અમદાવાદ / પાકિસ્તાનની જેલમાં ગુજરાતના માછીમારનું મોત, સજા પૂરી થયા બાદ પણ હતો કેદ

પાકિસ્તાનની જેલમાં સજા પૂરી થયા બાદ પણ કેદ રહેલા ગુજરાતના એક માછીમારનું ૨૭ ઓગસ્ટે મોત થયું છે. આ વર્ષે પાકિસ્તાનની કસ્ટડીમાં મોતને ભેટનાર ગુજરાતના આ બીજા માછીમાર છે.

મુંબઈ સ્થિત શાંતિ કાર્યકર અને પત્રકાર જતિન દેસાઈએ સોમવારે એક નિવેદન દ્વારા આ માહિતી જાહેર કરી હતી. દેસાઈ લાંબા સમયથી પાકિસ્તાનની જેલમાં સજા ભોગવી રહેલા ભારતીય માછીમારોની મુક્તિ માટે અવાજ ઉઠાવી રહ્યા છે. તેમણે પાકિસ્તાનની જેલોમાં સજા પૂરી કરી ચૂકેલા પરંતુ હજુ સુધી મુક્ત ન કરાયેલા ૧૭૭ ભારતીય માછીમારોને તાત્કાલિક મુક્ત કરવાની માગ પણ કરી છે.

દેસાઈએ નિવેદનમાં જણાવ્યું છે કે ૨૭ ઓગસ્ટે પાકિસ્તાનની જેલમાં કેદ ગુજરાતના એક ભારતીય માછીમારનું કરાચીની હોસ્પિટલમાં મોત થયું હતું. આ વર્ષે પાકિસ્તાનની કસ્ટડીમાં બે ભારતીય માછીમારોનાં મોત થયાં છે. ગયા અઠવાડિયે મૃત્યુ પામેલા માછીમારની સજા માર્ચ, ૨૦૨૨માં પૂરી થઈ ગઈ હતી, છતાં તે વધુ ચાર વર્ષ જેલમાં રહ્યો. મૃત્યુ પામેલા માછીમારનું નામ દેસાઈએ જાહેર કર્યું નથી. જોકે, તેઓ ગુજરાતના ઊના વિસ્તારના રહેવાસી હોવાનું તેમણે જણાવ્યું છે.

૧૭૭ ભારતીય માછીમારોની મુક્તિની માગ કરતાં દેસાઈએ કહ્યું છે કે ભારતે શનિવારે (૨૯ ઓગસ્ટે) અટારી-વાઘા સરહદ મારફતે આઠ માછીમારો સહિત ૨૫ પાકિસ્તાની કેદીઓને મુક્ત કરીને સ્વદેશ પરત મોકલ્યા છે. હવે પાકિસ્તાને પણ લાંબા સમય પહેલાં સજા પૂરી કરી ચૂકેલા અને જેમની ભારતીય નાગરિકતા વર્ષો પહેલાં જ પ્રમાણિત થઈ ચૂકી છે એવા ૧૭૭ ભારતીય માછીમારોને મુક્ત કરીને પરત મોકલવા જોઈએ.

તેમણે વધુમાં કહ્યું હતું કે, “ભારતના સદ્ભાવનાપૂર્ણ પગલાનો બદલો પાકિસ્તાને પણ સદ્ભાવનાથી આપવો જોઈએ અને સજા પૂરી કરી ચૂકેલા ભારતીય માછીમારો તેમજ અન્ય નાગરિક કેદીઓને મુક્ત કરવા જોઈએ, જેમની નાગરિકતા પણ પ્રમાણિત થઈ ચૂકી છે.”

આ પણ વાંચોઃ દ્વારકામાં જન્માષ્ટમીના દિવસે દર્શન સમયમાં મોટો ફેરફાર, સવારે મંગળા આરતીથી મધરાતે શ્રીકૃષ્ણ જન્મોત્સવ આરતી સુધીનું સંપૂર્ણ સમયપત્રક જાહેર

દેસાઈના જણાવ્યા મુજબ, હાલમાં પાકિસ્તાનની વિવિધ જેલોમાં 197 જેટલા ભારતીય માછીમારો કેદ છે. તેમાંના મોટા ભાગના ગુજરાત અને કેન્દ્રશાસિત પ્રદેશ દીવના રહેવાસી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ