VIDEO / કિંજલ રબારીના વિવાદ પર સમાજના આગેવાનની સમાજને મીઠી અપીલ, જુઓ શું કહ્યું?

કિંજલ રબારીને લઈને ચાલી રહેલા વિવાદ વચ્ચે સમાજના આગેવાન દશરથ ખાંભેલે સમાજના યુવાઓ સહિત બંને પક્ષના લોકોને શાંતિ જાળવવા અપીલ કરી છે. દશરથ ખાંભેલના જણાવ્યા મુજબ, કિંજલ બીજી વખત પોતાની મરજીથી ગઈ છે અને પહેલી વખત તેણે પોતે સમાજ પાસે મદદ માંગી હતી, જેના પગલે સમાજ દ્વારા મદદ કરવામાં આવી હતી. તેમણે વધુમાં જણાવ્યું કે CCTV ફૂટેજમાં પણ કિંજલ પોતાની મરજીથી જતી જોવા મળી રહી છે. સમગ્ર મામલે કોઈ ઉશ્કેરણી કે અશાંતિ ન સર્જાય તે માટે બંને પક્ષના લોકોને શાંતિ અને સંયમ જાળવવા દશરથ ખાંભેલે અપીલ કરી છે.

કથિત અપહરણના મામલે મહત્વનો વળાંક

અમદાવાદ: લોકગાયિકા કિંજલ રબારીના કથિત અપહરણના મામલે મહત્વનો વળાંક આવ્યો છે. કિંજલ રબારીએ સોશિયલ મીડિયા પર વીડિયો પોસ્ટ કરીને પોતાનું અપહરણ થયું હોવાના આક્ષેપોને નકારી કાઢ્યા છે. બીજી તરફ, ચાંદખેડા પોલીસની તપાસ દરમિયાન સામે આવેલા CCTV ફૂટેજને આધારે પણ અપહરણના દાવા અંગે સવાલો ઉભા થયા છે.

કિંજલ રબારીએ સોશિયલ મીડિયામાં વીડિયો પોસ્ટ કર્યો

કિંજલ રબારીએ સોશિયલ મીડિયા પર પોસ્ટ કરેલા વીડિયોમાં જણાવ્યું હોવાનું સામે આવ્યું છે કે, તેમના પરિવારે તેમની મરજી વિરુદ્ધ અન્ય વ્યક્તિ સાથે લગ્ન કરાવ્યા હતા. કિંજલે પોતે અશોક ચૌધરીની પત્ની હોવાનું જણાવીને કહ્યું કે, હવે તે પોતાના પતિ સાથે આવી ગઈ છે. કિંજલના જણાવ્યા અનુસાર, તેમના પરિવારજનોએ તેમના પતિ અશોક ચૌધરી સાથે મારપીટ પણ કરી હતી. સમગ્ર મામલે કિંજલે પોતાના પતિ સાથે હોવાની વાત સ્પષ્ટ કરતાં અપહરણના આરોપોને ફગાવી દીધા છે.

CCTV ફૂટેજથી તપાસમાં નવો વળાંક

ચાંદખેડા પોલીસની તપાસમાં CBD મોલના CCTV કેમેરાના ફૂટેજ મહત્વના પુરાવા તરીકે સામે આવ્યા હોવાનું જાણવા મળ્યું છે. CCTV ફૂટેજમાં કિંજલ રબારી જાતે જ એક કારમાં બેસતી હોવાનું દેખાઈ રહ્યું છે.

અપહરણના આક્ષેપ અંગે તપાસને નવો વળાંક મળ્યો

કિંજલ કારમાં બેસતી હતી તે સમયના CCTV ફૂટેજ પણ પોલીસ દ્વારા જાહેર કરવામાં આવ્યા હોવાનું સામે આવ્યું છે. પોલીસની તપાસ મુજબ, ઉપલબ્ધ CCTV ફૂટેજમાં કિંજલને પોતાની રીતે કારમાં બેસતી જોઈ શકાય છે, જેના આધારે અપહરણના આક્ષેપ અંગે તપાસને નવો વળાંક મળ્યો છે.

પતિ સાથે CBD મોલની બહાર જોવા મળી હતી

સૂત્રોના જણાવ્યા મુજબ, કિંજલ રબારી પોતાના પતિ અશોક ચૌધરી સાથે CBD મોલની બહાર જોવા મળી હતી. બંને મોલની આસપાસ ચક્કર લગાવતા હોવાની વિગતો પણ સામે આવી છે.

આ પણ વાંચોઃ ભારતનું અંતરિક્ષ ક્ષેત્રે મોટું લક્ષ્ય, 2035 સુધી સ્પેસ સ્ટેશન અને 2040 સુધી ચંદ્ર પર ભારતીયોને મોકલવાની તૈયારી

હાલ સમગ્ર મામલે ચાંદખેડા પોલીસ દ્વારા તપાસ કરવામાં આવી રહી છે. કિંજલ રબારીના સોશિયલ મીડિયા વીડિયો અને CCTV ફૂટેજ સામે આવ્યા બાદ કથિત અપહરણના કેસમાં ઘટનાક્રમ વધુ ચર્ચાસ્પદ બન્યો છે. પોલીસ તપાસ પૂર્ણ થયા બાદ સમગ્ર મામલે વધુ હકીકતો સ્પષ્ટ થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ