દેશમાં ટેલીકોમ કંપનીઓ ગ્રાહકોને સસ્તી કિંમત પર ઇન્ટરનેટ ડેટા આપી રહી છે. દેશમાં સરેરાશ મોબાઇલ સ્પીડ ગત વર્ષની તુલનાએ 9.01 એમબીપીએસથી વધી 10.71 એમબીપીએસ થઇ ગઇ છે.
દુનિયાભરમાં ભારતની રેન્કિંગ જોવામાં આવે તો તે 109થી સરકીને 121માં ક્રમે પહોંચી ગયું છે. આ વિશેની જાણકારી ડેટા સ્પીડ ચેક કરનારી યૂએસની કંપની Ooklaએ એક રિપોર્ટ જાહેર કરી છે. Ooklaની રિપોર્ટમાં ભારતમાં ઇન્ટરનેટની સ્પીડ ઘટતી બતાવાઇ છે.
Ooklaએ એપ્રિલ 2019ની સ્પીડ ટેસ્ટ ગ્લોબલ ઇન્ડેક્સ રિપોર્ટ જાહેર કરી છે. રિપોર્ટ મુજબ, એપ્રિલની રિપોર્ટમાં પણ સ્પીડ ટેસ્ટ ગ્લોબલ ઇન્ડેક્સમાં ભારતનો ક્રમ 67થી 68 પર આવી ગયો. જ્યારે મોબાઇલ ડેટા સ્પીડમાં તેની રેન્કિંગ ઘટીને 121 થઇ ગઇ છે.
આપને જણાવીએ કે ભારતમાં બ્રોડબેન્ડની સરેરાશ ડાઉનલોડ સ્પીડ 29.25 એમબીપીએસ છે. જ્યારે મોબાઇલમાં ઇન્ટરનેટ સ્પીડ સરેરાશ 10.71 એમબીપીએસ થઇ ગઇ છે. 2018ની શરૂઆતમાં ભારત બ્રોડબેન્ડ સ્પીડમાં 67માં અને મોબાઇલ ઇન્ટરનેટ સ્પીડમાં 109માં ક્રમે હતું.
Ooklaની રિપોર્ટમાં મોબાઇલ ઇન્ટરનેટ સ્પીડ મામલે નોર્વે સૌથી ટોપ પર છે. અહીં મોબાઇલ ઇન્ટરનેટ સ્પીડ સરેરાશ 65.41 એમબીપીએસ છે. જ્યારે બ્રોડબેન્ડ સ્પીડ મામલે સિંગાપુર પહેલા સ્થાન પર છે. અહીં બ્રોડબેન્ડની સરેરાશ ડાઉનલોડ સ્પીડ 197.50 એમબીપીએસ છે.