વિવાદ / મમતા બેનર્જીના ભાઈ મુશ્કેલીમાં: એક જ નેતા પાસે 4 મહત્વના હોદ્દા, બંગાળ ઓલિમ્પિક એસોસિએશને માંગ્યું રાજીનામું!

પશ્ચિમ બંગાળના રાજકારણ અને રમતગમત જગતમાંથી એક ખૂબ જ મોટા સમાચાર સામે આવી રહ્યા છે. બંગાળના પૂર્વ મુખ્યમંત્રી મમતા બેનર્જીના ભાઈ અને રાજ્યની સ્પોર્ટ્સ કમિટીના જાણીતા ચહેરા સ્વપન બેનર્જી ગંભીર નિયમોના ઉલ્લંઘન બદલ ખરાબ રીતે ઘેરાઈ ગયા છે. બંગાળ ઓલિમ્પિક એસોસિએશને (BOA) રમતગમતના નિયમોને નેવે મૂકીને એકસાથે અનેક સંગઠનોમાં સર્વોચ્ચ હોદ્દા પર બેસવા બદલ સ્વપન બેનર્જીને એક સખત નોટિસ પાઠવી છે. આ નોટિસમાં વહીવટીતંત્ર દ્વારા સ્પષ્ટ આદેશ આપવામાં આવ્યો છે કે તેઓ નિયમોની વિરુદ્ધ જઈને આટલી બધી સંસ્થાઓના વડા રહી શકે નહીં, જેથી તેમણે વહેલી તકે કોઈ એક સંસ્થાની પસંદગી કરીને બાકીના તમામ પદો પરથી રાજીનામું આપવું પડશે.

8 મેના રોજ ઈશ્યુ કરાઈ સત્તાવાર નોટિસ

મળતી માહિતી મુજબ, બંગાળ ઓલિમ્પિક એસોસિએશને (BOA) આ આકરો નિર્ણય લઈને 8 May ના રોજ એક સત્તાવાર પત્ર જાહેર કર્યો છે. આ પત્ર સીધો સ્વપન બેનર્જીને મોકલવામાં આવ્યો છે, જેઓ પોતે BOA ના એક્ઝિક્યુટિવ કમિટીના મેમ્બર પણ છે. રમતગમતના પ્રોટોકોલને જાળવવા માટે આ મહત્વપૂર્ણ નોટિસ પર BOA ના માનદ જનરલ સેક્રેટરી ઝહર દાસ દ્વારા હસ્તાક્ષર કરવામાં આવ્યા છે.

એક જ વ્યક્તિના હાથમાં 4 બધા હોદ્દા

આ વિવાદ પાછળનું મુખ્ય કારણ સ્વપન બેનર્જીનો એકચક્રી પ્રભાવ છે. તેઓ રમતગમતના નિયમોનું ઉલ્લંઘન કરીને એકસાથે 4 અલગ-અલગ અને પ્રતિષ્ઠિત સ્પોર્ટ્સ એસોસિએશનના પદો સંભાળી રહ્યા છે:

પહેલું પદ: વેસ્ટ બંગાળ પ્રોગ્રેસિવ બોક્સિંગ એસોસિએશનના સેક્રેટરી (મંત્રી)

બીજું પદ: બંગાળ સ્ટેટ ટેબલ ટેનિસ એસોસિએશનના પ્રેસિડેન્ટ (પ્રમુખ)

ત્રીજું પદ: વેસ્ટ બંગાળ સ્ટેટ હેન્ડબોલ એસોસિએશનના પ્રેસિડેન્ટ (પ્રમુખ)

ચોથું પદ: આ સિવાય તેઓ રાષ્ટ્રીય સ્તરે 'બોક્સિંગ ફેડરેશન ઓફ ઇન્ડિયા' ના જોઇન્ટ સેક્રેટરીનો પદભાર પણ સંભાળી રહ્યા છે.

એક જ વ્યક્તિ પાસે રમતગમતના આટલા બધા મહત્વના અને પાવરફુલ હોદ્દા હોવાના કારણે અન્ય પ્રતિભાઓ અને વહીવટકર્તાઓમાં લાંબા સમયથી અસંતોષ હતો.

શું કહે છે ઇન્ડિયન ઓલિમ્પિક એસોસિએશન (IOA) નો નિયમ?

આ સમગ્ર મામલે દેશની સર્વોચ્ચ સ્પોર્ટ્સ સંસ્થા ઇન્ડિયન ઓલિમ્પિક એસોસિએશનના (IOA) બંધારણ અને નિયમો ખૂબ જ સ્પષ્ટ છે. IOA ના નિયમોની કલમ એટલે કે આર્ટિકલ 27.3 માં સ્પષ્ટપણે લખવામાં આવ્યું છે કે, કોઈ પણ એક રાજ્યમાં કોઈ એક સ્પોર્ટ્સ એસોસિએશનનો હોદ્દેદાર અથવા પદાધિકારી તે જ રાજ્યની કોઈ બીજી રમતગમત સંસ્થા કે એસોસિએશનનો સભ્ય કે વડો બની શકે નહીં. તેનો સીધો અર્થ એ થાય કે ખેલ જગતમાં લોકશાહી અને પારદર્શિતા જાળવવા માટે એક વ્યક્તિ એક રાજ્યમાં માત્ર એક જ રમતનું નેતૃત્વ કરી શકે છે. પરંતુ સ્વપન બેનર્જી પાસે એક કે બે નહીં, પણ 3-3 સ્ટેટ લેવલના હોદ્દા છે, જે સીધેસીધું આર્ટિકલ 27.3 નું ઉલ્લંઘન સાબિત થાય છે.

સરકાર અને રાષ્ટ્રીય કમિટી સુધી પહોંચ્યો મામલો

બંગાળ ઓલિમ્પિક એસોસિએશને આ બાબતને અત્યંત ગંભીરતાથી લીધી છે. આ નોટિસ માત્ર સ્વપન બેનર્જી પૂરતી મર્યાદિત રાખવામાં આવી નથી. એસોસિએશને આ પત્રની એક સત્તાવાર કોપી ઇન્ડિયન ઓલિમ્પિક એસોસિએશનના (IOA) રાષ્ટ્રીય અધ્યક્ષને (President) પણ મોકલી આપી છે.

આ પણ વાંચો : કર્ણાટકના CM બનવા જઈ રહેલા શિવકુમાર પાસે કરોડોનો શોપિંગ મોલ, રિસોર્ટ સિવાય બીજી કેટલી સંપત્તિ ?

આ સાથે જ પશ્ચિમ બંગાળ સરકારના રમતગમત મંત્રાલય એટલે કે યુથ સર્વિસીસ એન્ડ સ્પોર્ટ્સ ડિપાર્ટમેન્ટના પ્રિન્સિપલ સેક્રેટરીને (મુખ્ય સચિવ) પણ આ આખી ઘટનાની લેખિત જાણ કરવામાં આવી છે. હવે આ કેસ સ્પોર્ટ્સ ઓથોરિટી અને રાજ્ય સરકારના ટેબલ પર પહોંચી ગયો હોવાથી સ્વપન બેનર્જી માટે બચવું મુશ્કેલ લાગી રહ્યું છે અને તેમણે ટૂંક સમયમાં જ પોતાના પદો પરથી રાજીનામું આપવું પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ