કાર્યવાહી / ભાવનગર નકલી દારૂકાંડમાં વધુ એક આરોપીની ધરપકડ, કોર્ટે દિવસના રિમાન્ડ મંજૂર કર્યા

ભાવનગરમાં ચર્ચાસ્પદ નકલી દારૂકાંડની તપાસમાં પોલીસે વધુ એક મહત્વની કડી ઝડપી પાડી છે. સર ગામની તપાસ દરમિયાન સપ્લાયર તરીકે સામે આવેલા હરદીપસિંહ મોરીની પોલીસે ધરપકડ કરી છે. આરોપીને ભાવનગરની કોર્ટમાં રજૂ કરી પોલીસે 10 દિવસના પોલીસ રિમાન્ડની માગણી કરી હતી, જોકે કોર્ટે 4 દિવસના પોલીસ રિમાન્ડ મંજૂર કર્યા છે.

કોર્ટે ચાર દિવસના રિમાન્ડ મંજૂર કર્યા

પોલીસ તપાસમાં હરદીપસિંહ મોરી દ્વારા ‘રોયલ સ્ટેગ’ બ્રાન્ડની ડુપ્લિકેટ દારૂની પેટીઓ સપ્લાય કરવામાં આવી હોવાની માહિતી સામે આવી છે. બુટલેગરો દ્વારા સર અને કમળેજ ગામના બુટલેગરો સુધી દારૂ પહોંચાડવામાં આવ્યો હોવાની વિગતો પણ પોલીસને મળી હોવાનું જાણવા મળે છે. હવે ચાર દિવસના રિમાન્ડ દરમિયાન પોલીસ આરોપીની સઘન પૂછપરછ કરશે. નકલી દારૂનો જથ્થો ક્યાંથી આવતો હતો, કોને સપ્લાય કરવામાં આવતો હતો અને સમગ્ર સપ્લાય નેટવર્કમાં અન્ય કયા લોકો સંડોવાયેલા છે તે અંગે મહત્વની વિગતો બહાર આવવાની શક્યતા છે.

ગૌતમ સોલંકી સાથેના કનેક્શનની પણ તપાસ

હરદીપસિંહ મોરીના ગૌતમ સોલંકી સાથેના સંભવિત કનેક્શન અંગે પણ પોલીસે તપાસ તેજ કરી છે. બંને વચ્ચે કોઈ પ્રકારનો વ્યવસાયિક કે સપ્લાય સંબંધ હતો કે કેમ તે અંગે પૂછપરછ કરવામાં આવશે. આ ઉપરાંત ડુપ્લિકેટ ‘રોયલ સ્ટેગ’ની બોટલો, પેકિંગ અને અન્ય સામગ્રી ક્યાંથી મેળવવામાં આવતી હતી તેના સ્ત્રોત સુધી પહોંચવા માટે પણ પોલીસ તપાસ કરી રહી છે.

આ પણ વાંચોઃ હાઇરાઇઝ પ્રોજેક્ટથી પાણી-ગટર-રોડ પર વધતા બોજને રોકવા AMCની નવી SOP, બિલ્ડિંગ પ્લાન સાથે ઇન્ફ્રાસ્ટ્રક્ચર પ્લાનિંગ ફરજિયાત

રિમાન્ડ દરમ્યાન હજુ વધુ વિગત સામે આવવાની શક્યતા

પોલીસને આશા છે કે રિમાન્ડ દરમિયાન હરદીપસિંહ મોરી પાસેથી નકલી દારૂકાંડમાં સંડોવાયેલા અન્ય વ્યક્તિઓના નામ અને સમગ્ર સપ્લાય ચેઇન અંગે મહત્વની માહિતી મળી શકે છે. હરદીપસિંહના રિમાન્ડને પગલે નકલી દારૂકાંડની સપ્લાય ચેઇનની વધુ કડીઓ જોડવામાં પોલીસને સફળતા મળે તેવી શક્યતા છે. હવે તપાસ દરમિયાન સામે આવતી વિગતો સમગ્ર કાંડમાં સંડોવાયેલા અન્ય આરોપીઓ સુધી પોલીસને પહોંચાડે છે કે કેમ તેના પર નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ