ગુજરાત / AUDA ડિરેક્ટરની ખોટી ઓળખ આપી મકાન અપાવવાના બહાને લાખો પડાવ્યા, કાંડ જાણીને ચોંકી જશો

અમદાવાદમાં AUDAના મકાનો અપાવવાના બહાને લોકો સાથે છેતરપિંડી કરવામાં આવી હોવાનો મામલો સામે આવ્યો છે. AUDAના હાઉસ ડિરેક્ટર હોવાની ખોટી ઓળખ આપીને 11 લોકોને વિશ્વાસમાં લઈ લાખો રૂપિયા પડાવ્યાનો આરોપ છે.આ મામલે આરોપી રાજેશ રાઠોડ સામે કુલ 24.50 લાખ રૂપિયાની છેતરપિંડીની ફરિયાદ નોંધાઈ છે અને વસ્ત્રાપુર પોલીસે તપાસ શરૂ કરી છે.

મળતી માહિતી મુજબ, આરોપી રાજેશ રાઠોડે ગુજરાતી ફિલ્મોના પ્રમોશન દરમિયાન કેટલાક લોકો સાથે સંપર્ક કેળવ્યો હતો. ત્યારબાદ ધીમે ધીમે તેમની સાથે વિશ્વાસનો સંબંધ બનાવ્યો હતો. આ દરમિયાન તેણે પોતે AUDAના હાઉસ ડિરેક્ટર હોવાનું જણાવ્યું હોવાનો આક્ષેપ છે. આરોપીએ લોકો સામે AUDAના મકાનો અપાવવાની લાલચ આપી હતી. લોકોને સસ્તા અથવા સરળતાથી AUDAના મકાનો અપાવી શકશે તેવી વાતો કરીને તેમને વિશ્વાસમાં લેવામાં આવ્યા હતા. પોતાની ઓળખ સાચી હોવાનું બતાવવા માટે આરોપીએ AUDAના બોર્ડ ઓફ ડિરેક્ટરની ઓળખ પણ આપી હતી.

ખોટા દસ્તાવેજો અને નકલી બેંક સ્ટેટમેન્ટ બતાવ્યાનો આક્ષેપ

આરોપી માત્ર મકાનો અપાવવાની વાતો કરીને જ અટક્યો ન હતો. તેણે લોકોને વિશ્વાસમાં લેવા માટે AUDA સાથે જોડાયેલા હોવાનું દર્શાવતા ખોટા દસ્તાવેજો પણ બતાવ્યા હોવાનો આક્ષેપ છે. આ ઉપરાંત, આરોપીએ સ્વિસ બેંકમાં 3400 કરોડ રૂપિયા હોવાનું દર્શાવતું નકલી બેંક સ્ટેટમેન્ટ પણ લોકોને બતાવ્યું હોવાનો આક્ષેપ કરવામાં આવ્યો છે. આ રીતે પોતાની પાસે મોટી રકમ અને મોટા લોકો સાથે સંપર્ક હોવાનું બતાવીને તેણે લોકોને વધુ વિશ્વાસમાં લીધા હોવાનું ફરિયાદમાં જણાવાયું છે.

11 લોકો પાસેથી 24.50 લાખ પડાવ્યાનો આરોપ

આ રીતે વિશ્વાસમાં લીધા બાદ આરોપીએ AUDAના મકાનો અપાવવાના નામે લોકો પાસેથી પૈસા લીધા હતા. કુલ 11 લોકો સાથે આ રીતે છેતરપિંડી કરવામાં આવી હોવાનો આક્ષેપ છે. આ કેસમાં આરોપી રાજેશ રાઠોડ સામે કુલ 24.50 લાખ રૂપિયાની છેતરપિંડીની ફરિયાદ નોંધાઈ છે. લોકોએ મકાનો મેળવવાની આશાએ આરોપીને પૈસા આપ્યા હતા. પરંતુ પૈસા આપ્યા બાદ લાંબો સમય પસાર થવા છતાં તેમને AUDAના મકાનો મળ્યા નહોતા. ત્યારબાદ લોકોને શંકા જતા સમગ્ર મામલો સામે આવ્યો હતો.

આ પણ વાંચો : અમદાવાદમાં રોગચાળો વકર્યો, ડેન્ગ્યુ-મેલેરિયા સહિતના અનેક રોગો એકસાથે સક્રિય

પૈસા આપ્યા છતાં મકાનો ન મળતા ભાંડો ફૂટ્યો

લોકોએ જ્યારે આરોપી પાસેથી મકાનો અંગે જવાબ માંગ્યો ત્યારે સંતોષકારક જવાબ મળ્યો નહોતો. મકાનો પણ મળ્યા નહીં અને આપેલા પૈસા અંગે પણ યોગ્ય માહિતી ન મળતા છેતરપિંડી થઈ હોવાની શંકા વધુ મજબૂત બની હતી. આખરે આ મામલે ભોગ બનનારા લોકોએ અમદાવાદના વસ્ત્રાપુર પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે આરોપી રાજેશ રાઠોડ સામે ગુનો નોંધ્યો છે અને સમગ્ર મામલે તપાસ શરૂ કરી છે. પોલીસ હવે આરોપીએ ખરેખર કેટલા લોકોને પોતાની જાળમાં ફસાવ્યા હતા, કેટલા રૂપિયા લીધા હતા અને ખોટા દસ્તાવેજો તથા નકલી બેંક સ્ટેટમેન્ટ ક્યાંથી મેળવ્યા હતા તે સહિતના મુદ્દાઓની તપાસ કરી રહી છે. હાલ આ સમગ્ર મામલે વધુ વિગતો તપાસ આગળ વધ્યા બાદ સામે આવી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ