ગુજરાત / દિલ્હી બોય્ઝ હોસ્ટેલ દુર્ઘટના બાદ અમદાવાદમાં એક્શન, ‘શી’ ટીમ વિદ્યાર્થીઓની સલામતી તપાસશે

રાષ્ટ્રીય રાજધાની નવી દિલ્હીમાં પાંચ માળની બોય્ઝ હોસ્ટેલ ઈમારત ધરાશાયી થતાં સાત લોકોનાં મોત થયાંની ચોંકાવનારી ઘટના બાદ અમદાવાદ શહેર પોલીસ અને અમદાવાદ મ્યુનિસિપલ કોર્પોરેશન (એએમસી)એ શહેરભરમાં પેઈંગ ગેસ્ટ (પીજી) આવાસોની નોંધણી અને સલામતીની ચકાસણી શરૂ કરવાનો નિર્ણય લીધો છે. પોલીસ પીજીમાં જઈ તપાસ કરશે, જ્યારે ‘શી’ ટીમ વિદ્યાર્થીઓની સલામતી અને સુખાકારી અંગે તપાસ કરશે.

દિલ્હીમાં ધરાશાયી થયેલી ઈમારતમાં રહેતા વિદ્યાર્થીઓ અને અન્ય લોકોની ઓળખ કરવામાં સત્તાધિકારીઓને મુશ્કેલી પડી હોવાનું સામે આવ્યું છે. આ સ્થિતિએ અમદાવાદ પોલીસને પીજીની નોંધણી અને ચકાસણી વધુ કડક બનાવવાની દિશામાં આગળ વધવા પ્રેરિત કરી છે, જેથી રહેવાસીઓની વિગતો સત્તાવાળાઓ પાસે ઉપલબ્ધ રહે.

PGની મુલાકાત લઈ ત્યાં રહેતા લોકોની ચકાસણી

તમામ પોલીસ મથકોને તેમનાં કાર્યક્ષેત્રમાં આવતા PGની મુલાકાત લઈ ત્યાં રહેતા લોકોની ચકાસણી કરવાનો આદેશ આપવામાં આવ્યો છે. અમદાવાદ પોલીસ કમિશનર અનુપમસિંહ ગેહલોતે આ અંગે જણાવ્યું છે કે અમે ‘શી’ ટીમને પણ સ્થળ પર મોકલીશું અને વિદ્યાર્થીઓને કોઈ મુશ્કેલી પડી રહી છે કે કેમ તે જાણીશું.

શહેરમાં 80,000 લોકો પેઈંગ ગેસ્ટ તરીકે રહે છે

એએમસીએ સપ્ટેમ્બર, ૨૦૨૫માં કરેલા સર્વેમાં શહેરની હદમાં ૪૦૧ પીજી એકમો મળી આવ્યા હતા. તેમાંથી ૩૯૯ પીજી પશ્ચિમ વિસ્તારમાં હતા. આ પીજી બોપલ, થલતેજ, વસ્ત્રાપુર, સેટેલાઇટ, ઘાટલોડિયા, એસ.જી. હાઇવે, ઘુમા, ગોતા, ચાંદલોડિયા, જગતપુર, ચાંદખેડા, નવરંગપુરા અને બોડકદેવ સહિતના વિસ્તારોમાં આવેલા છે. પૂર્વ વિસ્તારમાં માત્ર બે પીજી મળી આવ્યા હતા.

નોટિસ છતાં 385 PGમાં એનઓસી અને વેરિફિકેશન બાકી

સોસાયટીનું નો-ઓબ્જેક્શન સર્ટિફિકેટ (એનઓસી) અને પોલીસ વેરિફિકેશન વિના સંચાલિત થઈ રહેલા પીજી સામે કાર્યવાહી હાથ ધરાઈ છે. સર્વે કરાયેલા પીજીમાંથી ૩૮૫ને એનઓસી મેળવવા અને પોલીસ વેરિફિકેશન કરાવવા નોટિસ આપવામાં આવી હતી. સાથે જ ૩૦ દિવસમાં ફાયર સેફ્ટી અને પાર્કિંગના નિયમોનું પાલન કરવા પણ જણાવાયું હતું. કાર્યવાહી દરમિયાન આઠ પીજી બંધ થઈ ગયા હતા, જ્યારે માત્ર ૧૬ પીજી જ નિયમોનું પાલન કરતા હોવાનું જણાયું હતું.

કેટલાક વિસ્તારોમાં કાર્યવાહી શરૂ

કેટલાક કિસ્સાઓમાં કાર્યવાહી શરૂ પણ થઈ ગઈ છે. થલતેજની એક રો-હાઉસ સ્કીમ હેઠળ નવેમ્બર, ૨૦૨૫માં ૧૧ મકાનોને કથિત રીતે પરવાનગી વિના પીજી તરીકે ઉપયોગ કરવા બદલ સીલ કરવામાં આવ્યા હતા. વર્ષ ૨૦૨૫-૨૬ દરમિયાન રહેણાક સોસાયટીઓમાં ૨૫થી વધુ ગેરકાયદે પીજી એકમોને પણ સીલ કરવામાં આવ્યાં હતાં.

વાસ્તવિક સંખ્યા AMCના આંકડા કરતાં ઘણી મોટી

અમદાવાદમાં પેઈંગ ગેસ્ટની વાસ્તવિક સંખ્યા મનપાના આંકડા કરતાં ઘણી મોટી હોવાનું ઉદ્યોગ ક્ષેત્રના નિષ્ણાતો જણાવે છે. શહેરમાં અંદાજે ૮૦,૦૦૦ વિદ્યાર્થીઓ અને વ્યાવસાયિકો પીજી આવાસોમાં રહેતા હોવાનું માનવામાં આવે છે. શહેરભરમાં ૪,૦૦૦થી વધુ સંચાલકો આ ક્ષેત્રમાં સેવા આપે છે. એએમસીના સર્વેમાં મોટા અને વ્યાવસાયિક રીતે સંચાલિત પીજીની નોંધણી થવાની શક્યતા વધુ રહી હતી, જ્યારે નાનાં ઘર આધારિત પીજી નોંધાયા ન હોય તેવી શક્યતા છે.

આ પણ વાંચો : PM મોદીએ નવસારીમાં 'નમો કમલમ'નું લોકાર્પણ કર્યું, 389 ગામોમાં 4000 સ્ક્રીન પર લાઈવ પ્રસારણ

પેઈંગ ગેસ્ટ માટે અલગ શ્રેણી ન હોવાથી નિયમન મુશ્કેલ

અધિકારીઓએ જણાવ્યું હતું કે પેઈંગ ગેસ્ટની શ્રેણી ‘ગુજરાત ઓનરશિપ ફ્લેટ્સ ઍક્ટ’ હેઠળ અલગથી વ્યાખ્યાયિત નથી. તેથી આવા સંચાલકોને હાલમાં હોટેલ અથવા રહેવા-જમવાની સુવિધા સાથે સંકળાયેલી જોગવાઈઓ હેઠળ નિયંત્રિત કરવામાં આવે છે. પીજી માટે અલગ નોંધણી નંબર કે પોર્ટલની હાલ કોઈ વ્યવસ્થા નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ