ધર્મ / કાલથી પવિત્ર પુરુષોત્તમ મહિનો, 15 જૂન સુધી ભૂલથી પણ ન કરતાં આ કામ, નહીં તો પસ્તાશો

અઘિક માસનો પવિત્ર પ્રારંભ 17 મે 2026થી થઈ રહ્યો છે, જે આગામી 15 જૂન સુધી ચાલશે. સનાતન ધર્મમાં અધિક માસને ખૂબ જ વિશેષ અને પવિત્ર માનવામાં આવે છે. આ મહિનો દર વર્ષે આવતો નથી, પરંતુ જ્યોતિષશાસ્ત્ર અને હિંદુ પંચાંગ મુજબ લગભગ દર ત્રીજા વર્ષે આવે છે. ધાર્મિક માન્યતાઓ અનુસાર આ સમય ભગવાન વિષ્ણુની વિશેષ કૃપા મેળવવાનો અને આત્મિક શુદ્ધિ માટેનો શ્રેષ્ઠ સમય ગણાય છે.

ચંદ્ર વર્ષ આશરે 354 દિવસનું

જ્યોતિષશાસ્ત્ર મુજબ ચંદ્ર વર્ષ આશરે 354 દિવસનું હોય છે, જ્યારે સૌર વર્ષ 365 દિવસનું હોય છે. આ બંને વચ્ચે લગભગ 11 દિવસનો તફાવત રહે છે. આ તફાવતને સંતુલિત કરવા અને તહેવારો યોગ્ય ઋતુમાં જ આવે તે માટે દર ત્રણ વર્ષે એક વધારાનો મહિનો ઉમેરવામાં આવે છે, જેને અધિક માસ અથવા પુરુષોત્તમ માસ તરીકે ઓળખવામાં આવે છે. આ મહિનો માત્ર કેલેન્ડરને સંતુલિત કરવા પૂરતો મર્યાદિત નથી, પરંતુ ધાર્મિક રીતે પણ તેને અત્યંત મહત્વ આપવામાં આવ્યું છે.

ભગવાન વિષ્ણુને સમર્પિત

ધાર્મિક ગ્રંથોમાં અધિક માસને ભગવાન વિષ્ણુને સમર્પિત માનવામાં આવ્યો છે. એવી માન્યતા છે કે આ મહિનામાં કરવામાં આવેલી પૂજા, જાપ, દાન અને સારા કાર્યોનું ફળ સામાન્ય દિવસોની સરખામણીએ અનેકગણું વધારે મળે છે. આ કારણે ભક્તો આ સમગ્ર મહિના દરમિયાન ખાસ નિયમોનું પાલન કરે છે અને આધ્યાત્મિક જીવન તરફ વધુ ધ્યાન આપે છે.

ભગવાન વિષ્ણુની આરાધના કરવી ખૂબ શુભ

અધિક માસ દરમિયાન ભગવાન વિષ્ણુની આરાધના કરવી ખૂબ શુભ માનવામાં આવે છે. ભક્તોએ દરરોજ વિષ્ણુ સહસ્ત્રનામનો પાઠ કરવો જોઈએ અને સત્યનારાયણ ભગવાનની વ્રતકથા વાંચવી અથવા સાંભળવી શુભ માનવામાં આવે છે. ઘણા લોકો મંદિરોમાં જઈ વિશેષ પૂજા-અર્ચના પણ કરે છે. સાથે સાથે “ઓમ નમો ભગવતે વાસુદેવાય” મંત્રનો રોજ 108 વખત જાપ કરવાથી મનને શાંતિ મળે છે અને નકારાત્મકતા દૂર થાય છે એવી માન્યતા છે.

દાનનું વિશેષ મહત્વ

આ મહિને દાનનું વિશેષ મહત્વ પણ જણાવવામાં આવ્યું છે. ગરીબો અને જરૂરિયાતમંદોને અન્નદાન, વસ્ત્રદાન અને મંદિરોમાં દીપદાન કરવાથી અક્ષય પુણ્ય પ્રાપ્ત થાય છે એવું માનવામાં આવે છે. ધાર્મિક માન્યતાઓ અનુસાર આ સમય સેવા અને પરોપકાર માટે સૌથી ઉત્તમ માનવામાં આવે છે. ઘણા ભક્તો આ મહિના દરમિયાન ગૌસેવા, ભોજન પ્રસાદ અને અન્ય સેવાકીય કાર્યો પણ કરે છે.

પવિત્ર ગ્રંથોના પાઠનું પણ વિશેષ મહત્વ

અધિક માસમાં ભગવદ્ ગીતા, શ્રીમદ્ ભાગવત પુરાણ અને રામાયણ જેવા પવિત્ર ગ્રંથોના પાઠનું પણ વિશેષ મહત્વ છે. ધાર્મિક વિદ્વાનો કહે છે કે આ મહિનો આત્મચિંતન અને આધ્યાત્મિક વિકાસ માટેનો શ્રેષ્ઠ સમય છે. આ દરમિયાન વ્યક્તિએ પોતાના વિચારો અને જીવનશૈલીમાં સકારાત્મક પરિવર્તન લાવવાનો પ્રયાસ કરવો જોઈએ.

માંગલિક અને ભૌતિક કાર્યો પર પ્રતિબંધ

જોકે આ મહિના દરમિયાન કેટલાક માંગલિક અને ભૌતિક કાર્યો પર પ્રતિબંધ માનવામાં આવે છે. લગ્ન, ગૃહપ્રવેશ, મુંડન સંસ્કાર, જનોઈ જેવા શુભ કાર્યો આ સમયમાં કરવામાં આવતા નથી. સાથે જ નવું ઘર ખરીદવું, વાહન લેવું અથવા કિંમતી દાગીનાની ખરીદી કરવી પણ ટાળવામાં આવે છે. ધાર્મિક માન્યતાઓ મુજબ આ સમય ભૌતિક સુખોથી દૂર રહી આત્મિક શાંતિ અને ભગવાનના ચિંતન માટે સમર્પિત કરવાનો હોય છે.

આ પણ વાંચો : બાથરુમમાં કદી પણ ન રહેવા દો આ એક ચીજ, ઉડી જશે બેન્ક બેલેન્સ

શું કરવું જોઇએ

જે ભક્તો આખો મહિનો વિશેષ સાધના કરવા માંગે છે તેઓ ઉપવાસ અથવા એકટાણું પણ રાખે છે. આ દરમિયાન સાત્વિક જીવનશૈલી અપનાવવાની સલાહ આપવામાં આવે છે. ભક્તોએ સૂર્યોદય પહેલાં ઉઠીને સ્નાન અને પૂજા કરવી જોઈએ. દિવસમાં માત્ર એક વખત સાત્વિક ભોજન લેવું અને ડુંગળી, લસણ, માંસાહાર તથા અનાજનો ત્યાગ કરવો જોઈએ. ફળાહાર, દૂધ અને સાબુદાણા જેવી ફરાળી વસ્તુઓનું સેવન કરી શકાય છે. ધાર્મિક રીતે અધિક માસને આત્માની શુદ્ધિ, ભક્તિ અને આધ્યાત્મિક પ્રગતિ માટેનો સૌથી શુભ સમય માનવામાં આવે છે. આ મહિનો લોકોને થોડા સમય માટે ભૌતિક જીવનની દોડધામમાંથી દૂર રહી ભગવાનના ચિંતન અને સારા કાર્યો તરફ ધ્યાન કેન્દ્રિત કરવાની પ્રેરણા આપે છે.

(DISCLAIMER: ધર્મને લગતો આ આર્ટિકલ માત્ર અલગ-અલગ મળતી માહિતીને આધારિત છે. નહીં કે તમે તેને સત્ય જ માની લો. કારણ કે ધર્મ દરેકની આસ્થાનો વિષય છે. અહીં આપવામાં આવેલી જાણકારીને અનુસરતા પહેલા ધર્મ કે શાસ્ત્ર આધારિત જ્ઞાન ધરાવનારા વિદ્ધાનોની સલાહ લેવી અતિ આવશ્યક રહેશે. નહીં તો કોઇ મુશ્કેલી સર્જાય તો જવાબદારી vtvgujarati.com નહીં રહે. કારણ કે આ આર્ટિકલ ફક્ત ન્યૂઝના હેતુસર પબ્લિશ કરવામાં આવ્યો છે.)

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ