ટેક / એપલ ઇવેન્ટમાં આઇફોન 18નું બેઝ મૉડલ લોન્ચ નહીં થાય, જાણો કેમ?

એપલ (Apple) પ્રેમીઓ માટે એક મોટા સમાચાર સામે આવ્યા છે. અત્યાર સુધી એપલ દર વર્ષે પોતાના વાર્ષિક ઈવેન્ટમાં સ્ટાન્ડર્ડ (બેઝ) મોડેલ અને પ્રીમિયમ પ્રો મોડેલ્સ એકસાથે ધામધૂમથી લોન્ચ કરતી હતી. પરંતુ આ વર્ષે યોજાનારા ઈવેન્ટમાં કંપની પોતાની વર્ષો જૂની રણનીતિ બદલી રહી છે. આજના ઈવેન્ટમાં સ્ટાન્ડર્ડ આઈફોન 18 (iPhone 18) રજૂ કરવામાં નહીં આવે અને તેનું લોન્ચિંગ આવતા વર્ષે (2027 ની શરૂઆતમાં) સુધી પાછળ ઠેલવવામાં આવી શકે છે.

આજના ઈવેન્ટમાં એપલ માત્ર તેના ત્રણ પ્રીમિયમ ફ્લેગશિપ ડિવાઈસ - આઈફોન 18 પ્રો (iPhone 18 Pro), આઈફોન 18 પ્રો મેક્સ (iPhone 18 Pro Max) અને કંપનીનો પહેલો ફોલ્ડેબલ આઈફોન (iPhone Ultra) રજૂ કરે તેવી શક્યતા છે. ઉલ્લેખનીય છે કે, 1 સપ્ટેમ્બરના રોજ ટિમ કૂકે પદ છોડ્યા બાદ નવા સીઈઓ બનેલા જોન ટર્નસ (John Ternus) નો આ પ્રથમ ગ્રાન્ડ પ્રેઝન્ટેશન ઈવેન્ટ હશે. ભારતીય સમય અનુસાર આ ઈવેન્ટ આજે રાત્રે 10:30 વાગ્યે શરૂ થશે.

એપલે શા માટે બદલી પોતાની રણનીતિ?

એપલનો આ વ્યૂહાત્મક નિર્ણય દર્શાવે છે કે કંપની હવે પિરામિડના ટોચના એટલે કે પ્રીમિયમ સ્માર્ટફોન સેગમેન્ટમાંથી મળતા નફાને મહત્તમ કરવા માંગે છે. ટેક ઈન્ડસ્ટ્રીમાં એ સર્વવિદિત છે કે એપલની સૌથી વધુ કમાણી અને પ્રોફિટ માર્જિન તેના પ્રો અને પ્રો મેક્સ મોડેલ્સમાંથી જ આવે છે. જ્યારે પણ નવું આઈફોન લાઇનઅપ બજારમાં આવે છે, ત્યારે શરૂઆતમાં ગ્રાહકોની સૌથી વધુ માંગ આ જ પ્રીમિયમ પ્રો મોડેલ્સ માટે હોય છે.

બેઝ મોડેલનું લોન્ચિંગ પાછળ ઠેલવવાના મુખ્ય કારણો

પ્રીમિયમ મોડેલ્સ પર ધ્યાન: બે તબક્કામાં લોન્ચિંગ કરવાથી શરૂઆતમાં માત્ર પ્રો અને ફોલ્ડેબલ મોડેલ્સનું વેચાણ વધશે અને કંપનીની સરેરાશ વેચાણ કિંમત (Average Selling Price) પણ ઊંચી રહેશે.

વધતો ઉત્પાદન ખર્ચ: નવા 2-નેનોમીટર પ્રોસેસર અને મેમરી ચિપ (DRAM) ની ઊંચી પડતર કિંમતની અસરથી પોતાના નફાનું રક્ષણ કરવા કંપનીએ આ નિર્ણય લીધો છે.

લોન્ચિંગનું ભારણ ઘટાડવું: એકસાથે અનેક ડિવાઈસ બજારમાં મૂકવાને બદલે કંપની તેના લોન્ચ કેલેન્ડરને સમગ્ર વર્ષ દરમિયાન વિભાજિત કરી રહી છે.

આ પણ વાંચોઃ લંડનની સડકો પર વિરાટ કોહલીનો ક્યૂટ અંદાજ, દીકરા અકાયનું સ્ટ્રોલર સંભાળતા જોવા મળ્યા; અનુષ્કાના લુકે પણ ખેંચ્યું ધ્યાન!

નવા સીઈઓ જોન ટર્નસ માટે પણ મોટી પરીક્ષા

આજનો ઈવેન્ટ માત્ર નવા આઈફોનની લોન્ચિંગ માટે જ નહીં પરંતુ કંપનીના નવા સીઈઓ જોન ટર્નસ માટે પણ અગ્નિપરીક્ષા સમાન છે. ટિમ કૂક હવે બોર્ડના એક્ઝિક્યુટિવ ચેરમેન છે, જ્યારે ટર્નસે 1 સપ્ટેમ્બરથી સીઈઓનો પદભાર સંભાળ્યો છે. આ સિવાય, એપલ દર વર્ષની જેમ નવા મોડેલ આવ્યા બાદ 5 થી 7 વર્ષ જૂના મોડેલ્સનું ઉત્પાદન બંધ કરી શકે છે, જોકે ઈ-કોમર્સ પ્લેટફોર્મ પર સ્ટોક હોય ત્યાં સુધી જૂના ફોન ઉપલબ્ધ રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ