ગુજરાત / અમદાવાદ, ગાંધીધામ-મુન્દ્રા સહિત રાજ્યમાં અનેક સ્થળોએ ITના દરોડા, મોટા પાયે કરચોરીની આશંકા

ગુજરાતમાં ફરી એકવાર ઇન્કમટેક્સ વિભાગે મોટા પાયે કાર્યવાહી હાથ ધરી છે. વિભાગે અમદાવાદ, ગાંધીધામ, મુન્દ્રા અને રાજકોટમાં એકસાથે દરોડા પાડ્યા છે. આ કાર્યવાહી દરમિયાન એક શિપિંગ કંપની અને ચાર ચાર્ટર્ડ એકાઉન્ટન્ટ (CA) ઇન્કમટેક્સ વિભાગના રડારમાં આવ્યા હોવાનું સામે આવ્યું છે. અલગ-અલગ સ્થળોએ અધિકારીઓ દ્વારા દસ્તાવેજો, નાણાકીય વ્યવહારો અને અન્ય મહત્વના રેકોર્ડની તપાસ કરવામાં આવી રહી છે.

પ્રાથમિક તપાસમાં એવી વિગતો સામે આવી છે કે કેટલાક ચાર્ટર્ડ એકાઉન્ટન્ટ દ્વારા બોગસ Form 15CB સર્ટિફિકેટ આપવામાં આવ્યા હોવાના આક્ષેપ છે. આ સર્ટિફિકેટના આધારે વિદેશમાં નાણાં મોકલવાની પ્રક્રિયા કરવામાં આવતી હોવાની શંકા વ્યક્ત કરવામાં આવી રહી છે. ઇન્કમટેક્સ વિભાગ આ સમગ્ર વ્યવહારોની ઝીણવટભરી તપાસ કરી રહ્યું છે.

વધુ એક મહત્વની માહિતી સામે આવી

તપાસ દરમિયાન વધુ એક મહત્વની માહિતી સામે આવી છે કે ઇમ્પોર્ટ-એક્સપોર્ટના ચલણ દર્શાવીને ભારતીય ચલણને વિદેશમાં ટ્રાન્સફર કરવામાં આવતું હતું. તપાસ એજન્સીઓની શંકા છે કે કેટલાક વ્યવહારો માત્ર કાગળ પર જ દર્શાવવામાં આવતા હતા. વાસ્તવમાં કોઈપણ પ્રકારનો માલ મોકલવામાં આવ્યો ન હતો કે કોઈ સેવા પૂરી પાડવામાં આવી ન હતી, છતાં દસ્તાવેજોમાં વેપાર થયો હોવાનું દર્શાવીને નાણાંની હેરફેર કરવામાં આવતી હતી.

15CB સર્ટિફિકેટ અને અન્ય નાણાકીય રેકોર્ડની તપાસ

ઇન્કમટેક્સ વિભાગ હવે આવા તમામ દસ્તાવેજો, બેંક ટ્રાન્ઝેક્શન, ઇમ્પોર્ટ-એક્સપોર્ટ સંબંધિત બિલ, Form 15CB સર્ટિફિકેટ અને અન્ય નાણાકીય રેકોર્ડની તપાસ કરી રહ્યું છે. અધિકારીઓ દ્વારા સંબંધિત વ્યક્તિઓ અને સંસ્થાઓ પાસેથી જરૂરી માહિતી પણ એકત્ર કરવામાં આવી રહી છે. અમદાવાદ, ગાંધીધામ, મુન્દ્રા અને રાજકોટમાં ચાલી રહેલી આ કાર્યવાહી દરમિયાન અનેક મહત્વના પુરાવા મળવાની શક્યતા વ્યક્ત કરવામાં આવી રહી છે. ઇન્કમટેક્સ વિભાગ સમગ્ર મામલાની દરેક દિશામાં તપાસ કરી રહ્યું છે અને નાણાંના વ્યવહારોની સંપૂર્ણ ચેઇનને ચકાસવામાં આવી રહી છે.

આ પણ વાંચો : વડોદરામાં રાત્રે નશામાં ધૂત કાર ચાલકોનો આતંક, અક્ષરચોક ખાતે મોપેડ સવાર દંપતીને અડફેટે લીધા

હાલ સમગ્ર કાર્યવાહી ચાલુ છે અને ઇન્કમટેક્સ વિભાગ દ્વારા સત્તાવાર રીતે વધુ વિગતો જાહેર કરવામાં આવી નથી. જોકે બોગસ Form 15CB સર્ટિફિકેટ, કાગળ પરના વેપાર અને ભારતીય ચલણને વિદેશમાં ટ્રાન્સફર કરવાના મામલે તપાસ વધુ તેજ કરવામાં આવી હોવાનું જાણવા મળ્યું છે. આગામી દિવસોમાં તપાસ પૂર્ણ થયા બાદ વધુ મહત્વના ખુલાસા થવાની શક્યતા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ