કાર્યવાહી / ચોરવાડમાં SMCનો જુગારધામ પર સપાટો, 20થી વધુ જુગારીઓ ઝડપાયા

જૂનાગઢ: ચોરવાડમાં સ્ટેટ મોનિટરિંગ સેલ (SMC)ની ટીમે ગુપ્ત રીતે દરોડો પાડી જુગારધામ ઝડપી પાડ્યું હોવાની માહિતી સામે આવી છે. પ્રાથમિક માહિતી મુજબ, SMCની કાર્યવાહીમાં 20થી વધુ શખ્સો ઝડપાયા હોવાનું જાણવા મળી રહ્યું છે.

મળતી માહિતી પ્રમાણે, ચોરવાડ વિસ્તારમાં એક સ્થળે મોટા પાયે રૂપિયાની રોકડ સાથે જુગાર રમાતો હોવાની બાતમીના આધારે SMCની ટીમે કાર્યવાહી હાથ ધરી હતી. ટીમે અચાનક દરોડો પાડતાં જુગાર રમતા શખ્સોમાં નાસભાગ મચી હોવાનું જાણવા મળે છે.

સ્થાનિક પોલીસને જાણ કર્યા વગર કાર્યવાહી?

આ સમગ્ર કાર્યવાહી ચોરવાડ પોલીસને અંધારામાં રાખીને કરવામાં આવી હોવાની ચર્ચા છે. SMCની ટીમે ગુપ્ત ઓપરેશન હાથ ધરી સીધી જ દરોડાની કાર્યવાહી કરતાં સ્થાનિક પોલીસની કામગીરી સામે પણ સવાલો ઉઠી રહ્યા છે.

રોકડ સહિતનો મુદ્દામાલ કબજે

દરોડા દરમિયાન જુગારધામમાંથી રોકડ રકમ સહિતનો મુદ્દામાલ કબજે લેવાયો હોવાની પ્રાથમિક માહિતી છે. જોકે, કબજે કરાયેલી ચોક્કસ રોકડ રકમ અને અન્ય મુદ્દામાલ અંગે સત્તાવાર વિગતો હજુ સામે આવી નથી.

SMCની કાર્યવાહીથી અન્ય જુગારધામોમાં ફફડાટ

ચોરવાડમાં SMCની રેડના સમાચાર ફેલાતાં જ જૂનાગઢ જિલ્લામાં ચાલતા અન્ય જુગારધામોના સંચાલકોમાં પણ ફફડાટ ફેલાયો હોવાની ચર્ચા છે. કેટલાક સ્થળોએ જુગારધામો તાત્કાલિક બંધ કરી સંચાલકો ફરાર થઈ ગયા હોવાની પણ માહિતી સામે આવી રહી છે. SMCની આ કાર્યવાહી બાદ જિલ્લામાં ચાલતા જુગારના નેટવર્ક સાથે સંકળાયેલા લોકોમાં ભારે ફફડાટ જોવા મળી રહ્યો હોવાનું જાણવા મળે છે.

આ પણ વાંચોઃ 20 વર્ષ પહેલાં મૃત્યુ પામેલી મહિલાના નામે 7 લાખની લોન! બોગસ દસ્તાવેજો બનાવી બેંકને જ લગાવ્યો ચૂનો

વધુ વિગતો તપાસ બાદ સામે આવશે

હાલમાં ઝડપાયેલા શખ્સો સામે કાયદેસરની કાર્યવાહી હાથ ધરવાની તજવીજ ચાલી રહી હોવાનું જાણવા મળે છે. SMCની સમગ્ર કાર્યવાહી પૂર્ણ થયા બાદ કેટલા શખ્સો ઝડપાયા, કેટલી રોકડ અને મુદ્દામાલ જપ્ત થયો તેમજ જુગારધામના સંચાલકો કોણ છે તે સહિતની વધુ વિગતો સત્તાવાર રીતે સામે આવે તેવી શક્યતા છે.

‎ બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ