National / ''જરૂરી ના હોય તો સોનું...'', ગોલ્ડને લઇ PM મોદીની દેશવાસીઓને સૌથી મોટો સંદેશ

વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ ઇન્સ્ટાગ્રામ પર એક રિલ શેર કરીને દેશવાસીઓને 7.8%નો વિકાસ દર પ્રાપ્ત કરવા બદલ ખૂબ-ખૂબ અભિનંદન પાઠવ્યા છે. પોતાના સંદેશમાં વડાપ્રધાને દેશવાસીઓની સંકલ્પ શક્તિ અને પુરુષાર્થની પ્રશંસા કરી હતી. તેમણે કહ્યું કે જ્યારે સમગ્ર વિશ્વ યુદ્ધની સ્થિતિ, વૈશ્વિક સંકટો અને સપ્લાય ચેઈનની સમસ્યાઓથી ઘેરાયેલું છે અને 2020ના કોવિડ કાળ પછી પણ સ્થિરતા જોવા મળી રહી નથી, ત્યારે પણ ભારત ખૂબ જ ઝડપી ગતિએ પ્રગતિ કરી રહ્યું છે.

વડાપ્રધાન નરેન્દ્ર મોદીએ પોતાના સંદેશમાં દેશની આર્થિક પ્રગતિનો ઉલ્લેખ કરતા કહ્યું કે આટલા બધા વૈશ્વિક પડકારો વચ્ચે પણ ભારતે 7.8% ગ્રોથ રેટ પ્રાપ્ત કર્યો છે. તેમણે દેશવાસીઓની મહેનત અને સંકલ્પ શક્તિને આ સફળતા પાછળનું મહત્વનું કારણ ગણાવ્યું હતું. વડાપ્રધાને કહ્યું કે ભારત સામે અનેક પડકારો છે, પરંતુ આ તમામ પડકારોને પાર કરીને દેશ સતત આગળ વધી રહ્યો છે.

નિરાશાના ગર્તમાં ડૂબેલો વિપક્ષ જુઠ્ઠાણું ફેલાવી રહ્યો છે

પોતાના સંદેશમાં વડાપ્રધાન નરેન્દ્ર મોદીએ વિપક્ષ પર પણ સીધું નિશાન સાધ્યું હતું. તેમણે કહ્યું હતું કે દેશમાં જ કેટલાક લોકો નિરાશાના ગર્તમાં ડૂબેલા છે અને તેઓ જુઠ્ઠાણું ફેલાવીને ચારેય તરફ નકારાત્મકતા ઊભી કરવાનો પ્રયાસ કરી રહ્યા છે. વડાપ્રધાને કહ્યું કે આ તમામ પડકારો અને નકારાત્મકતા વચ્ચે પણ ભારતે 7.8% ગ્રોથ રેટ પ્રાપ્ત કર્યો છે. તેમણે દેશની આ ગતિને જાળવી રાખવા અને તેને વધુ આગળ વધારવા માટે ‘આત્મનિર્ભર ભારત’ બનવું ખૂબ જ મહત્વનું ગણાવ્યું હતું.

પ્રોત્સાહન આપવા માટે દેશના નાગરિકોને ખાસ અપીલ કરી

વડાપ્રધાને આર્થિક સ્થિરતા અને સ્વદેશીને પ્રોત્સાહન આપવા માટે દેશના નાગરિકોને ખાસ અપીલ કરી હતી. તેમણે લોકોને ‘વોકલ ફોર લોકલ’નો મંત્ર અપનાવવા માટે કહ્યું હતું. વડાપ્રધાને જણાવ્યું કે દેશના નાગરિકોએ બિનજરૂરી વિદેશ પ્રવાસ કરવાથી બચવું જોઈએ. જો શક્ય હોય તો વિદેશમાં લગ્ન કરવાનું પણ ટાળવું જોઈએ. આ સાથે જ તેમણે જરૂર ન હોય તો સોનું ન ખરીદવાની પણ અપીલ કરી હતી.

સ્વદેશી વસ્તુઓ અને આત્મનિર્ભરતા પર ભાર મૂક્યો

વડાપ્રધાને પોતાના સંદેશમાં સ્વદેશી વસ્તુઓ અને આત્મનિર્ભરતા પર ભાર મૂક્યો હતો. તેમણે કહ્યું કે આપણે જેટલું સ્વદેશી અને આત્મનિર્ભરતા પર ભાર મૂકીશું, તેટલી જ દેશની આર્થિક તાકાત વધશે. તેમના કહેવા પ્રમાણે દેશની અર્થવ્યવસ્થાને મજબૂત બનાવવા માટે માત્ર સરકારના પ્રયાસો પૂરતા નથી, પરંતુ દેશના નાગરિકોની ભૂમિકા પણ મહત્વની છે. લોકો સ્થાનિક વસ્તુઓને પ્રોત્સાહન આપશે અને બિનજરૂરી ખર્ચથી બચશે તો તેની સીધી અસર દેશની આર્થિક તાકાત પર પડશે.

40 કરોડ દેશવાસીઓની શક્તિથી વિકસિત ભારતનો સંકલ્પ

વડાપ્રધાને વિશ્વાસ વ્યક્ત કર્યો હતો કે જ્યારે દેશની આઝાદીના 100 વર્ષ પૂર્ણ થશે, ત્યારે આપણે આપણી યુવા પેઢીને એક સંપૂર્ણ વિકસિત ભારત સોંપી શકીશું. તેમણે કહ્યું કે આપણી નીતિ યોગ્ય છે અને નિયત સાફ છે. 140 કરોડ દેશવાસીઓની શક્તિ દેશને નવી ઊંચાઈઓ પર લઈ જઈ રહી છે. વડાપ્રધાને દેશની યુવા પેઢી અને સામાન્ય નાગરિકોની શક્તિ પર વિશ્વાસ વ્યક્ત કરતા વિકસિત ભારતના સંકલ્પને આગળ વધારવાની વાત કરી હતી.

વડાપ્રધાન નરેન્દ્ર મોદી હવે જનતા અને યુવાનો સુધી સીધો સંદેશ પહોંચાડવા માટે સોશિયલ મીડિયા અને ઇન્સ્ટાગ્રામ રિલનો સક્રિય ઉપયોગ કરી રહ્યા છે. આ માધ્યમથી તેઓ દેશના લોકો સુધી સીધી વાત પહોંચાડે છે અને અલગ અલગ મુદ્દાઓ પર પોતાનો સંદેશ આપે છે. આ વખતે પણ તેમણે ઇન્સ્ટાગ્રામ પર રિલ શેર કરીને 7.8% વિકાસ દરની વાત કરી અને દેશવાસીઓને અભિનંદન પાઠવ્યા છે.

આ પણ વાંચો : કેન્દ્રીય કર્મચારીઓને મળશે ₹14.10 લાખ સુધીનું એરિયર! એ કેવી રીતે?

આ સાથે વડાપ્રધાને દેશની આર્થિક તાકાત વધારવા માટે આત્મનિર્ભરતા અને સ્વદેશી વસ્તુઓને પ્રોત્સાહન આપવાની અપીલ કરી છે. બિનજરૂરી વિદેશ પ્રવાસ, વિદેશમાં લગ્ન અને જરૂર ન હોય તો સોનું ખરીદવાનું ટાળવા માટે પણ તેમણે લોકોને કહ્યું છે. વૈશ્વિક સ્તરે ચાલી રહેલા પડકારો વચ્ચે ભારત ઝડપથી આગળ વધી રહ્યું હોવાનું જણાવતા વડાપ્રધાને દેશવાસીઓને આ ગતિ જાળવી રાખવા અને વિકસિત ભારતના સંકલ્પને આગળ વધારવા માટે સાથે મળીને કામ કરવાની અપીલ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ