ગુજરાત / દિવાળી પહેલાં ગુજરાતથી ઉપડતી ટ્રેનોમાં ટિકિટ બુકિંગ કૌભાંડના આક્ષેપો, ડમી નામે સીટ બુક કરી મુસાફરોને આપ્યાની ફરિયાદ

દિવાળીના તહેવાર પહેલાં ગુજરાતથી ઉપડતી કેટલીક ટ્રેનોમાં ટિકિટ બુકિંગને લઈને કૌભાંડના આક્ષેપો સામે આવ્યા છે. રેલવેના ઉચ્ચ અધિકારીઓને કરવામાં આવેલી ફરિયાદમાં દાવો કરવામાં આવ્યો છે કે કેટલીક સીટો ડમી અથવા કથિત ખોટા નામે બુક કરવામાં આવે છે અને બાદમાં અન્ય મુસાફરોને આપવામાં આવે છે.

ફરિયાદમાં અમદાવાદ, સાબરમતી, ગાંધીનગર અને આસપાસનાં સ્ટેશનો પરથી જમ્મુ, કટરા, દિલ્હી, ચંડીગઢ, હિમાચલ પ્રદેશ, કાશ્મીર અને કેરલમ તરફ જતી ટ્રેનોનો ઉલ્લેખ કરવામાં આવ્યો છે. ફરિયાદ મુજબ, કેટલાક ટૂર ઓપરેટર અને અનધિકૃત રેલવે એજન્ટો રેલવે દ્વારા કોઈ વિશેષ કોચ કે સીટ ક્વોટા ફાળવવામાં આવ્યો ન હોવા છતાં દિવાળી પેકેજના ભાગરૂપે કન્ફર્મ રેલવે ટિકિટ આપવાની ખાતરી આપી રહ્યા હોવાનો આક્ષેપ છે.

ટિકિટો અગાઉથી ડમી નામે બુક કરવામાં આવે

ફરિયાદમાં જણાવાયું છે કે ટિકિટો અગાઉથી ડમી નામે બુક કરવામાં આવે છે અને ટ્રેન રવાના થવાના થોડા સમય પહેલાં વાસ્તવિક મુસાફરોને આપવામાં આવે છે. આક્ષેપ મુજબ, કેટલાક મુસાફરોને શરૂઆતમાં જણાવવામાં આવે છે કે તેમની બુકિંગ કન્ફર્મ થઈ શકશે નહીં, પરંતુ ત્યાર બાદ અન્ય વ્યક્તિના નામે કન્ફર્મ ટિકિટ આપવામાં આવે છે. ફરિયાદમાં મુસાફરી દરમિયાન ઓળખ ચકાસણીની પ્રક્રિયા સામે પણ સવાલો ઉઠાવવામાં આવ્યા છે.

અંદાજે 110થી 120 સ્લીપર

ફરિયાદમાં જણાવ્યા મુજબ, ૫થી 15 નવેમ્બર દરમિયાન કેટલીક ટ્રેનોમાં અંદાજે 110થી 120 સ્લીપર અને ૩૦થી ૪૦ એસી સીટ શંકાસ્પદ રીતે બુક થયાની આશંકા વ્યક્ત કરવામાં આવી છે. આ ઉપરાંત રાજધાની જેવી ટ્રેનોમાં આશરે 60 સીટના બલ્ક બુકિંગ અંગે પણ તપાસની માંગ કરવામાં આવી છે.

આ પણ વાંચો : ગાંધી જયંતીએ અમદાવાદ પોલીસનું ‘નો ડ્રગ્સ’ અભિયાન શરૂ, 5 હજારથી વધુ લોકો જોડાયા

કઈ-કઈ ટ્રેનનાં બુકિંગની તપાસની માગ

રેલવે અધિકારીઓને આપવામાં આવેલી ફરિયાદમાં કેટલીક ટ્રેનોનાં નામ અને સંભવિત શંકાસ્પદ બુકિંગની વિગતોની તપાસ કરવાની માંગ કરવામાં આવી છે. જે ટ્રેનોનો ઉલ્લેખ કરવામાં આવ્યો છે તેમાં સામેલ છે:

• સાબરમતી–જમ્મુ તાવી એક્સપ્રેસ
• હાપા–કટરા એક્સપ્રેસ
• જામનગર–કટરા એક્સપ્રેસ
• સર્વોદય એક્સપ્રેસ
• જેએટી વિવેક એક્સપ્રેસ
• સાબરમતી–કટરા એક્સપ્રેસ
• ગાંધીનગર કેપિટલ–દૌલતપુર ચોક એક્સપ્રેસ
• આશ્રમ એક્સપ્રેસ
• યોગા એક્સપ્રેસ
• સાબરમતી–નવી દિલ્હી રાજધાની
• સાબરમતી–બનારસ સુપરફાસ્ટ

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ