૌથી વધુ પ્રભાવિત થયો છે. તિમુરે અને સ્યાફ્રુબેસી સહિતના વિસ્તારોમાં રોડ-રસ્તા, પુલ અને કસ્ટમ્સ પરિસરમાં રાખેલા વાહનો પાણીના ધસમસતા પ્રવાહમાં તણાઈ ગયા છે. સ્યાફ્રુબેસી, બેત્રાવતી, શાંતિબજાર, પેરેબેસી અને બત્તર સહિત નદીકાંઠાની અનેક બસ્તીઓ જળમગ્ન થઈ ગઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ